Lunes sa Ikakawhaa'g Pito nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-GALACIA

Gal. 1: 6-12

Mga igsuon: Nahibulong ako nga sa kalit lamang mitalikod kamo kaniya nga nagtawag kaninyo pinaagi sa grasya ni Cristo, ug midawat kamo sa laing ebanghelyo. Ang tinuod, walay "laing ebanghelyo." Apan gisulti ko kini kay may mga tawo man nga nagsamok kaninyo ug naninguha pagtuis sa ebanghelyo ni Cristo. Apan bisan kon kami, o usa ka anghel gikan sa langit, magwali kaninyo og ebanghelyo nga lahi sa among giwali, ipatunglo siya! Gisulti na namo kini kaniadto, ug karon sublion ko pag-ingon: kon may magwali kaninyo og ebanghelyo nga lahi sa inyong nadawat, matinunglo siya! Nagpasabot ba kini nga naninguha ako nga kahimut-an sa mga tawo? Wala! Gusto ako nga kahimut-an sa Dios! Naningkamut ba ako aron mahimong inila? Kon naninguha pa gihapon ako niini, dili unta ako sulugoon ni Cristo. Mga igsuon, tugoti ako pagsulti kaninyo niini: ang ebanghelyo nga akong giwali dili minugna og tawo. Wala ko kini madawat gikan kang bisan kinsa ni may nagtudlo niini kanako, kondili gipadayag kini kanako ni Jesucristo.

SALMO RESPONSORYO

Ps. 111: 1-2. 7-8. 9. 10

Ang Ginoo mahinumdom sa iyang kasabutan hangtod sa kahangturan.

Aleluya.

Pasalamatan ko ang Ginoo sa tibuok kong kasingkasing diha sa pundok sa mga matarong. Dagko ang mga buhat sa Ginoo, matahum diha sa tanan nilang kaanindot.

Ang Ginoo mahinumdom sa iyang kasabutan hangtod sa kahangturan.

Aleluya.

Ang mga buhat sa iyang mga kamut matinud-anon ug matarong; dili kaduhaduhaan ang tanarı niyang mga sugo, kasaligan hangtod sa kahangturan, gibuhat diha sa kamatuoran ug kaangayan.

Ang Ginoo mahinumdom sa iyang kasabutan hangtod sa kahangturan.

Aleluya.

Nagpadala siyag kaluwasan ngadto sa iyang katawhan; gidasonan niya ang iyang kasabutan hangtod sa kahangturan. Balaan ug katahaan ang iyang ngalan. Nagalungtad ang iyang kadayganan hangtod sa kahangturan.

Ang Ginoo mahinumdom sa iyang kasabutan hangtod sa kahangturan.

Aleluya.

PAGBASA SA SANTOS NGA EBANGHELYO SUMALA NI SAN LUKAS

Lk. 10: 25-37

Unya miduol ang usa ka magtutudlo sa Balaod ug misulay pagbitik kang Jesus. Nangutana siya, "Magtutudlo, unsay kinahanglan Kong buhaton aron ako makadawat sa kinabuhing dayon?" Si Jesus mitubag kaniya, "Unsa may giingon sa Kasulatan? Ug giunsa man nimo kini pagsabut?" Ang magtutudlo sa Balaod mitubag, "'Higugmaa ang Ginoo nga imong Dios sa tibuok mong kasingkasing, ug sa tibuok mong kalag, sa tibuok mong kusog, ug sa tibuok mong hunahuna,' ug 'Higugmaa ang imong isigkatawo ingon sa paghigugma mo sa imong kaugalingon.'" Mitubag si Jesus, "Husto ang imong tubag; buhata kana ug makadawat ka sa kinabuhi." Apan ang magtutudlo sa Balaod buot ilhon nga husto siya ug mao nga nangutana siya kang Jesus, "Kinsa ba diay ang akong isigkatawo?" Si Jesus mitubag, "May usa ka tawo nga milugsong gikan sa Jerusalem ngadto sa Jerico, ug gibanhigan siya sa mga tulisan. Gihuboan nila siya, gibun-og, ug gibiyaan nga himatyon. Ug nahitabo nga may usa ka pari nga miagi niadtong dalana; sa pagkakita niya sa tawo, milabay lamang siya agi sa pikas daplin. Unya nahiagi usab ang usa ka Levita, ug miduol siya ug mitan-aw sa tawo, ug unya misaylo lamang agi sa pikas daplin. Apan may usa ka Samaryanhon nga nagpanaw niadtong dalana nahiagi sa gitulisan, ug sa pagkakita niya sa tawo, naluoy siya. Miduol siya kaniya, ug gibuboan niyag lana ug bino ang iyang mga samad ug gibugkosan; unya gipasakay niya ang tawo sa iyang hayop ug gihatod ngadto sa usa ka abotanan, ug didto iyang gialimahan siya. Sa pagkaugma mihatag siyag duha ka denario ngadto sa tig-atiman sa abotanan ug mitugon, 'Galma siya ug inig balik ko dinhi bayran ko ikaw sa imong magasto.'" Ug si Jesus mitapos pag-ingon, "Karon kinsa man niining tulo sa imong hunahuna ang nagpakita nga isigkatawo sa gitulisan?" Ang magtutudlo sa Balaod mitubag, "Kadtong naluoy kaniya." Si Jesus miingon, "Busa lakaw ug buhata ang sama sa iyang gibuhat."