[F] San Simon ug San Judas, mga apostoles

PAGBASA GIKAN SA SULAT NI SAN PABLO NGADTO SA TAGA-EFESO

Eph. 2: 19-22

Kamong mga dili Judio dili na mga langyaw o mga dumuduong kondili mga katagilungsod na sa katawhan sa Dios, ug mga sakop sa iyang banay. Gitukod kamo diha sa sukaranan nga gipahimutang sa mga apostoles ug sa mga propeta, ug ang bato nga gisukaran nga mao si Cristo Jesus. Siya mao ang nagsagang sa tibuok balay hangtod mahimo kining templo nga balaan sa Ginoo. Uban sa tanang magtutuo kamo usab nga nahiusa kaniya gihimong usa ka balay diin nagpuyo ang Dios pinaagi sa iyang Espiritu.

SALMO RESPONSORYO

Ps. 19: 2-3. 4-5

Ang ilang mensahe migula latas sa tibuok kalibutan.

Ang mga langit nagpadayag sa himaya sa Dios, ug ang kahitas-an nagsangyaw sa buhat sa iyang kamut. Ang adlaw nagsulti ngadto sa sunod adlaw, ang gabii nagapahibalo ngadto sa sunod gabii.

Ang ilang mensahe migula latas sa tibuok kalibutan.

Walay usa ka pulong ni usa ka pakigsulti kansang tingog wala madungog; Latas sa tibuok yuta milanog ang ilang tingog, ug hangtod sa kinatumyan sa kalibutan, miabot ang ilang mensahe.

Ang ilang mensahe migula latas sa tibuok kalibutan.

PAGBASA SA SANTOS NGA EBANGHELYO SUMALA NI SAN LUKAS

Lk. 6: 12-16

Niadtong panahona mitungas si Jesus sa usa ka bungtod aron pag-ampo, ug didto nag-ampo siya sa Dios sa tibuok gabii. Pagkaadlaw na, gitawag niya ang iyang mga tinun-an ug gipili niya ang napulog-duha kanila nga ginganlan niyag mga apostoles: si Simon (nga iya usab ginganlag Pedro) ug ang iyang igsuon nga si Andres; si Santiago ug si Juan, si Felipe ug si Bartolome, si Mateo ug si Tomas, si Santiago nga anak ni Alfeo ug si Simon (ang gitawag nga patriyota), si Judas nga anak ni Santiago ug si Judas Iscariote, ang nahimong mabudhion.