Sabado sa Ikakawhaa'g Pito nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA MGA TAGA-GALACIA

Gal. 3: 22-29

Mga igsuon: Sumala sa Kasulatan, ang tibuok kalibotan nailalom sa gahom sa sala, aron ang motuo makadawat sa gasa nga gisaad nga ihatag pinasikad sa pagtuo kang Jesucristo. Sa wala pa moabot ang panahon sa pagtuo, gibilanggo kita sa Balaod hangtod nga ikapadayag kining maong pagtuo. Busa ang Balaod maoy nagdumala kanato hangtod sa pag-abot ni Cristo, aron maisip kita sa Dios nga matarong pinaagi sa pagtuo. Apan karon nga mao na ang panahon sa pagtuo, ang Balaod dili na maoy magdumala kanato. Pinaagi sa pagtuo kamong tanan nahimong mga anak sa Dios sa pagpakighiusa ninyo kang Cristo Jesus. Gibunyagan kamo aron mahiusa kang Cristo, ug busa nakaambit kamo sa kinaiya ni Cristo. Busa wala nay kalainan sa mga Judio ug sa mga dili Judio, sa mga ulipon ug sa mga dili ulipon, sa mga lalaki ug sa mga babaye; kay nahiusa na man kamong tanan kang Cristo Jesus. Kon kamo iya ni Cristo, nan mga kaliwat kamo ni Abraham, ug makadawat sa gisaad sa Dios.

SALMO RESPONSORYO

Ps. 105: 2-3. 4-5. 6-7

Ang Ginoo nahinumdom sa iyang kasabutan hangtod sa kahangturan.

Aleluya.

Awiti siya, awita ang iyang kadayganan, isangyaw ang tanan niyang katingalahang mga buhat. Himayaa ang iyang balaang ngalan; pagsadya kamo, O mga kasingkasing nga nangita sa Ginoo.

Ang Ginoo nahinumdom sa iyang kasabutan hangtod sa kahangturan.

Aleluya.

Paabota ang Ginoo diha sa iyang gahom; paningkamuti ang pag-alagad kaniya kanunay. Hinumdomi ang katingalahang mga buhat nga iyang nahimo, ang iyang mga kahibulongan, ug ang mga hukom nga iyang gibungat.

Ang Ginoo nahinumdom sa iyang kasabutan hangtod sa kahangturan.

Aleluya.

Kamong mga kaliwat ni Abraham, iyang mga sulugoon mga anak ni Jacob, iyang mga pinili. Siya, ang Ginoo, mao ang atong Dios sa tibuok yuta nagahari ang iyang mga hukom.

Ang Ginoo nahinumdom sa iyang kasabutan hangtod sa kahangturan.

Aleluya.

PAGBASA SA SANTOS NGA EBANGHELYO SUMALA NI SAN LUKAS

Lk. 11: 27-28

Human makasulti si Jesus niini, may usa ka babaye nga mituwaw taliwala sa pundok sa mga tawo ug miingon kaniya, "Bulahan ang babaye nga maoy nagsabak ug nagpasuso kanimo!" Apan si Jesus mitubag, "Bulahan hinoon sila nga namati sa pulong sa Dios ug nagtuman niini!"