Martes sa Ikakawhaa'g Pito nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-GALACIA

Gal. 1: 13-24

Mga igsuon: Gisuginlan na kamo sa akong pagkinabuhi sa nagsunod pa ako nga mainiton sa tinuohan sa mga Judio. Gilutos ko sa walay kukaluoy ang simbahan sa Dios, ug gihimo ko ang tanan aron paglaglag niini. Labaw ako kamatinumanon sa tinuohan sa mga Judio kay sa kadaghanan sa mga Judio nga akong mga talirongan. Labi pa akong mainiton sa akong pagsunod sa mga gikabilinbiling mga pagtulon-an sa atong mga katigulangan. Apan ang Dios, tungod sa iyang grasya, nagpili kanako sa wala pa gani ako matawo, ug nagtawag kanako aron pag-alagad kaniya. Ug sa dihang gipadayag niya kanako ang iyang Anak aron iwali ko siya ngadto sa mga dili Judio, wala ako magpakitambag ni bisan kinsa, ni miadto ako sa Jerusalem aron pagpakigkita sa nahimong mga apostoles una kanako. Hinonoa, miadto ako dayon sa Arabia ug unya mibalik ako sa Damasco. Milabay ang tulo ka tuig una ako moadto sa Jerusalem aron pagpakigkita kang Pedro, ug nagpabilin ako uban kaniya sulod sa duha ka semana. Walay laing apostol nga akong gipakigkitaan gawas kang Santiago, ang igsuon sa Ginoo. Matuod kining akong gisulat, ug nasayod ang Dios nga wala ako mamakak. Unya miadto ako sa nagkalainlaing dapit sa Siria ug Cilicia. Niadtong higayona ang mga sakop sa mga simbahan ni Cristo didto sa Judea wala pa gayod makakita kanako. Nasayod lamang sila bahin kanako tungod sa gisulti sa uban nga ang naglutos kanila kaniadto karon nagwali na sa tinuohan nga kanhi iyang gipaningkamutan paglaglag. Busa gidayeg nila ang Dios tungod kanako.

SALMO RESPONSORYO

Ps. 139: 1-3. 13-14. 14-15

Agaka ako, Ginoo, subay sa dalan nga way katapusan.

O Ginoo, imo akong gisulayan ug nakaila ikaw kanako; nahibalo ka anus-a ako molingkod ug anus-a motindog; nakasabot ka sa akong mga hunahuna gikan sa halayo. Giusisa mo ang akong mga panaw ug mga pahulay, sinati ka sa tanan kong mga paagi.

Agaka ako, Ginoo, subay sa dalan nga way katapusan.

Sa tinuoray gihulma mo ang kinahiladman sa akong kaugalingon; gibuhat mo ako didto sa tagoangkan sa akong inahan. Gipasalamatan ko ikaw tungod sa makahadlok ug katingalahan mong pagbuhat kanako; Kahibulongan ang imong mga buhat.

Agaka ako, Ginoo, subay sa dalan nga way katapusan.

Ang ako usab nga kalag nakaila karnimo pag-ayo; ni wala nimo hiilhi ang akong dugokan diha nga gibuhat ako sa tago diha nga gihulma ako sa kinahiladman sa yuta.

Agaka ako, Ginoo, subay sa dalan nga way katapusan.

PAGBASA SA SANTOS NGA EBANGHELYO SUMALA NI SAN LUKAS

Lk. 10: 38-42

Samtang nagpadayon pagpanaw si Jesus ug ang iyang mga tinun-an, nahiabot sila sa usa ka balangay diin may usa ka babaye nga ginganlag Marta nga miabiabi kaniya didto sa iyang balay. May igsuon siyang babaye nga ginganlag Maria, nga naglingkod sa tiilan sa Ginoo ug namati sa iyang gitudlo. Si Marta nagkapuliki sa daghan niyang buluhaton, busa miduol siya ug miingon, "Ginoo, dili ka ba manumbaling nga gipasagdan man lamang ako sa akong igsuon sa tanang buluhaton sa balay? Agdaha siya pag-ari aron pagtabang kanako." Ang Ginoo mitubag kaniya, "Ay, kanimo, Marta! Naguol ug nahingawa ka sa daghang mga butang, nga unta usa ra man ang gikinahanglan. Nakapili si Maria sa labing maayo, ug walay makakuha niini gikan kaniya."