Ikakawhaa'g Walo nga Domingo sa Ordinaryong Panahon
Indigenous People's Sunday
Extreme Poverty Day
PAGBASA GIKAN SA BASAHON NI PROPETA ISAIAS
Is. 25: 6-10
Niining bukira himoon sa Ginoo nga Labing Gamhanan alang sa tanang katawhan ang usa ka kombira sa mga lamiang pagkaon, ug labing maayong bino. Ug langkaton niya ang panganod sa kagul-anan nga nagpandong sa kanasuran. Wagtangon sa Ginoong Dios ang kamatayon, ug pahiran ang mga luha, ug papason niya ang kaulaw sa iyang katawhan; mao kini ang gisulti sa Ginoo. Ikaingon niadtong adlawa, "Siya mao ang atong Dios nga atong gilaoman nga maoy moluwas kanato. Siya ang atong gipaabot; maglipay kita sa iyang pagluwas kanato." Kay dinhi niining bukira magpabilin ang gahom sa Ginoo, apan tunob-tunoban ang Moab, ingon sa uhot nga tunobtunoban diha sa tai.
ANG PULONG SA GINOO
SALMO RESPONSORYO
Ps. 23: 1-3. 3-4. 5. 6
Magbalantay kanako ang Ginoo wala nay magmakulang pa kanako.
Magbalantay kanako ang Ginoo, wala nay magmakulang pa kanako. Sa lunhaw nga sibsibanan iya ako nga gipapahulay; sa daplin sa malinaw nga tubig iya akong gidala; iyang gihupay ang akong kalag.
Magbalantay kanako ang Ginoo wala nay magmakulang pa kanako.
Iya ako nga gitultolan sa matarong nga mga agianan tungod sa iya nga ngalan. Bisan kon magalakaw ako sa walog nga mangitngit wala akoy kahadlokan nga dautan; Kay anaa ka man sa akong kiliran sa imong igbubugaw og sungkod gihatagan mo ako og kaisog.
Magbalantay kanako ang Ginoo wala nay magmakulang pa kanako.
Gihikyaran mo ako og lamesa sa akong atubangan samtang nagatan-aw ang akong mga kaaway; Gidihogan mo ang akong ulo og lana; nagaawas gayod ang akong kopa.
Magbalantay kanako ang Ginoo wala nay magmakulang pa kanako.
Ang kaayo lamang ug kaluoy maoy nagasunod kanako, sa tanang mga adlaw sa akong kinabuhi; Ug magpuyo ako sa balay sa Ginoo sa mga katuigan sa katuigan.
Magbalantay kanako ang Ginoo wala nay magmakulang pa kanako.
PAGBASA GIKAN SA SULAT NI SAN PABLO NGADTO SA TAGA-FILIPOS
Phil. 4: 12-14. 19-20
Mga igsuon: Nasinati ko ang pagpuyo diha sa kawad-on ug kahamugaway. Nakakat-on na ako niining paagiha sa pagkinabuhi bisan diin ug bisan kanus-a, busog ako kun gigutom, hamugaway kun nagkalisodlisod. May kalig-on ako sa pagsagubang sa tanan tungod sa gahom nga gihatag kanako ni Cristo. Apan dalaygon kamo tungod sa inyong pagtabang kanako sa akong mga kalisdanan. Ug ang akong Dios, uban sa naghingapin niyang bahandi diha kang Cristo Jesus, magsangkap sa tanan ninyong nga kinahanglan. Daygon ta ang atong Dios ug Amahan hangtod sa kahangturan. Amen.
