Miyerkoles sa Ikakawhaa'g Walo nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-GALACIA

Gal. 5: 18-25

Kon ang espiritu maoy nagmando kaninyo, dili na kamo sa ilalom sa Balaod. Sayon kaayo pag-ila sa buhat niadtong nagsunod sa tawhanong kinaiya. Makita kini diha sa malaw-ay, hugaw ug hilas nga mga buhat, ingon man sa pagsimba sa mga diosdios ug sa pagpamarang. Makita usab kini sa pagdinumtanay, pagbingkilbingkil, sa kasina, sa kapungot, sa kahakog, sa pagkabahinbahin, pagkamasinahon, pagkapalahubog, pagkamapatuyangon sa lawasnong pangandoy, ug uban pang mga butang nga sama niini. Busa pasidan-an ko kamo karon sama sa akong gihimo kaniadto: ang mga buhat niining mga butang walay dapit sa Gingharian sa Dios. Apan ang Espiritu naghatag sa gugma, kalipay, kalinaw, pailob, kaluoy, kaayo, pagkamaninatud-on, pagkamapaubsanon ug pagkamapinugnganon sa kaugalingon. Kining mga butanga wala mahisupak sa bisan unsang balaod. Ang mga tawhanong kailibgon ug mga pangandoy gilansang na sa krus sa mga tawo nga iya na ni Cristo Jesus. Ang Espiritu maoy naghatag kanato ug kinabuhi, busa siya usab ang paharion nato sa atong kinabuhi.

SALMO RESPONSORYO

Ps. 1: 1-2. 3. 4. 5

Ang magsunod kanimo, O Ginoo, makabaton sa kahayag sa kinabuhi.

Bulahan ang tawo nga wala magsunod sa tambag sa dautan ni maglakaw sa dalan sa mga makasasala, ni makig-uban sa mga walay ulaw, kondili nalipay pagpalandong sa balaod sa Ginoo sa adlaw ug sa gabii.

Ang magsunod kanimo, O Ginoo, makabaton sa kahayag sa kinabuhi.

Sama siya sa usa ka kahoy nga gitanum duol sa masulog nga tubig, nga nagahatag sa iyang bunga sa tingbunga, ug ang iyang dahon dili gayod malarag. (Bisag unsay iyang buhaton molampos).

Ang magsunod kanimo, O Ginoo, makabaton sa kahayag sa kinabuhi.

Dili ingon niini ang dautan, dili gayod; sama sila sa tahop nga paliron sa hangin. Kay ang Ginoo nagabantay sa dalan sa matarong, apan nagalaglag sa dalan sa dautan.

Ang magsunod kanimo, O Ginoo, makabaton sa kahayag sa kinabuhi.

PAGBASA SA SANTOS NGA EBANGHELYO SUMALA NI SAN LUKAS

Lk. 11: 42-46

Si Jesus miingon, "Pagkaalaut ninyong mga Pariseo! Naghatag kamo ngadto sa Dios sa ikapulo ka bahin sa mga lamas, ingon sa herbabuyna ug kaningag ug uban pang utanon, apan nagpasagad kamo sa hustisya ug sa gugma sa Dios. Kining mga butanga kinahanglan inyong buhaton sa walay pagpasagad sa uban." "Pagkaalaut ninyong mga Pariseo! Gusto kamo sa espesyal nga mga lingkoranan sulod sa mga sinagoga, ug nga yukboan kamo didto sa mga merkado. Pagkaalaut gayod ninyo! Sama kamo sa mga lubong nga walay timaan, nga wala lamang hibaloi sa mga tawo nga ila diayng gitamakan." Unya usa sa mga magtutudlo sa Balaod miingon kaniya, "Magtutudlo, sa pagsulti mo niini imo usab kaming gipakaulawan!" Si Jesus mitubag, "Pagkaalaut usab ninyong mga magtutudlo sa Balaod! Gipapas-an ninyo ang mga tawo ug makabuktot nga palas-anon, apan kamo mismo dili gani mohikap niini bisan sa usa ka tudlo ninyo aron pagtabang kanila sa pagpas-an sa maong karga."