Biyernes sa Ikakawhaa'g Pito nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-GALACIA

Gal. 3: 7-14

Busa angay kamong masayod nga ang mga tawo nga may pagtuo mao ang matuod nga mga kaliwat ni Abraham. Ang Kasulatan daan nang nag-ingon nga ang Dios mag-isip sa mga dili Judio nga matarong pinaagi sa pagtuo. Busa ang Kasulatan nagwali nang daan sa Maayong balita ngadto kang Abraham, sa pag-ingon: "Pinaagi kanimo ang Dios manalangin sa tanang katawhan sa kalibutan." Mituo si Abraham ug gipanalanginan siya; busa ang tanang mga motuo panalanginan usab. Tinunglo kadtong nagsalig sa Balaod; kay ang Kasulatan nag-ingon, "Tinunglo sa Dios ang dili kanunay magtuman sa tanang gisugo sa basahon sa Balaod." Busa claro kaayo nga walay tawo nga isipon sa Dios nga matarong pinaagi sa Balaod, kay ang Kasulatan nag-ingon man, "Ang giisip sa Dios nga matarong mabuhi pinaagi sa pagtuo." Apan ang Balaod wala mag-agad sa pagtuo. Hinonoa, ang Kasulatan nag-ingon, "Ang magtuman sa tanang gisugo sa Balaod mabuhi pinaagi niini." Apan giluwas kita ni Cristo sa tunglo sa Balaod pinaagi sa paghimo sa iyang kaugalingon nga tinunglo tungod kanato, kay sumala sa giingon sa Kasulatan, "Tinunglo sa Dios si bisan kinsa nga bitayon sa kahoy." Gihimo kini ni Cristo aron ang panalangin nga gisaad sa Dios ngadto kang Abraham ikahatag ngadto sa mga dili Judio pinaagi kang Cristo Jesus, aron kita makadawat sa Espiritu nga gisaad sa Sion pinaagi sa pagtuo.

SALMO RESPONSORYO

Ps. 111: 1-2. 3-4. 5-6

Ang Ginoo mahinumdom sa iyang kasabutan, hangtod sa kahangturan.

Pasalamatan ko ang Ginoo sa tibuok kong kasingkasing, kuyog ug diha sa pundok sa mga matarong, dako ang mga buhat sa Ginoo, malumo diha sa tanan nilang kamakalipay.

Ang Ginoo mahinumdom sa iyang kasabutan, hangtod sa kahangturan.

Halangdon ug mahimayaon ang iyang buhat, ug ang iyang katarong nagalungtad sa kahangturan. Nabantogan siya tungod sa iyang katingalahang mga buhat; maayo ug maluluy-on ang Ginoo.

Ang Ginoo mahinumdom sa iyang kasabutan, hangtod sa kahangturan.

Gitagaan niyag pagkaon sila nga mahadlokon kaniya; mahinumdom siya kanunay sa iyang kasabutan. Gipahibalo niya sa iyang lungsod ang gahom sa iyang mga buhat, gihatagan niya sila sa kabilin sa kanasuran.

Ang Ginoo mahinumdom sa iyang kasabutan, hangtod sa kahangturan.

PAGBASA SA SANTOS NGA EBANGHELYO SUMALA NI SAN LUKAS

Lk. 11: 15-26

Pipila sa mga katawhan miingon, "Si Beelsebul, ang pangulo sa mga yawa, maoy naghatag kaniyag gahom sa pagpapahawa kanila." Dihay uban nga buot mobitik kaniya, mao nga sila mihangyo kaniya nga mohimo siyag usa ka milagro aron pagpaila nga siya pinadala sa Dios. Apan nahibalo si Jesus sa ilang mga hunahuna ug miingon siya kanila, "Bisan unsang nasora nga magkabahinbahin ug mag-unay pag-away dili molungtad og dugay; ang banay nga mabahinbahin maungkag. Busa kon diha sa gingharian ni Satanas may mga pundok nga nag-unayg away, unsaon man paglungtad sa maong gingharian? Nag-ingon kamo nga naghingilin ako sa mga yawa tungod kay naghatag si Beelsebul kanakog gahom sa paghimo niini. Kon giingon niini nako paghingilin kanila, giunsa man diay sa inyong mga sumusunod pagpapahawa kanila? Ang inyong kaugalingong mga sumusunod nagpaila nga sayop gayod kamo! Ang tinuod mao nga tungod sa gahom sa Dios naghingilin ako sa mga yawa, ug kini maoy nagmatuod nga naghari na ang Dios kaninyo." "Kon ang usa ka tawo nga kusgan, nga sangkap sa tanan niyang inandam nga mga hinagiban, magbantay sa iyang balay, dili gayod kahilabtan ang iyang mga butang. Apan kon may labi pang kusgan nga mosulong ug mobuntog kaniya, ang labing kusgan mosakmit sa tanang mga hinagiban nga gisaligan sa tag-iya ug bahinbahinon ang iyang tinulis." "Ang dili dapig kanako, batok gayod kanako; ang dili motabang kanako pagtigom, nagpatibulaag." "Sa panahon nga mogula sa usa ka tawo ang usa ka daotang espiritu, magsuroysuroy siya sa mga dapit nga mamala ug mangitag iyang kapahulayan; kondili siya makakaplag niini, magkanayon siya, 'Mobalik lang ako sa akong gipuy-an kaniadto.' Busa mobalik siya ug makakaplag sa balay nga malinis ug mayo nang pagkapahimutang ang mga kasangkapan niini. Unya mogula siya ug magdalag laing pito ka espiritu nga labi pang daotan kay kaniya, ug manulod sila ug mopuyo didto. Busa, sa katapusan, kadtong tawhana molabi pa kadaotan kay sa sinugdan."