Lunes sa Ikakawhaa'g Walo nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-GALACIA

Gal. 4: 22-24. 26-27. 31 - 5: 1

Ang Kasulatan nag-asoy nga si Abraham may duha ka anak nga lalaki, ang usa anak sa ulipon nga babaye ug ang usa anak sa babaye nga dili ulipon. Ang iyang anak sa ulipon nga babaye natawo sa naandan nga paagi, apan ang iyang anak sa babaye nga dili ulipon bunga sa saad sa Dios. Mahimo nga sabton kini nga usa ka sambingay: ang duha ka babaye mao ang duha ka kasabutan: ang usa si Agar, ang gikan sa bukid sa Sinai, ug ang iyang anak natawo nga mga ulipon. Apan ang langitnong Jerusalem dili ulipon, ug siya mao ang atong inahan. Kay ang Kasulatan nag-ingon: "Pagmalipayon, babaye nga wala makabaton ug anak! Singgit tungod sa kalipay ikaw nga wala makasinati sa kasakit sa pag-anak! Kay ang babaye nga biniyaan manganak pag mas daghan kay sa babaye nga may bana." Busa, mga igsuon, dili kita mga anak sa babayeng ulipon, kondili sa babaye nga dili ulipon. May kagawasan kita tungod kay gihatagan man kitag kagawasan ni Cristo. Busa pabilin kamo nga dili ulipon ug ayaw kamo paulipon pag-usab.

SALMO RESPONSORYO

Ps. 113: 1-2. 3-4. 5. 6-7

Daygon ang ngalan sa Ginoo hangtod sa kahangturan.

Aleluya, aleluya.

Dayga, kamong mga sulugoon sa Ginoo, dayga ang ngalan sa Ginoo. Daygon unta ang ngalan sa Ginoo karon ug hangtod sa kahangturan.

Daygon ang ngalan sa Ginoo hangtod sa kahangturan.

Aleluya, aleluya.

Gikan sa pagsubang hangtod sa pagsalop sa adlaw daygon unta ang ngalan sa Ginoo. Labaw sa tanang kanasuran mao ang Ginoo; labaw sa kalangitan ang iyang himaya.

Daygon ang ngalan sa Ginoo hangtod sa kahangturan.

Aleluya, aleluya.

Kinsay sama sa Ginoo, atong Dios, nga gipalingkod sa trono sa kahitas-an ug nagadung-aw sa langit ug sa yuta nga anaa sa ubos? Gibayaw niya ang ubos gikan sa abog; gikan sa kalapukan iyang gialsa ang kabus.

Daygon ang ngalan sa Ginoo hangtod sa kahangturan.

Aleluya, aleluya.

PAGBASA SA SANTOS NGA EBANGHELYO SUMALA NI SAN LUKAS

Lk. 11: 29-32

Samtang nagpunsisok ang mga tawo libot ni Jesus, mipadayon siya pagsulti, "Pagkadaotan gayod sa katawhan niining panahona! Nangayo silag usa ka milagro nga ilhanan sa pag-uyon sa Dios, apan walay ihatag kanila gawas niadtong milagro nga nahitabo kang Jonas. Ingon nga si Jonas maoy usa ka ilhanan alang sa mga tawo sa Ninibe, ang Anak sa Tawo usab maoy mahimong ilhanan alang sa mga tawo niining panahona. Sa adlaw sa Paghukom ang Rayna sa Habagatan mobangon ug mosudya sa mga tawo niining panahona, kay mipanaw siyag katunga sa kalibutan aron lang pagpamati sa makinaadmanong mga pagtulon-an ni Salomon; ug hibaloi nga dinhi aniay labaw pa kang Salomon. Sa adlaw sa Paghukom ang mga tawo sa Ninibe mamangon ug mosudya kaninyo, kay naghinulsol man sila sa ilang mga sala sa pagkabati nila sa wali ni Jonas; ug hibaloi nga dinhi aniay labaw pa kang Jonas!"