Lunes sa Ikakawhaa'g Siyam nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-EFESO

Eph. 2: 1-10

Kaniadto patay kamo tungod sa inyong pagkadautan ug pagkamakasasala. Gisunod ninyo ang dautang pagkinabuhi sa kalibutan ug ang pangulo sa mga kagamhanan diha sa kawanangan, ang espíritu nga maoy nagmando sa mga tawo nga misupil sa Dios. Kaniadto kitang tanan sama kanila, nagkinabuhi sumala sa tawhanong kailibgon ug sa mga pangandoy sa atong lawas ug hunahuna. Busa tungod sa atong tawhanong kinaiya gikapungtan usab kita sa Dios. Apan hilabihan kadako ang kaluoy ug gugma sa Dios alang kanato, nga bisan pa gani sa patay pa kita sa espíritu tungod sa atong pagkadautan, gibanhaw kita niya uban kang Cristo. Naluwas kamo tungod sa grasya sa Dios. Ug sa atong pagkahiusa kang Cristo Jesus gibanhaw kita niya uban kang Cristo aron maghari kita uban kaniya didto sa kalangitan. Gibuhat kini niya aron pagpakita alang sa umaabot nga mga panahon sa naghingapin niyang grasya diha sa gugma nga iyang gipakita kanato pinaagi kang Cristo Jesus. Kay pinaagi sa pagtuo naluwas kamo tungod sa grasya sa Dios. Dili kini inyong buhat kondili gasa sa Dios. Busa walay makapasigarbo niini sanglit dili man kini bunga sa inyong mga paningkamut. Kita mga binuhat sa Dios, ug gibuhat kita niya diha kang Cristo Jesus aron magbuhat kitag maayo nga maoy iyang tuyo alang kanato.

SALMO RESPONSORYO

Ps. 100: 2. 3. 4. 5

Gibuhat kita sa Ginoo, iyaha gayod kita.

Alagari nga malipayon ang Ginoo; duol kamo kaniya sa masadya nga awit.

Gibuhat kita sa Ginoo, iyaha gayod kita.

Sayri ninyo nga ang Ginoo Dios; siya ang nagbuhat kanato, kita iyaha gayod; ang iyang lungsod, ang panon nga iyang gidumala.

Gibuhat kita sa Ginoo, iyaha gayod kita.

Sulod nga mapasalamaton sa iyang mga ganghaan, sulod kamo sa iyang mga kahawanan uban sa pagdayeg.

Gibuhat kita sa Ginoo, iyaha gayod kita.

Pasalamati siya; dayga ang iyang ngalan, kay siya maayo; ang Ginoo, kansang kaluoy nagalungtad sa kahangturan, ug ang iyang kamatinud-anon, ngadto sa tanang kaliwatan.

Gibuhat kita sa Ginoo, iyaha gayod kita.

PAGBASA SA SANTOS NGA EBANGHELYO SUMALA NI SAN LUKAS

Lk. 12: 13-21

Unya may usa ka tawo didto sa pundok nga miingon kaniya, "Magtutudlo, sultihi ang akong igsuon nga bahinan unta ako niya sa katigayonan nga gibilin kanamo sa among amahan." Si Jesus mitubag kaniya, "Ondo, kinsa may naghatag kanakog katungod sa paghusay o pagbahin sa katigayonan tali kaninyong duha?" Ug mipadayon siya pagsulti kanilang tanan, "Pagbantay kamo ug likayi ninyo ang bisan unsang kahakog, kay ang tinuod nga kinabuhi sa tawo wala diha sa mga butang nga iyang gihuptan, bisan unsa pa siya kadato." Unya misugilon si Jesus kanila niining sambingaya: "Dihay usa ka dato nga may yuta nga maayog abot. Namalandong siya, 'Wala na akoy kabutangan sa tanang kong abot. Unsa may angay kong buhaton? Ah, kini mao ang akong buhaton,' miingon siya sa iyang kaugalingon; 'gub-on ko ang akong kamalig ug magtukod ako og labi pang dako, diin akong tigumon unya ang abot ug ang uban kong mga kabtangan.' Unya moingon ako sa akong kaugalingon: 'Pagkapalaran nimo, Ondo! Anaa na kanimo ang tanang mga butang nga imong gikinahanglan alang sa daghang katuigan. Pagpahayahay na lang, kaon, inom, ug paglipay!' Apan ang Dios miingon kaniya, 'Oy, buang! Niini gayong gabhiona ikaw mamatay; unya kinsa may makapanag-iya nianang tanang butang nga imong gitigom alang sa imong kaugalingon?'" Ug mitapos si Jesus pag-ingon, "Mao kini ang mahitabo kanila nga magtigom og mga bahandi alang sa ilang kaugalingon apan dili dato sa atubangan sa Dios."