Lunes sa Ikakatloan nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-EFESO

Eph. 4: 32 - 5: 8

Hinonoa, pagkaluy-anay kamo ug pagbaton og malumong kasingkasing alang sa usag-usa, ug pagpinasayloay kamo ingon nga gipasaylo kamo sa Dios diha kang Cristo. Sanglit kamo minahal man nga mga anak sa Dios, kinahanglan nga maningkamut kamo nga mahisama kaniya. Kinahanglan magkinabuhi kamo diha sa gugma, ingon nga gihigugma kita ni Cristo ug gitugyan ang iyang kinabuhi alang kanato, sama sa mahumot nga halad sinunog nga makapahimuot sa Dios. Sanglit kamo katawhan man sa Dios, dili maayong igdungog nga dunay kalaw-ayan o kahugawan o kahakog diha kaninyo. Ayaw kamo paggamit sa mga pulong nga malaw-ay, binuang o mahugawng tiaw; hinonoa, angay kamong magpasalamat sa Dios. Makasiguro kamo nga walay tawo nga mahilayon, malaw-ayon o hakog (kay ang kahakog maoy usa ka paagi sa pagsimba sa diosdios) nga makaambit sa Gingharian ni Cristo ug sa Dios. Ayaw kamo patunto ni bisan kinsa sa mga pulong binuang kay mahiagom sa kapungot sa Dios ang mosupil kaniya. Busa likayi gayod ninyo kining mga tawhana. Kaniadto diha kamo sa kangitngit, apan sukad kamo nahimong katawhan sa Dios, anaa na kamo sa kahayag. Busa kinahanglan nga magkinabuhi kamo ingon nga mga tawo nga iya sa kahayag.

SALMO RESPONSORYO

Ps. 1: 1-2. 3. 4. 6

Pagpuyo kamo ingog Dios, ingon nga kamo mga minahal niyang mga anak.

Bulahan ang tawo nga wala magsunod sa tambag sa dautan. Ni maglakaw sa dalan sa mga makasasala ni makig-uban sa mga walay ulaw, kondili nalipay pagpalandong sa balaod sa Ginoo adlaw ug gabii.

Pagpuyo kamo ingog Dios, ingon nga kamo mga minahal niyang mga anak.

Sama siya sa usa ka kahoy nga gitanom sa tampi sa masulog nga tubig, riga nagahatag sa iyang bunga sa tingbunga, ang iyang dahon dili gayod malarag. (Bisan unsay iyang buhaton molampos.)

Pagpuyo kamo ingog Dios, ingon nga kamo mga minahal niyang mga anak.

Dili ingon niini ang dautan, dili gayod; sama sila sa tahop nga paliron sa hangin. Kay ang Ginoo nagabantay sa dalan sa matarong, apan naglaglag sa dalan sa dautan.

Pagpuyo kamo ingog Dios, ingon nga kamo mga minahal niyang mga anak.

PAGBASA SA SANTOS NGA EBANGHELYO SUMALA NI SAN LUKAS

Lk. 13: 10-17

Usa niana ka Adlawng Igpapahulay nagtudlo si Jesus didto sa usa ka sinagoga. Didto may babaye nga giyawaan ug tungod niini, nasakit siya sulod na sa napulog-walo ka tuig. Nagtikubo na siya ug dili na makatuyhad. Sa pagkakita ni Jesus kaniya, miingon siya sa babaye, "Naayo na ikaw sa imong sakit!" Ug iyang gitapion ang iyang kamut sa babaye, ug dihadiha nakatuyhad siya ug gidayeg niya ang Dios. Ang opisyal sa sinagoga nasuko nga si Jesus nag-ayo sa masakiton sa Adlawng Igpapahulay, ug miingon siya sa mga tawo, "May unom ka adlaw nga kita makatrabaho. Anhi kamo nianang mga adlawa kon gusto kamong mamaayo, apan dili sa Adlawng Igpapahulay!" Mitubag ang Ginoo kaniya, "Mga tigpakaaron-ingnon kamo! Sa Adlawng Igpapahulay bisan kinsa kaninyo mobadbad sa inyong baka kun asno gikan sa kuwadra ug dad-on ninyo kini ngadto sa gawas aron paimnon. Karon, aniay kaliwat ni Abraham nga gipaantos ni Satanas sulod na sa napulog-walo ka tuig; dili ba siya mahimong ayohon sa Adlawng Igpapahulay?" Naulaw ang tanan niyang mga kaaway sa pagkadungog nila sa tubag niya, samtang nalipay ang tanang mga tawo sa kahibulongang mga buhat ni Jesus.