Huwebes sa Ikakawhaa'g Pito nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-GALACIA

Gal. 3: 1-5

Mga taga Galacia, pagkabuang gayod ninyo! Kinsa bay naglamat kaninyo nga unta gisaysayan na man kamo sa klaro gayod bahin sa kamatayon ni Jesucristo didto sa krus! Karon mangutana ako kaninyo: nadawat ba ninyo ang Espiritu sa Dios pinaagi sa pagtuman sa Balaod o pinaagi ba sa pagpamati ug pagtuo sa ebanghelyo? Pagkabuang gayod ninyo! Nagsugod kamo sa pagkamagtutuo pinaagi sa Espiritu sa Dios; buot ba ninyo tapuson kini pinaagi sa inyong kaugalingong gahom? Wala ba lamang diay kahulogan alang kaninyo ang tanan ninyong kasinatian? May kahulogan gayod kini! Sa paghatag sa Dios kaninyo sa Espiritu ug sa pagbuhat niya sa mga milagro diha kaninyo, gihimo ba niya kini tungod kay nagtuman kamo sa Balaod, o tungod ba kay namati ug mituo kamo sa ebanghelyo?

SALMO RESPONSORYO

Lk. 1: 69-70. 71-72. 73-75

Daygon ang Ginoo, Dios ni Israel, kay iyang giduaw ang iyang lungsod.

Gipaanhi niya kanato ang usa ka gamhanang Manluluwas, nga kaliwat sa iyang sulugoon nga si David, sumala sa iyang gisaad kaniadto pinaagi sa iyang mga balaang propeta.

Daygon ang Ginoo, Dios ni Israel, kay iyang giduaw ang iyang lungsod.

Kaluwasan gikan sa atong mga kaaway ug gikan sa gahom sa tanan natong mga kaatbang. Nagpakita siyag kaluoy sa atong mga katigulangan ug nahinumdom sa balaang kasabutan nga iyang gihimo.

Daygon ang Ginoo, Dios ni Israel, kay iyang giduaw ang iyang lungsod.

Ang panumpa nga iyang gihimo kang Abraham atong amahan, nga iyang gihatag kanato: nga human maluwas sa kahadlok ug malingkawas sa kaaway, mag-alagad kita kaniya sa tibuok natong kinabuhi. Ug magbalaan kita diha sa iyang atubangan.

Daygon ang Ginoo, Dios ni Israel, kay iyang giduaw ang iyang lungsod.

PAGBASA SA SANTOS NGA EBANGHELYO SUMALA NI SAN LUKAS

Lk. 11: 5-13

Si Jesus miingon sa iyang mga tinun-an, "Pananglit usa kaninyo moadto sa balay sa usa ka higala sa tungang gabii ug moingon kaniya, 'Bay, pabayloa kog tulo ka buok pan, kay miabot sa amo ang usa ko ka higala nga nagpanaw ug wala gayod akoy ikadalit kaniya.' Kon pananglit tubagon ka sa imong higala didto sa sulod, 'Ayaw na akog samoka! Gitrangkahan na ang pultahan, ug ang akong kabataan ug ako nanghigda na, ug dili na ako makabangon sa paghatag kanimo bisag unsa.' Unsa may imong buhaton? Sultihan ko kamo nga bisag higala ka niya, dili siya mobangon ug mohatag kanimog pan; apan mobangon na lang siya ug mohatag kanimo sa tanan nga imong gikinahanglan, kay wala ka man maulaw sa pagpunay ug pangayo. Busa sultihan ko kamo: Pangayo kamo, ug kamo hatagan; pangita kamo, ug kamo makakaplag; pagtuktok kamo, ug ablihan ang pultahan alang kaninyo. Kay ang tanan nga mangayo hatagan, ug siya nga mangita makakaplag, ug ang pultahan ablihan alang kaniya nga magtuktok. May usa ba kaninyong mga amahan nga mohatag sa iyang anak ug bitin kon siya mangayog isda? O mohatag ba kamo kaniyag tanga kon mangayo siyag itlog? Bisan pa sa inyong pagkadautan, mahibalo kamong mohatag ug maayong mga butang ngadto sa inyong mga anak. Nan, ang Amahan nga atua sa langit labaw pang mohatag sa Espiritu Santo kanila nga mangayo kaniya!"