Biyernes sa Ikakawhaa'g Walo nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-EFESO

Eph. 1: 11-14

Mga igsuon: Gibuhat ang tanang butang sumala sa laraw ug pagbuot sa Dios, ug diha kang Cristo gipili kita sa Dios aron maiyang katawhan sumala sa iyang tuyo sukad pa sa sinugdan. Ug maoy iyang pagbuot nga kita, nga maoy unang nagsalig kang Cristo, magdayeg sa himaya sa Dios. Mao usab ang mahitungod kaninyo: sa pagkadungog ninyo sa matuod nga mensahe sa Maayong Balita nga naghatag kaninyog kaluwasan, mituo kamo kang Cristo. Busa gipatikan kamo sa Dios pinaagi sa paghatag kaninyo sa Espiritu Santo nga iyang gisaad, timaan nga kamo iya na. Ang Espritu mao ang garantiya nga makadawat kita sa gisaad sa Dios sa iyang katawhan, ug nagpasalig kanato nga mohatag ang Dios og hingpit nga kagawasan kanila nga mga iya. Daygon ta ang iyang himaya.

SALMO RESPONSORYO

Ps. 33: 1-2. 4-5. 12-13

Bulahan ang katawhan nga gipili sa Ginoo aron maiyaha.

Pagsadya, kamong mga matarong, diha sa Ginoo; ang pagdayeg sibo gikan sa matarong. Pasalamati ang Ginoo diha sa alpa; sa lira nga napulog koldas, awita ang iyang mga pagdayeg.

Bulahan ang katawhan nga gipili sa Ginoo aron maiyaha.

Kay matarong ug ang tanan niyang mga buhat kasaligan. Mahigugma siya sa husto ug matarong; sa kaluoy sa Ginoo napuno ang yuta.

Bulahan ang katawhan nga gipili sa Ginoo aron maiyaha.

Bulahan ang nasod kansang Dios mao ang Ginoo, ang katawhan nga iyang gipili alang sa iyang kaugalingong kabilin. Gikan sa langit midung-aw ang Ginoo; nagatan-aw siya sa tanang katawhan.

Bulahan ang katawhan nga gipili sa Ginoo aron maiyaha.

PAGBASA SA SANTOS NGA EBANGHELYO SUMALA NI SAN LUKAS

Lk. 12: 1-7

Sa diha nga linibo ang mga tawo nga nagpunsisok kaniya ug tungod niini nagtinumbanay na sila, miingon si Jesus pag-una sa iyang mga tinun-an, "Pagbantay kamo sa igpapatubo sa pan sa mga Pariseo nga mao ang pagpakaaron-ingnon. Bisan unsay gitabonan madayag, ug ang tanang tinagoan mabutyag. Busa bisan unsay inyong gisulti didto sa ngitngit madungog diha sa hayag, ug bisan unsay inyong gihunghong didto sa tinakpan nga lawak, isinggit didto sa mga atop sa kabalayan." "Sultihan ko kamo, mga higala, ayaw kamo kahadlok kanila nga makapatay sa lawas apan wala nay laing mahimo. Tug-anan ko kamo kinsa ang angay ninyong kahadlokan: kahadloki ang Dios nga human mopatay, may gahom sa pagtambog ngadto sa impiyerno. Oo, kahadloki gayod ninyo siya!" "Dili ba ang lima ka gagmayng langgam ibaligya man lang og duha ka dako? Apan walay usa kanila nga hikalimtan sa Dios. Bisan gani ang tanang buhok sa inyong ulo giihap niya. Busa ayaw kamo kahadlok; labaw pa kaayo kamog bili kay sa daghang mga gagmayng langgam!"