ANG PULONG SA GINOO
PAGBASA SA SANTOS NGA EBANGHELYO SUMALA NI SAN MATEO
Mt. 22: 1-14 (TINAAS)
Migamit na usab si Jesus ug mga sambingay sa iyang pagpakigsulti sa mga tawo. "Ang Gingharian sa Langit sama sa usa ka hari nga naghikay ug usa ka kombira sa kasal alang sa iyang anak nga lalaki. Gisugo niya ang iyang mga sulugoon aron pagpahibalo sa mga dinapit nga paadtoon na sila sa kombira, apan mibalibad ang mga dinapit. Busa nagsugo siyag laing mga sulugoon ug giingnan niya, 'Sultihi ninyo ang mga dinapit nga andam na ang kombira; giihaw na ang akong mga baka ug ang mga pinatambok nga nati, ug nahikay na ang tanan. Pangari na kamo sa kombira sa kasal!' Apan wala magtagad ang mga dinapit, ug nagpadayon sila sa ilang mga buluhaton: ang usa miadto sa iyang uma, ang usa sa iyang tindahan, samtang ang uban midakop sa mga sulugoon, ug gibunalan ug gipatay nila. Tungod niini nasuko pag-ayo ang hari, ug gipadala niya ang iyang mga sundalo ug gipamatay kadtong mga mamumuno, ug gisunog ang ilang siyudad. Unya gitawag niya ang iyang mga sulugoon ug giingnan, 'Andam na ang akong kombira sa kasal, apan dili angay niini ang mga tawo nga akong gidapit. Busa pangadto kamo sa kadalanan ug dapita ang tanan nga inyong makaplagan.' Ug ang mga sulugoon nangadto sa kadalanan ug gidala nila ang tanan nga ilang nakaplagan, maayo ug dautan, ug napuno sa mga tawo nga dapit nga gikombirahan." "Unya misulod ang hari aron pagtan-aw sa mga dinapit, ug nakita niya ang usa ka tawo nga wala magsul-ob ug bisti sa kasal. Gipangutana siya sa hari, 'Higala, giunsa man nimo pagsulod dinhi nga wala ka man magsul-ob sa bisti sa kasal?' Apan wala motingog ang tawo. Unya miingon ang hari sa iyang mga sulugoon. 'Gapusa ninyo ang iyang mga kamut ug tiil ug ilabog siya ngadto sa kangitngitan sa gawas. Didto mag-hilak siya ug magkagot ang iyang mga ngipon.'" Ug gitapos ni Jesus ang sambingay sa pag-ingon, "Kay daghan ang gidapit, apan diyotay ra ang gipili."
ANG EBANGHELYO SA GINOO
PAGBASA SA SANTOS NGA EBANGHELYO SUMALA NI SAN MATEO
Mt. 22: 1-10 (MINUBO)
Migamit na usab si Jesus ug mga sambingay sa iyang pagpakigsulti sa mga tawo. "Ang Gingharian sa Langit sama sa usa ka hari nga naghikay ug usa ka kombira sa kasal alang sa iyang anak nga lalaki. Gisugo niya ang iyang mga sulugoon aron pagpahibalo sa mga dinapit nga paadtoon na sila sa kombira, apan mibalibad ang mga dinapit. Busa nagsugo siyag laing mga sulugoon ug giingnan niya, 'Sultihi ninyo ang mga dinapit nga andam na ang kombira; giihaw na ang akong mga baka ug ang mga pinatambok nga nati, ug nahikay na ang tanan. Pangari na kamo sa kombira sa kasal!' Apan wala magtagad ang mga dinapit, ug nagpadayon sila sa ilang mga buluhaton: ang usa miadto sa iyang uma, ang usa sa iyang tindahan, samtang ang uban midakop sa mga sulugoon, ug gibunalan ug gipatay nila. Tungod niini nasuko pag-ayo ang hari, ug gipadala niya ang iyang mga sundalo ug gipamatay kadtong mga mamumuno, ug gisunog ang ilang siyudad. Unya gitawag niya ang iyang mga sulugoon ug giingnan, 'Andam na ang akong kombira sa kasal, apan dili angay niini ang mga tawo nga akong gidapit. Busa pangadto kamo sa kadalanan ug dapita ang tanan nga inyong makaplagan.' Ug ang mga sulugoon nangadto sa kadalanan ug gidala nila ang tanan nga ilang nakaplagan, maayo ug dautan, ug napuno sa mga tawo nga dapit nga gikombirahan."
ANG EBANGHELYO SA GINOO
