Biyernes sa Ikakawhaa'g Siyam nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-EFESO

Eph. 4: 1-6

Ako nga binilanggo tungod kay nag-alagad ako sa Ginoo, mag-awhag kaninyo sa pagkinabuhi nga angay gayod sa buluhaton sa mga tinawag sa Dios. Pagmapaubsanon kamo, pagmaaghop, ug pagmapailubon kanunay. Ipakita ang inyong gugma pinaagi sa pagtinabangay. Paningkamuti aron motunhay ang inyong panaghiusa nga hinatag sa Espiritu, pinaagi sa panagdait nga nagbugkos kaninyo. May usa lamang ka lawas usa ka Espiritu, ingon nga may usa lamang ka paglaum ug alang niini gitawag kamo sa Dios. May usa lamang ka Ginoo, usa ka pagtuo, ug usa ka bunyag; may usa lamang ka Dios ug Amahan sa tanang mga tawo, nga mao ang labaw sa tanan ug nagbuhat pinaagi sa tanan ug anaa sa tanan.

SALMO RESPONSORYO

Ps. 24: 1-2. 3-4. 5-6

Ginoo, mao kini ang katawhan nga nangandoy sa pagtan-aw sa imong nawong.

Sa Ginoo ang yuta ug ang iyang kapuno; ang kalibutan ug sila nga nagpuyo niini, kay iya kining gitukod ibabaw sa kadagatan, ug iya kining gibuhat ibabaw sa kasubaan.

Ginoo, mao kini ang katawhan nga nangandoy sa pagtan-aw sa imong nawong.

Kinsay makatungas sa bukid sa Ginoo? O kinsay makabarog sa iyang balaang dapit? Siya kansang mga kamut walay mga sala, kansang kasingkasing malinis, siya nga wala magtinguha sa mga butang nga walay-hinungdan.

Ginoo, mao kini ang katawhan nga nangandoy sa pagtan-aw sa imong nawong.

Makadawat siya og panalangin gikan sa Ginoo, ganti gikan sa Dios nga iyang manluluwas. Mao kini ang kaliwat nga nangita kaniya, nga nangita sa nawong sa Dios ni Jacob.

Ginoo, mao kini ang katawhan nga nangandoy sa pagtan-aw sa imong nawong.

PAGBASA SA SANTOS NGA EBANGHELYO SUMALA NI SAN LUKAS

Lk. 12: 54-59

Si Jesus miingon ngadto sa katawhan, "Inigkakita ninyo og dag-om nga naggikan sa kasadpan, moingon dayon kamo, 'Moulan dili madugay,' ug moulan gayod. Ug sa pagkamatngon ninyo sa habagat nga naghuros, moingon kamo, 'Moinit karon,' ug moinit gayod. Mga tigpakaaron-ingnon! Makamao kamong mosabut sa kahulugan sa dagway sa yuta ug sa langit, apan nganong dili man kamo makasabut sa kahulugan niining panahona?" "Ug nganong dili man kamo maghukom unsay angay buhaton? Kon may mokiha kanimo, paningkamut sa pagpakig-uli kaniya samtang anaa pa kamo sa dalan, aron dili ka niya taralon ngadto sa maghuhukom ug itugyan ka niya ngadto sa polis, ug ibalhog ka sa polis ngadto sa bilanggoan. Timan-i kini: dili ka gayod buhian hangtod kabayran mo ang katapusang usa ka dako sa imong multa."