[F] San Pedro Calungsod, martir

PAGBASA GIKAN SA BASAHON SA KAALAM NI SOLOMON

Wis. 3: 1-9

Apan ang matarong nga mga tawo panalipdan sa Dios ug dili gayod mag-antos sa kasakit. Usa ka binoang nga sayop ang panghunahuna nga ang mga matarong nga mga tawo mamatay ug nga ang ilang kamatayon usa ka makalilisang kadaot. Ila kitang biyaan, apan dili kini usa ka kadaot. Sa pagkatinuod, ang matarong anaa sa kalinaw. Daw nag-antos sila sa silot, apan naghupot diay sila sa masaligong paglaum sa pagkawalay kamatayon. Ang ilang mga giantos gamay ra kon itandi sa mga kabulahanan nga ilang pagadawaton. Ang Dios nagsulay kanila, ingon sa bulawan diha sa usa ka hasohasoan, ug hikaplagan sila nga angay sa pagpakig-uban kaniya. Gidawat niya sila maingon sa iyang pagdawat sa mga sakripisyo nga sunogon didto sa altar sa mga nagsimba kaniya. Inig-abot sa Dios aron pagganti sa mga matarong, mosidlak sila atubangan sa mga dautan daw kalayo diha sa uga nga uhot. Magmando sila sa kanasuran ug mga katawhan, ug ang Ginoo mao ang mahimo nilang hari hangtod sa kahangturan. Sila nga nagsalig sa Dios moabot sa pagsabot sa kamatuoran sa iyang mga paagi. Sila nga nagmatinumanon kaniya magpuyo uban kaniya diha sa iyang gugma, kay siya maayo ug maluluy-on kanila nga iyang gipili.

SALMO RESPONSORYO

Ps. 124: 2-3. 4-5. 7-8

Ang atong kalag nakalingkawas ingog langgam gikan sa lit-ag sa mangangayam.

Kon wala pa makig-uban ang Ginoo kanato sa pagsukol sa mga tawo batok kanato, Ila unta kitang gilamoy nga buhi, diha nga ang ilang kapungot nahaling batok kanato.

Ang atong kalag nakalingkawas ingog langgam gikan sa lit-ag sa mangangayam.

Unya malumsan unta kita sa katubigan; mabanlas unta kita sa masulog nga sapa; Lapaw kanato maharos unta kita sa makalilisang nga tubig.

Ang atong kalag nakalingkawas ingog langgam gikan sa lit-ag sa mangangayam.

Nalugti ang lit-ag ug nakalingkawas kita. Ang atong hinabang anaa sa ngalan sa Ginoo, nga nagbuhat sa langit ug sa yuta.

Ang atong kalag nakalingkawas ingog langgam gikan sa lit-ag sa mangangayam.

PAGBASA SA SANTOS NGA EBANGHELYO SUMALA NI SAN LUKAS

Lk. 9: 23-26

Si Jesus miingon ngadto sa katawhan, "Kon may buot mosunod kanako kinahanglan nga magdumili sa iyang kaugalingon, magpas-an sa iyang krus sa tanang adlaw ug magsunod kanako. Kay ang buot magluwas sa iyang kinabuhi kawad-an hinoon niini, apan ang kawad-an sa iyang kinabuhi tungod kanako magluwas niini. Aduna bay makuha ang tawo kon maiya ang tibuok kalibutan apan mawala ang iyang kanabuhi? Wala gayod! Kon ako ug ang akong pagtulon-an ikaulaw sa usa ka tawo, siya usab ikaulaw unya sa Anak sa Tawo sa iyang pagbalik diha sa iyang himaya ug sa himaya sa Amahan ug sa balaang mga anghel."