Ikakawhaa'g Siyam nga Domingo sa Ordinaryong Panahon

PAGBASA GIKAN SA BASAHON NI PROPETA ISAIAS

Is. 45: 1. 4-6

Mao kini ang giingon sa Ginoo kang Ciro nga iyang pinili ug iyang gipadala aron pagbuntog sa kanasuran ug pagpukan sa mga hari, pag-abli sa mga ganghaan ug dili na kini sirhan. Tungod sa akong alagad nga si Jacob, ug kang Israel na akong pinili gihatagan ko ikaw og dakong dungog, bisan pag wala ka makaila kanako. "Ako mao ang Ginoo, wala nay lain, walay Dios gawas kanako; gilig-on ko ikaw, bisan pag wala ka makaila kanako, aron ang katawhan, sukad sa sidlakan hangtod sa kasadpan, masayod nga walay laing gawas kanako; ako mao ang Ginoo, ug wala nay lain."

SALMO RESPONSORYO

Ps. 96: 1. 3. 4-5. 7-8. 9-10

Tagaig himaya ug dungog ang Ginoo.

Awiti ang Ginoo og usa ka bag-ong awit; awiti ang Ginoo, kamong tanang kayutaan. Isangyaw ang iyang himaya diha sa kanasuran; diha sa tanang katawhan, ang iyang katingalahang mga buhat.

Tagaig himaya ug dungog ang Ginoo.

Kay dako ang Ginoo ug angay gayod nga daygon; makataha siya, labaw sa tanang mga dios. Kay ang tanang mga dios sa kanasuran kawang, apan ang Ginoo nagbuhat sa kalangitan.

Tagaig himaya ug dungog ang Ginoo.

Hatagi ang Ginoo, kamong mga banay sa kanasuran, hatagi ang Ginoo sa himaya ug pagdayeg; hatagi ang Ginoo og himaya angay sa iyang ngalan. Pagdalag mga gasa, ug sulod sa iyang kahawanan.

Tagaig himaya ug dungog ang Ginoo.

Simbaha ang Ginoo diha sa balaan nga saput; pangurog kamo sa iyang atubangan, kamong tanang kayutaan; Ingna diha sa kanasuran; Ang Ginoo Hari, nagamando siya nga matarong sa katawhan.

Tagaig himaya ug dungog ang Ginoo.

PAGBASA GIKAN SA UNANG SULAT NI SAN PABLO NGADTO SA TAGA TESALONICA

1 Thes. 1: 1-5

Gikan ni Pablo, ni Silas ug ni Timoteo—Alang sa simbahan sa Tesalonica nga iya sa Dios nga Amahan ug sa Ginoong Jesucristo: Mabatonan unta ninyo ang grasya ug ang kalinaw sa Dios. Sa kanunay nag-ampo kami alang kaninyo ug nagpasalamat sa Dios tungod kaninyong tanan. Sa among pag-ampo sa atong Dios ug Amahan wala namo hikalimti paghisgot ang inyong pagtuo nga gipakita ninyo, ug ang inyong kakugi nga dinasig sa gugma, ingon man inyong lig-ong paglaum sa atong Ginoong Jesucristo. Mga igsuon, nasayod kami nga ang Dios nahigugma kaninyo ug gipili kamo niya aron maiya. Kay nagwali kami sa Maayong Balita dili sa pulong lamang kondili sa gahom sa Espiritu Santo. Hugot ang among pagtuo nga kini matuod gayod. Nasayod kamo giunsa namo pagkinabuhi samtang kami uban pa kaninyo tungod lamang sa inyong kaayohan.

PAGBASA SA SANTOS NGA EBANGHELYO SUMALA NI SAN MATEO

Mt. 22: 15-21

Ang mga Pariseo nanlakaw ug naglaraw sa pagbitik kang Jesus pinaagig mga pangutana. Unya gipadala nila ngadto kang Jesus ang pipila sa ilang mga tinun-an ug pipila ka mga sakop sa pundok ni Herodes. "Magtutudlo," miingon sila, "nasayod kami nga dili ka mamakak; nagtudlo ka sa matuod bahin sa pagbuot sa Dios alang sa tawo, sa walay pagpanumbaling sa gihunahuna sa mga tawo, kay wala ka man magtagad sa ilang panagway. Busa sultihi kami kon unsa ang imong hunahuna: supak ba sa atong Balaod ang pagbayad ug buhis ngadto sa Emperador sa Roma, o dili ba?" Apan nasayod si Jesus sa ilang dautang laraw, busa miingon siya, "Mga tigpakaaron-ingnon! Nganong inyo man gayod akong bitkon? Pakit-a ako ninyo sa kuwarta nga ibayad sa buhis!" Ug gipakita nila ang kuwarta, ug nangutana siya kanila, "Kinsa mang nawong ug ngalan kining nakulit dinhi?" "Sa Emperador," mitubag sila. Busa si Jesus miingon kanila, "Kon mao kana, ihatag ngadto sa Emperador ang iya sa Emperador, ug ngadto sa Dios ang iya sa Dios."