Huwebes sa Ikakatloan nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-EFESO

Eph. 6: 10-20

Mga igsuon, lig-ona ang inyong kaugalingon diha sa pagpakighiusa sa Ginoo pinaagi sa iyang dakong gahom. Isul-ob ninyo ang armadura nga gihatag sa Dios kaninyo, aron makasukol kamo batok sa mga limbong sa Yawa. Kay wala kita makig-away batok sa mga tawo, kondili batok sa mga dautang espirituhanong gahom diha sa kalangitan, sa mga hari, sa mga anaa sa gahom, ug sa pangulo niining kalibutana sa kangitngit. Busa isul-ob ang tibuok armadura sa Dios! Ug inig-abot unya sa dautang adlaw, makasukol kamo sa inyong kaaway sa walay paglunga hangtod sa katapusan. Busa pangandam kamo: gamita ang kamatuoran ingon nga bakos, ang pagkamatarong ingon nga salipod sa inyong dughan, ug ang kadasig sa pagsangyaw sa Maayong Balita sa kalinaw ingon nga inyong sapatos. Bitbita kanunay ang inyong pagtuo sama sa taming, kay pinaagi niini makapalong kamo sa tanang nagsiga nga mga udyong nga ipana kaninyo sa Yawa. Ug ikalo ninyo ang kaluwasan ingon nga panalipod sa ulo ug gamita ang pulong sa Dios sama sa espada nga gihatag kaninyo sa Espiritu. Buhata kining tanan diha sa pag-ampo, ug pangayo kamo kanunay pinaagi sa Espiritu. Tungod niini pagbantay kamo ug ayaw gayod paglunga; pag-ampo kanunay alang sa tibuok katawhan sa Dios. Ug pag-ampo usab kamo alang kanako, aron ang Dios maghatag kanakog mensahe sa akong pagwali, ug aron magsulti ako sa walay kukahadlok sa tinago sa Ebanghelyo tungod niining maong Ebanghelyo nahimo akong embahador bisan ania ako karon sa karsel. Busa pag-ampo kamo nga magmaisog ako sa pagwali niini kay kini gikinahanglan gayod.

SALMO RESPONSORYO

Ps. 144: 1. 2. 9-10

Daygon ang Ginoo, ang akong Bato.

Daygon unta ang Ginoo, akong Bato, nga nagbansay sa akong mga kamut alang sa away, sa akong mga tudlo alang sa gubat.

Daygon ang Ginoo, ang akong Bato.

Ang akong dalangpanan ug akong kota, akong malig-ong salipdanan, akong manluluwas, Ang akong taming nga akong gisaligan, nga nagabadlong sa katawhan ubos kanako.

Daygon ang Ginoo, ang akong Bato.

O Dios, awitan ko ikaw og bag-ong awit; sa lira nga may napulo ka koldas awitan ko ang imong kadayganan. Kanimo nga nagahatag og kadaugan sa mga hari, ug nagaluwas kang David, imong sulugoon.

Daygon ang Ginoo, ang akong Bato.

PAGBASA SA SANTOS NGA EBANGHELYO SUMALA NI SAN LUKAS

Lk. 13: 31-35

Niadtong higayona, may pipila ka mga Pariseo nga miadto kang Jesus ug miingon kaniya, "Kinahanglan mopahawa ka dinhi ug moadto sa ubang dapit, kay si Herodes buot mopatay kanimo." Si Jesus mitubag, "Adtua ug suginli kanang milo: 'Naghingilin ako sa mga yawa ug nag-ayo sa mga masakiton karun ug ugma, ug sa ikatulo ka adlaw akong tapuson ang akong buluhaton.' Apan magpadayon ako sa akong panaw karong adlawa, ugma ug sa sunod nga adlaw; dili maayo ang usa ka propeta nga patyon gawas sa Jerusalem." "Jerusalem, Jerusalem! Imong gipamatay ang mga propeta ug gibato ang mga sinugo nga gipadala sa Dios kanimo! Pagkadaghang higayon nga buot ako mogakos sa tanan mong mga anak, ingon sa usa ka himongaan nga nagtigom sa iyang mga piso ilalom sa iyang mga pako, apan dili ka buot nga buhaton ko kini! Karon ang imong balay biyaan sa hingpit. Dili kana makakita kanako hangtod sa adlaw nga ikaw miingon, 'Bulahan siya nga mianhi sa ngalan sa Ginoo.'"