Ikakawhaa'g Pito nga Domingo sa Ordinaryong Panahon
End of Season of Creation
PAGBASA GIKAN SA BASAHON NI PROPETA ISAIAS
Is. 5: 1-7
Tugoti nga awitan ko ang akong higala ug awit sa gugma bahin sa iyang parasan: Ang akong higala may parasan kaniadto didto sa tabunok kaayo nga bungtod. Gibugwal niya kini ug gihawanan sa mga bato ug gitamnan niyag labing maayong paras; ug gitukorag tore nga bantayanan diha sa taliwala niini, ug gibutangan pa gayod niya kinig pigsanan sa ubas ug nagpaabot siya nga mamunga kinig tam-is nga ubas, apan aslom hinoon ang bunga niini. Busa miingon siya, "O molupyo sa Jerusalem, ug katawhan sa Juda, hukmi ako ninyo ug ang akong parasan. Unsa pa man diay ang angay kong buhaton sa akong parasan, nga wala pa nako mahimo? Nagpaabot ako nga mamunga kinig tam-is apan aslom hinoon ang bunga niini." "Karon sultihan ko kamo kon unsay buhaton ko sa akong parasan. Kuhaon ko ang koral niini ug himoong sibsibanan; lumpagon ko ang paril niini ug patamaktamakan sa mga mananap. Pasagdan ko na lang kini; dili na pul-ongan ang mga sanga ni habukan ang punoan niini, ug manubo niini ang kadyapa ug sampinit; ug mandoan ko ang panganod nga dili na kini paulanan." Ang parasan sa Ginoo, nga Labing Gamhanan mao ang Israel, ug ang katawhan ang Juda mao ang iyang pinanggang tanom; nangita siyag hustisya, apan ang nakaplagan niya mao ang pinatyanay. Nangita siyag katarong apan ang nakaplagan niya hilak sa kaguol!
ANG PULONG SA GINOO
SALMO RESPONSORYO
Ps. 80: 9. 12. 13-14. 15-16. 19-20
Ang parasan sa Ginoo mao ang balay sa Israel.
Gikan sa Ehipto gilalin mo ang usa ka bagon; giabog mo ang kanasuran ug gitanom mo kini. Mikatay ang iyang kadahonan hangtod sa dagat, ang iyang mga subol miabot hangtod sa suba.
Ang parasan sa Ginoo mao ang balay sa Israel.
Nganong imong gitumba ang iyang mga paril, aron ang tanang mangagi mangutlo sa iyang bunga. Giyatakyatakan siya sa baboyng ihalas gikan sa lasang, ug gikaon siya sa mga mananap sa kaumahan.
Ang parasan sa Ginoo mao ang balay sa Israel.
O Ginoo sa kagahuman, balika pag-usab ang pagsud-ong gikan sa langit, ug tan-awa; Bantayi kining parasan, ug panalipdi ang gitanom sa imong tuong kamut (Ang Anak sa Tawo nga imong gihimong malig-on).
Ang parasan sa Ginoo mao ang balay sa Israel.
Unya dili na kami mapahilayo kanimo; tagai kamig bag-ong kinabuhi, ug magsangpit kami sa imong ngalan. O Ginoo sa kagahoman, pabalika kami; kon ang imong nawong modan-ag kanamo, unya wala na kamiy kahadlokan.
Ang parasan sa Ginoo mao ang balay sa Israel.
PAGBASA GIKAN SA SULAT NI SAN PABLO NGADTO SA TAGA-FILIPOS
Phil. 4: 6-9
Mga igsuon: Ayaw kamo kabalaka sa bisan unsa, kondili pangayoa sa Dios ang inyong gikinahanglan uban ang pagpasalamat sa tanan ninyong pag-ampo. Ug ang kalinaw sa Dios nga dili matugkad sa tawo, manalipod sa inyong kasingkasing ug hunahuna sa inyong sa inyong pagkahiusa kang Cristo Jesus. Sa katapusan, mga igsuon, pun-a ang inyong hunahuna sa mga butang nga maayo ug angayng daygon, sa mga butang nga matuod, hamili, matarong, putli, matahom, ug halangdon. Ipakita sa buhat ang inyong nakat-onan, nadawat, nadungog ug nakita kanako. Ug ang Dios nga naghatag kanato sa kalinaw mag-uban kaninyo.
ANG PULONG SA GINOO
PAGBASA SA SANTOS NGA EBANGHELYO SUMALA NI SAN MATEO
Mt. 21: 33-43
Si Jesus miingon ngadto sa mga labawng pari ug sa mga punoan sa lungsod, "Pamati kamo og laing sambingay. May usa ka tawo nga yutaan nga nagtanom og mga paras. Gikural niya kini ug gikalotag lungag nga kasudlan sa giniok nga ubas, ug nagtukod siyag bantayan. Unya gipasaupan niya ang iyang parasan ug milangyaw siya. Sa tingpamupo na sa ubas, gipadala niya ang iyang mga ulipon ngadto sa mga saop aron pagkuha sa iyang bahin. Apan gidakop sa mga saop ang mga ulipon; gibunalan nila ang usa, ug ang usa ilang gipatay, ug ang lain pa gayod ilang gibato. Unya gipadala pa gayod niya ang laing mga ulipon nga labaw pa kadaghan kay sa unang gipadala, ug mao gihapon ang gibuhat sa mga saop kanila. Sa katapusan gipadala niya ang iyang anak. Miingon siya, 'Sa walay duhaduha tahoron gayod nila ang akong anak.' Apan sa dihang nakita sa mga saop ang anak, nag-ingnanay sila, 'Ania ang anak sa tag-iya. Tana, patyon ta siya, ug maato na ang parasan!' Busa siya ilang gidakop, gitaral ngadto sa gawas sa parasan, ug gipatay." "Karon, inig-abot sa tag-iya, unsa may iyang buhaton sa mga saop?" nangutana si Jesus. Sila mitubag, "Sa walay duhaduha patyon niya kadtong mga tawong daotan, ug pasaopan niya ang parasan ug laing mga tawo nga makahatag kaniya sa iyang bahin sa abot sa hustong panahon." Si Jesus miingon kanila, "Wala ba kamo makabasa sa giingon sa Kasulatan? 'Ang bato nga gisalikway sa mga magtutukod kay walay kapuslanan, nahimo hinoong bato nga labing importante, buhat kini sa Ginoo, ug kahibulongan gayod kini!'" Ug midugang si Jesus, "Busa sultihan ko kamo nga ang gingharian sa Dios kuhaon gikan kaninyo ug ihatag ngadto sa mga tawo nga makahatag ug maayong mga bunga."
ANG EBANGHELYO SA GINOO
