Martes sa Ikakatloan nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-EFESO

Eph. 5: 21-33

Tungod kang Cristo pagtinahoray kamo. Mga asawa, tahora ug sunda ninyo ang inyong bana sama nga nagtahod ug nagsunod kamo sa Ginoo. Kay ang bana mao ang ulo sa iyang asawa ingon nga si Cristo maoy ulo sa simbahan; ug si Cristo mismo mao ang Manluluwas sa simbahan nga mao ang iyang lawas. Busa kinahanglan motahod ug mosunod ang mga asawa sa ilang bana ingon nga ang simbahan nagtahod ug nagsunod kang Cristo. Mga bana, higugmaa ang inyong asawa ingon nga gihigugma ni Cristo ang simbahan ug gitugyan ang iyang kinabuhi alang niini. Gihimo niya kini aron paghalad sa simbahan ngadto sa Dios pinaagi sa iyang pulong, human niya kini hugasi sa tubig. Sa ingon niini, ikatugyan niya ang simbahan alang kaniya mismo diha sa bug-os niyang kaanyag, putli ug walay ikasaway, walay buling o kunot, o bisan unsang apan. Kinahanglan nga ang mga bana mahigugma sa ilang asawa ingon nga nahigugma sila sa ilang kaugalingong lawas. Ang bana nga nahigugma sa iyang asawa nahigugma usab sa iyang kaugalingon. Walay nasilag sa kaugalingon niyang lawas; hinonoa, pakan-on niya kini ug atimanon sama sa gibuhat ni Cristo sa simbahan, kay mga bahin man kita sa iyang lawas. Sumala sa giingon sa Kasulatan, "Tungod niini ang lalaki mobiya sa iyang amahan ug inahan ug motipon sa iyang asawa, ug silang duha mahimong usa." May dakong kamatuoran kining bahina sa Kasulatan, ug sa akong hunahuna nagpasabot kini kang Cristo ug sa simbahan. Apan alang usab kini kaninyo: ang bana kinahanglan mahigugma sa iyang asawa sama sa iyang kaugalingon, ug ang asawa usab kinahanglan magtahod sa iyang bana.

SALMO RESPONSORYO

Ps. 128: 1-2. 3. 4-5

Bulahan sila nga mahadlokon sa Ginoo.

Bulahan ikaw nga mahadlokon sa Ginoo, nga nagalakaw sa iyang kadalanan. Kay magakaon ka sa bunga sa imong binuhatan; mabulahan gayod ikaw ug mapanalanginan.

Bulahan sila nga mahadlokon sa Ginoo.

Ang imong asawa mahisama sa usa ka mabungahon nga bagon nga anaa sa tugkaran sa imong balay; Ang imong mga anak sama sa mga tanom nga olibo libot sa imong talad.

Bulahan sila nga mahadlokon sa Ginoo.

Ania, ingnon niini pagpanalangin ang tawo nga mahadlokon sa Ginoo. Ang Ginoo manalangin kanimo gikan sa Sion: makakita unta ikaw sa kausbawan sa Jerusalem sa tanang adlaw sa imong kinabuhi.

Bulahan sila nga mahadlokon sa Ginoo.

PAGBASA SA SANTOS NGA EBANGHELYO SUMALA NI SAN LUKAS

Lk. 13: 18-21

Si Jesus miingon, "Sa unsa ko ba itandi ang paghari sa Dios? Kini sama sa usa ka liso sa mustasa nga gipugas sa usa ka tawo sa iyang uma. Miturok kini ug nahimong kahoy, ug nagsalag ang mga langgam sa mga sanga niini." Unya nangutana pag-usab si Jesus, "Sa unsa ko ba itandi ang paghari sa Dios? Sama kini sa igpapatubo sa pan nga gikuha sa usa ka babaye ug gisagol sa usa ka takos nga harina hangtod mitubo ang tibuok minasa."