[M] Santa Maria, Birhen sa Rosaryo

PAGBASA GIKAN SA SULAT NI SAN PABLO NGADTO SA TAGA-GALACIA

Gal. 2: 1-2. 7-14

Mga igsuon: Tapos ang napulo ug upat ka tuig mibalik ako sa Jerusalem kauban ni Bernabe; gidala ko usab si Tito. Miadto ako tungod kay gipadayag man sa Dios kanako nga kinahanglan moadto ako. Sa akong pagpakigsulti sa mga pangulo, gisaysay ko kanila ang ebanghelyo nga akong giwali sa mga dili Judio, kay dili ako buot nga makawang lamang ang akong gibuhat kaniadto ug karon. Ang akong kuyog nga si Tito, bisan tuod Griego siya wala pugsa sa pagpatuli, bisag may pipila ka tawo nga nagpakaaron-ingnon nga magtutuo sila ug mitipon sa pundok buot motuli kaniya. Kining mga tawhana miyuhot pagsulod sa pundok aron mangispiya mahitungod sa kagawasan nga atong naangkon pinaagi sa atong pagkahiusa kang Cristo Jesus. Buot nila nga maulipon kita pag-usab. Apan wala gayod kami padaog kanila bisag makadiyot, aron tungod kaninyo among kapanalipdan ang kamatuoran sa ebanghelyo. Apan kadtong giila nga mga pangulo gisulti ko kini kay dili ko igsapayan kon kinsa sila kaniadto, kay ang Dios dili maghukom sumala sa makita sa gawas sila walay bag-ong gikasugyot kanako. Hinonoa, nakita nila nga gisugo ako sa Dios pagwali sa ebanghelyo ngadto sa mga dili Judio, ingon nga siya nagsugo kang Pedro pagwali sa ebanghelyo ngadto sa mga Judio. Kay tungod sa gahom sa Dios gihimo ako nga apostol alang sa mga dili Judio, ingon nga gihimo niya si Pedro nga apostol alang sa mga Judio. Si Santiago, si Pedro ug si Juan, nga giisip nga mga pangulo, miila nga ang Dios naghatag kanako niining talagsaong bulohaton; busa nakiglamano sila kang Bernabe ug kanako. Ingon nga mga kauban sa buhat, kaming tanan nagkauyon nga mag-trabaho kami diha sa mga dili Judio ug sila sa mga Judio. Ang ila lamang gihangyo mao nga among hinumdoman ang mga kabus sa ilang pundok, butang nga ako gayong gihagoan pagbuhat.

SALMO RESPONSORYO

Ps. 117: 1. 2

Panglakaw kamo sa tibuok kalibutan, ug isangyaw ang Maayong Balita.

Dayga ang Ginoo, kamong tanang mga nasod; himayaa siya, kamong tanang katawhan.

Panglakaw kamo sa tibuok kalibutan, ug isangyaw ang Maayong Balita.

Kay makanunayon ang iyang kaluoy alang kanato, ug ang kamatinud-anon sa Ginoo nagalungtad hangtod sa kahangturan.

Panglakaw kamo sa tibuok kalibutan, ug isangyaw ang Maayong Balita.

PAGBASA SA SANTOS NGA EBANGHELYO SUMALA NI SAN LUKAS

Lk. 11: 1-4

Usa niana ka higayon nag-ampo si Jesus didto sa usa ka dapit. Sa pagkahuman niyag ampo, miingon ang usa sa iyang mga tinun-an, "Ginoo, tudloi kami sa pag-ampo, ingon nga gitudloan ni Juan ang iyang mga tinun-an." Si Jesus miingon kanila, "Ingna ninyo niini pag-ampo: 'Amahan, Simbahon unta ang imong ngalan, Maghari ka unta kanamo. Ihatag kanamo sa matag adlaw ang kalan -on nga among gikinahanglan. Ug pasayloa kami sa among mga sala. Kay nagpasaylo kami sa tanan nga nakasala kanamo. Ug ayaw kami ibutang sa lisod nga pagsulay.'"