[M] Santa Teresa sa Avila, birhen ug doktor sa Simbahan

PAGBASA GIKAN SA SULAT NI SAN PABLO NGADTO SA TAGA-EFESO

Eph. 1: 1-10

Gikan kang Pablo, apostol ni Cristo Jesus tungod sa kabubut-on sa Dios. Alang sa katawhan sa Dios nga nagpuyo sa Efeso, nga matinumanon kang Cristo Jesus: Ang Dios nga atong Amahan ug ang Ginoong Jesucristo maghatag unta kaninyo sa grasya ug kalinaw. Magpasalamat kita sa Dios ug Amahan sa atong Ginoong Jesucristo nga nagpanalangin kanato sa tanang espirituhanong gasa sa langit diha sa atong pagkahiusa kang Cristo. Sa wala pa buhata ang kalibotan gipili na kita sa Dios aron maiya diha ni Cristo, aron mabalaan kita ug mawalay sala sa iyang atubangan. Tungod sa iyang gugma, daan nang gibut-an sa Dios nga sagupon niya kita nga mga anak pinaagi ni Jesucristo mao kini ang iyang gikahimut-an ug tuyo. Daygon nato ang Dios tungod sa iyang labihang pagtagad kanato pinaagi sa iyang hinigugmang Anak! Kay naluwas kita tungod sa kamatayon ni Cristo, sa ato pa, napasaylo na ang atong mga sala. Pagkadako sa grasya sa Dios, nga sa walay sukod gihatag niya kanato! Sa tanan niyang kaalam og kahibalo, gipadayag sa Dios kanato ang tinagoang laraw nga iya nang gibut-an nga tumanon pinaagi ni Cristo. Ang laraw sa Dios nga tumanon niya inig-abot na sa hustong panahon mao ang paghiusa sa tanang binuhat diha sa langit ug sa yuta ubos sa pagpangulo ni Cristo.

SALMO RESPONSORYO

Ps. 98: 1-2. 3-4. 5-6

Ang Ginoo nagpahibalo sa iyang kaluwasan.

Awiti ang Ginoo og bag-ong awit, kay naghimo siya ug katingalahang mga buhat; Ang iyang tuong kamut nakadangat og kadaugan alang kaniya, ang iyang balaan nga bukton.

Ang Ginoo nagpahibalo sa iyang kaluwasan.

Ang Ginoo nagpahibalo sa iyang kaluwasan; sa atubangan sa kanasuran iyang gipahayag ang iyang katarong. Nahinumdom siya sa iyang kaluoy ug sa iyang kamatinud-anon alang sa balay ni Israel.

Ang Ginoo nagpahibalo sa iyang kaluwasan.

Ang tanang kautlanan sa yuta nakakita, sa kaluwasan nga gihimo sa atong Dios. Awiti nga malipayon ang Ginoo, kamong tanang kayutaan; singgit kamog awit, pag-awit kamog pagdayeg.

Ang Ginoo nagpahibalo sa iyang kaluwasan.

Awitig pagdayeg ang Ginoo uban sa alpa, ug sa mananoy nga awit, uban sa mga trompeta ug sa tingog sa budyong pag-awit nga malipayon atubangan sa Hari, ang Ginoo.

Ang Ginoo nagpahibalo sa iyang kaluwasan.

PAGBASA SA SANTOS NGA EBANGHELYO SUMALA NI SAN LUKAS

Lk. 11: 47-54

Si Jesus miingon, "Pagkaalaut ninyo! Nagbuhat kamo og nindot nga mga lubnganan alang sa mga propeta, ang mga propeta nga gipatay sa inyong mga katigulangan. Sa ingon niini kamo mismo miangkon nga kamo miuyon sa gibuhat sa inyong mga katigulangan; kay sila maoy nagpatay sa mga propeta ug kamo ang nagbuhat sa ilang mga lubnganan. Tungod niini ang Kaalam sa Dios nag-ingon, 'Padad-an ko silag mga propeta ug mga sinugo, ug ilang patyon ang uban ug ang uban ilang lutoson'. Busa silotan ang mga tawo niining panahona tungod sa ilang pagpatay sa tanang mga propeta sukad pa sa pagbuhat sa kalibutan, gikan sa pagbuno kang Abel ngadto sa pagbuno kang Zacarias, nga gipatay tungatunga sa halaran ug sa balaan nga dapit. Oo, sultihan ko kamo, silotan ang mga tawo niining panahona tungod kanilang tanan!" "Pagkaalaut ninyong mga magtutudlo sa Balaod! Gitipigan ninyo ang yawi nga maoy moabli sa pultahan sa balay sa kahibalo, apan kamo mismo dili mosulod ug gisanta ninyo ang buot mosulod niini!" Sa pagbiya ni Jesus niadtong dapita, gisaway siya pag-ayo sa mga magtutudlo sa Balaod ug sa mga Pariseo ug nangutana sila kaniya mahitungod sa daghang mga butang. Gisulayan nila siya paglit-ag aron hisakpan siya nga nasayop sa iyang gisulti.