[M] San Ignacio sa Antioquia, obispo ug martir

PAGBASA GIKAN SA SULAT NI SAN PABLO NGADTO SA TAGA-EFESO

Eph. 1: 15-23

Mga igsuon: Sukad sa pagkadungog ko nga mituo kamo sa Ginoong Jesus ug nahigugma sa tanang katawhan sa Dios, wala akoy hunong sa pagpasalamat sa Dios tungod kaninyo. Gihinumdoman ko kamo sa akong mga pag-ampo, ug naghangyo ako sa Dios sa atong Ginoong Jesucristo, ang gamhanang Amahan, nga hatagan unta kamo sa Espiritu nga maghimo kaninyong maalamon ug magpadayag sa Dios kaninyo aron makaila kamo kaniya. Naghangyo usab ako nga malamdagan unta ang inyong salabotan aron masayod kamo unsa ang paglaum nga alang niini gitawag kamo. Ug hinaot usab unta nga masayod kamo sa kahupong sa mga panalangin nga gisaad niya sa iyang katawhan. Dugang pa niini, gipanghinaot ko nga masayran ninyo ang kadako sa iyang gahom nga ania kanato mao ang gigamit niya pagbanhaw kang Cristo, ug pagpalingkod kaniya sa iyang tuo didto sa langit. Didto naghari si Cristo labaw sa tanang mga hari, ug sa mga anaa sa gahom ug sa mga punoan ingon man sa mga kaginoohan; labaw siya sa tanan bisan unsa pa ang ilang katungdanan niining kalibotana ug sa sunod. Gibutang sa Dios ang tanan ubos sa pagmando ni Cristo, ug alang sa simbahan gihimo siyang pangulo nga labaw sa tanan. Ang simbahan mao ang lawas ni Cristo, ang kahingpitan niya nga mao ang naghingpit sa tanang butang.

SALMO RESPONSORYO

Ps. 8: 2-3. 4-5. 6-7

Gihatag mo sa imong anak ang gahom ibabaw sa tanan mong binuhat.

O Ginoo, among Ginoo, pagkamahimayaon sa imong ngalan ibabaw sa tibuok kalibotan. Gibayaw mo ang imong kahalangdon ibabaw sa kalangitan. Gikan sa mga ba-ba sa mga kabataan ug masuso gihimo mo ang kadayganan tungod sa imong mga kaaway.

Gihatag mo sa imong anak ang gahom ibabaw sa tanan mong binuhat.

Sa pagtan-aw ko sa imong kalangitan, ang buhat sa imong mga tudlo, ang buwan ug ang kabitoonan nga imong gipahiluna. Unsa ba ang tawo nga nanumbaling ka man kaniya? O ang anak sa tawo nga nagtagad ka man kaniya?

Gihatag mo sa imong anak ang gahom ibabaw sa tanan mong binuhat.

Imo siyang gibuhat nga ubos lamang og diyutay sa mga anghel, ug gipurongpurongan mo siya sa himaya ug kadungganan. Gihatagan mo siya sa pagmando sa mga buhat sa imong mga kamut, gibutang mo ang tanang butang ubos sa iyang tiilan.

Gihatag mo sa imong anak ang gahom ibabaw sa tanan mong binuhat.

PAGBASA SA SANTOS NGA EBANGHELYO SUMALA NI SAN LUKAS

Lk. 12: 8-12

Si Jesus miingon sa iyang mga tinun-an: "Sultihan ko kamo: bisan kinsay magsugid atubangan sa katawhan nga siya akoa, mao usab ang buhaton kaniya sa Anak sa Tawo atubangan sa mga anghel sa Dios; apan bisan kinsay maglimod atubangan sa katawhan nga siya akoa, ilimod usab siya sa Anak sa Tawo atubangan sa mga anghel sa Dios." "Bisan kinsay magsultig daotan batok sa Anak sa Tawo pasayluon: apan ang magsultig daotan batok sa Espiritu Santo dili gayod pasayluon." "Kon ikiha kamo nila didto sa mga sinagoga, o atubangan sa mga governador o mga pangulo, ayaw kamo kaguol kon unsaon ninyo pagpangatarungan o unsay inyong isulti. Kay tudloan kamo sa Espiritu Santo niadtong panahona unsay angay ninyong isulti."