Huwebes sa Ikakawhaa'g Siyam nga Semana sa Ordinaryong Panahon
[m] Saint John Paul II, pope
PAGBASA GIKAN SA SULAT NI SAN PABLO NGADTO SA TAGA-EFESO
Eph. 3: 14-21
Tungod niini nag-ampo ako sa Amahan, nga maoy naghatag sa matuod nga ngalan sa tanang kabanayan sa langit ug sa yuta. Naghangyo ako sa Dios, nga tungod sa iyang kadato ug kahalangdon, lig-onon niya ang inyong espirituhanong kinabuhi pinaagi sa iyang Espiritu. Magpuyo unta si Cristo sa inyong kasingkasing pinaagi sa inyong pagtuo aron malig-on ang inyong gugma, ug uban sa tanang katawhan sa Dios makabaton kamog gahom sa pagsabot sa kalapad ug kataas, sa kahabog ug kalawom sa gugma ni Cristo. Hinaut pa unta nga masayod kamo sa gugma ni Cristo, bisan tuod dili gayod kini masayran sa hingpit, ug sa ingon mapuno kamo sa bug-os nga kahupnganan sa Dios. Daygon ta ang Dios kansang gahom ania kanato ug arang makahatag og labaw pa kay sa atong mapangayo o mahunahuna; daygon ta siya diha sa simbahan ug diha kang Cristo Jesus hangtod sa kahangturan! Amen.
ANG PULONG SA GINOO
SALMO RESPONSORYO
Ps. 33: 1-2. 4-5. 11-12. 18-19
Puno ang yuta sa kaayo sa Ginoo.
Pagsadya, kamong mga matarong, diha sa Ginoo; ang pagdayeg gikan sa matarong sibo gayod. Pasalamati ang Ginoo diha sa alpa; sa lira nga napulog koldas awita ang iyang kadayganan.
Puno ang yuta sa kaayo sa Ginoo.
Kay matarong ug ang tanan niyang mga buhat kasaligan. Mahigugmaon siya sa husto ug sa matarong; sa kaluoy sa Ginoo puno ang yuta.
Puno ang yuta sa kaayo sa Ginoo.
Apan ang laraw sa Ginoo nagabarog hangtod sa kahangturan; ang tinguha sa iyang kasingkasing, latas sa tanang kaliwatan. Bulahan ang nasod kansang Dios mao ang Ginoo, ang lungsod nga iyang gipili aron maiyang kabilin.
Puno ang yuta sa kaayo sa Ginoo.
Apan tan-awa, ang mga mata sa Ginoo gisud-ong kanila nga mahadlokon kaniya, kanila nga nagalaum sa iyang kaluoy. Aron pagluwas kanila gikan sa kamatayon ug pag-amping kanila bisan sa tinggutom.
Puno ang yuta sa kaayo sa Ginoo.
PAGBASA SA SANTOS NGA EBANGHELYO SUMALA NI SAN LUKAS
Lk. 12: 49-53
Si Jesus miingon sa iyang mga tinun-an: "Mianhi ako aron sa pagpadilaab sa kalibutan, ug pagkaayo unta kon kini misilaub na! Dunay bunyag nga ako pang dawaton, ug dili ako mahimutang hangtod matuman kini. Naghunahuna ba kamo nga mianhi ako aron pagdalag pakigdait nganhi sa kalibutan? Tug-anan ko kamo, dili pakigdait ang akong gidala kondili pagbahinbahin! Sukad karon ang usa ka panimalay nga may lima ka sakop mabahin, tulo batok duha, ug duha batok tulo. Ang amahan makigbatok sa iyang mga anak nga lalaki, ug ang mga anak lalaki makigbatok sa ilang amahan; ang inahan makigbatok sa iyang mga anak nga babaye, ug ang mga anak nga babaye makigbatok sa ilang inahan; ang ugangang babaye makigbatok sa iyang mga binalaye, ug ang mga binalaye makigbatok sa ilang ugangang babaye."
ANG EBANGHELYO SA GINOO
