Martes sa Ikakawhaa'g Siyam nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-EFESO

Eph. 2: 12-22

Kaniadto wala kamo diha kang Cristo, kay mga langyaw man kamo ug dili sakop sa katawhan nga pinili sa Dios. Wala kamoy bahin sa mga kasabutan nga pinasikad sa mga saad sa Dios ngadto sa iyang katawhan. Nagkinabuhi kamo niining kalibutana nga walay paglaum ug walay Dios. Apan sa inyong pagkahiusa kang Cristo Jesus, kamo nga kaniadto layo sa Dios, karon nahiduol na pinaagi sa kamatayon ni Cristo. Kay si Cristo mismo mao ang atong kalinaw pinaagi sa paghimo sa mga Judio ug sa mga dili Judio nga usa lamang ka katawhan. Pinaagi sa iyang lawas giguba niya ang paril nga nag-ulang ug naghimo kanilang mga kaaway. Giwagtang niya ang Balaod sa mga Judio, lakip ang mga kasugoan ug mga kalagdaan niini, aron gikan sa duha ka kaliwatan, mahimo diha kaniya ang usa ka katawhan, ug sa ingon makab-ot ang kalinaw. Pinaagi sa iyang kamatayon sa krus gihiusa kita niya ug gipasig-uli ngadto sa Dios, ug sa ingon niana giwagtang niya ang pagdinumtanay. Busa mianhi si Cristo ug gisangyaw niya ang Maayong Balita sa kalinaw alang sa tanan kaninyong mga dili Judio nga duol kaniya. Pinaagi kang Cristo kitang tanan, Judio ug dili Judio, makaduol sa Amahan diha sa usa ka Espiritu. Busa kamong mga dili Judio dili na mga langyaw o mga dumuduong kondili mga katagilungsod na sa katawhan sa Dios, ug mga sakop sa iyang banay. Gitukod kamo diha sa sukaranan nga gipahimutang sa mga apostoles ug sa mga propeta, ug ang bato nga gisukaran nga mao si Cristo Jesus. Siya mao ang nagsagang sa tibuok balay hangtod mahimo kining templo nga balaan sa Ginoo. Uban sa tanang magtutuo kamo usab nga nahiusa kaniya gihimong usa ka balay diin nagpuyo ang Dios pinaagi sa iyang Espiritu.

SALMO RESPONSORYO

Ps. 85: 9-10. 11-12. 13-14

Ang Ginoo naghisgot og kalinaw ngadto sa iyang katawhan.

Pamati-on ko ang gisangyaw sa Dios; sa Ginoo—kay nagsangyaw siya sa kalinaw. Haduol gayod ang iyang kaluwasan kanila nga mahadlokon kaniya, ang himaya nagapuyo sa atong yuta.

Ang Ginoo naghisgot og kalinaw ngadto sa iyang katawhan.

Ang kaluoy ug ang kamatuoran magatagbo; ang katarong ug kalinaw maghagkanay. Ang kamatuoran mogitib gikan sa yuta, ug ang katarong modung-aw gikan sa langit.

Ang Ginoo naghisgot og kalinaw ngadto sa iyang katawhan.

Ang Ginoo mohatag sa iyang mga kaayohan; ug ang atong yuta mohatag sa iyang abot. Ang katarong maglakaw sa iyang atubangan, ug ang kaluwasan diha sa iyang pagaagian.

Ang Ginoo naghisgot og kalinaw ngadto sa iyang katawhan.

PAGBASA SA SANTOS NGA EBANGHELYO SUMALA NI SAN LUKAS

Lk. 12: 35-38

Si Jesus miingon sa iyang mga tinun-an: "Pag-andam kamo sa bisan unsay modangat, baksig hugot ang inyong mga bisti diha sa hawak ug dagkoti ang inyong mga suga, samag mga sulugoon nga naghulat sa pagbalik sa ilang agalon gikan sa kombira sa kasal. Inig-abot niya ug inig tuktok, ablihan dayon nila ang pultahan. Bulahan kadtong mga sulugoon nga makaplagan sa ilang agalon nga nagtukaw ug nag-andam! Sultihan ko kamo nga magbakos siya, palingkoron sila sa kan-anan ug silbihan niya. Ug bulahan sila kon hikaplagan niya nga andam, bisan kon moabot siya sa tungang gabii, o kaadlawon na!"