Biyernes sa Ikakatloan nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-FILIPOS

Phil. 1: 1-11

Gikan ni Pablo ug ni Timoteo, mga sulugoon ni Cristo Jesus—Alang sa tibuok katawhan sa Dios sa Filipos nga nahiusa kang Cristo Jesus, lakip sa mga pangulo ug sa mga katabang sa buluhaton sa simbahan: Ang Dios nga atong Amahan ug ang Ginoong Jesucristo maghatag unta kaninyo sa grasya ug kalinaw. Nagpasalamat ako sa Dios sa matag higayon nga maghandom ako kaninyo, ug gikalipay ko ang pag-ampo kanunay alang kaninyong tanan, tungod sa inyong pagtabang kanako sa buluhaton, sa Ebanghelyo, sukad sa una pa gayong adlaw hangtod karon. Ug busa siguro ako nga kining maayong buhat nga gisugdan sa Dios diha kaninyo padayonon gayod niya hangtod mahuman kini sa pagbalik ni Cristo Jesus. Angay gayod nga bation ko kini alang kaninyo sanglit gimahal ko man kamo. Kay nakig-ambit man kamong tanan niining pribilihiyo nga gihatag sa Dios kanako, dili lamang karon nga nabilanggo ako, kondili samtang libre pa ako pagpanalipod ug pagpalambo sa buluhaton sa Ebanghelyo. Nasayod ang Dios nga ang tim-os kong pagbati alang kaninyong tanan gikan gayod sa kasingkasing ni Cristo Jesus. Ang akong pag-ampo alang kaninyo mao nga magtubo unta ang inyong gugma, kahibalo, ug kaalam sa paghukom, aron makapili kamo sa labing maayo. Sa ingon niini maputli kamo ug walay ikasaway diha kaninyo unya sa pagbalik ni Cristo. Matugob unya ang inyong kinabuhi sa mga maayong hiyas nga gikan ni Jesucristo alang sa himaya ug dungog sa Dios.

SALMO RESPONSORYO

Ps. 111: 1-2. 3-4. 5-6

Pagkadako sa mga buhat sa Ginoo!

Aleluya.

Pasalamatan ko ang Ginoo sa tibuok kong kasingkasing, kuyog ug diha sa pundok sa mga matarong, dako ang mga buhat sa Ginoo, malumo diha sa tanan nilang kamakalipay.

Pagkadako sa mga buhat sa Ginoo!

Aleluya.

Halangdon ug mahimayaon ang iyang buhat, ug ang iyang katarong nagalungtad sa kahangturan. Nabantogan siya tungod sa iyang katingalahang mga buhat; maayo ug maluluy-on ang Ginoo.

Pagkadako sa mga buhat sa Ginoo!

Aleluya.

Gitagaan niyag pagkaon sila nga mahadlokon kaniya; mahinumdom siya kanunay sa iyang kasabutan. Gipahibalo niya sa iyang lungsod ang gahom sa iyang mga buhat, gihatagan niya sila sa kabilin sa kanasuran.

Pagkadako sa mga buhat sa Ginoo!

Aleluya.

PAGBASA SA SANTOS NGA EBANGHELYO SUMALA NI SAN LUKAS

Lk. 14: 1-6

Usa niana ka Adlawng Igpapahulay miadto si Jesus sa balay sa usa sa mga inilang Pariseo aron mokaon, ug ang mga tawo naniid pag-ayo kaniya. Unya dihay tawo kansang mga bitiis ug mga bukton nanghupong nga miduol kang Jesus. Nangutana si Jesus sa mga magtutudlo sa Balaod ug sa mga Pariseo, "Gitugot ba sa atong Balaod ang pag-ayog masakiton sa Adlawng Igpapahulay?" Apan wala sila motubag. Unya gigunitan ug giayo ni Jesus ang tawo ug gipalakaw. Unya miingon siya kanila, "Kon usa kaninyo may anak o may baka nga mahulog sa atabay sa Adlawng Igpapahulay, dili ba ninyo kuhaon kini niana gayong adlawa?" Apan wala sila makatubag kaniya bahin niini.