Martes sa Ikakawhaa'g Walo nga Semana sa Ordinaryong Panahon
PAGBASA GIKAN SA SULAT NI SAN PABLO NGADTO SA TAGA-GALACIA
Gal. 5: 1-6
May kagawasan kita tungod kay gihatagan man kitag kagawasan ni Cristo. Busa pabilin kamo nga dili ulipon ug ayaw kamo paulipon pag-usab. Ako, si Pablo, mag-ingon kaninyo nga kon magpatuli kamo, kini nagpasabot nga si Cristo walay kapuslanan alang kaninyo. Pahimangnoan ug ingnon ko kamo pag-usab nga kadtong magpatuli kinahanglan nga magtuman sa tibuok Balaod. Kamo nga naningkamot nga isipon sa Dios nga matarong pinaagi sa pagtuman sa Balaod nahimulag hinoon kang Cristo ug sa grasya sa Dios. Apan alang kanato naglaum kita nga pinaagi sa espiritu, ang Dios mag-isip kanato nga matarong tungod sa pagtuo. Kay kon nahiusa kita kang Cristo Jesus, dili hinungdanon ang pagkatinuli o dili tinuli; ang importante mao ang pagtuo nga nagbuhat pinaagi sa gugma.
ANG PULONG SA GINOO
SALMO RESPONSORYO
Ps. 119: 41. 43. 44. 45. 47. 48
Padangata kanako ang imong mahigugmaong kaluoy, Ginoo.
O Ginoo, padangata kanako ang imong kaluoy, ang imong kaluwasan sumala sa imong gisaad.
Padangata kanako ang imong mahigugmaong kaluoy, Ginoo.
Ayaw pagkuhaa ang pulong sa kamatuoran gikan sa akong ba-ba kay sa imong mga sugo anaa ang akong kalauman.
Padangata kanako ang imong mahigugmaong kaluoy, Ginoo.
Ug bantayan ko ang imong balaod sa kanunay, hangtod sa kahangturan.
Padangata kanako ang imong mahigugmaong kaluoy, Ginoo.
Ug maglakaw ako diha sa kagawasan, tungod kay nangita ako sa imong kasugoan.
Padangata kanako ang imong mahigugmaong kaluoy, Ginoo.
Ug maglipay ako diha sa imong mga sugo, nga akong gihigugma.
Padangata kanako ang imong mahigugmaong kaluoy, Ginoo.
Ug ibayaw ko ang akong mga kamut ngadto sa imong kasugoan ug palandongon ko ang imong mga gimbut-an.
Padangata kanako ang imong mahigugmaong kaluoy, Ginoo.
PAGBASA SA SANTOS NGA EBANGHELYO SUMALA NI SAN LUKAS
Lk. 11: 37-41
Niadtong panahona sa nahuman na si Jesus ug sulti, may usa ka Pariseo nga midapit kaniya sa pagpangaon; busa miadto siya ug nakigsalo kaniya. Natingala ang Pariseo sa pagkamatikod niya nga wala manghunaw si Jesus sa wala pa mokaon. Tungod niini miingon ang Ginoo kaniya, "Kamong mga Pariseo naghinlo sa gawas nga bahin sa tasa ug plato, apan sa sulod ninyo puno kamo sa panikas ug kadautan. Mga buang! Dili ba ang Dios nga maoy nagbuhat sa gawas nga bahin mao usab ang ang nagbuhat sa sulod? Apan ihatag ang anaa sa inyong mga tasa ug plato ngadto sa mga kabus, ug mamahinlo ang tanan alang kaninyo."
ANG EBANGHELYO SA GINOO
