Sabado sa Ikakawhaa'g Unom nga Semana sa Ordinaryong Panahon
[m] The Blessed Virgin Mary on Saturday
PAGBASA GIKAN SA BASAHON NI JOB
Jb. 42: 1-3. 5-6. 12-17
Unya mitubag si Job sa Ginoo, Nasayod ako, Ginoo. Nga gamhanan ka kaayo; ug mahimo mo ang tanan mong buot buhaton. Nangutana ka nganong nagduhaduha ako sa imong kaalam nga unta wala man akoy alamag. Nagsulti ako bahin sa mga butang nga wala ko hisabti, mga kahibulongang butang nga dili ko gayod matukib. Kaniadto nasayod lamang ako sa gisulti kanako sa uban, apan karon nakita ko na gayod ikaw sa kaugalingon kong mata. Busa naulaw ako sa tanan kong gisulti, ug naghinulsol ako pinaagi sa pagbolibod og abo. Gipanalanginan sa Ginoo ang katapusang mga adlaw ni Job labaw pa sa iyang nadawat kaniadto. Napanag-iya ni Job ang napulog-upat ka libo ka karnero, unom ka libo ka kamelyo, duha ka libo ka baka, ug usa ka libo ka asno. Nakaliwat siyag pito ka anak nga lalaki ug tulo ka anak nga babaye. Ginganlan niyag Jemina ang kamagulangan, ang ikaduha Kesiya, ug ang kamanghoran Keren-Hapu. Walay babaye nga sama katahom sa mga anak ni Job sa tibuok kalibotan. Gibahin sila ni Job sa iyang katigayonan uban sa ilang mga igsoong lalaki. Human niini, si Job nabuhi pag usa ka gatos ug kap-atan ka tuig, ug nakakita pa siya sa iyang mga apo ug mga sungkod. Unya namatay siya nga tigulang na kaayo.
ANG PULONG SA GINOO
SALMO RESPONSORYO
Ps. 119: 66. 71. 75. 91. 125. 130
Ginoo, ipadan-ag ang imong nawong kanako.
Tudloi ako sa kinaadman ug kahibalo, kay diha sa imong mga sugo nagasalig ako.
Ginoo, ipadan-ag ang imong nawong kanako.
Maayo kanako nga ako gisakit, aron makakat-on ako sa imong kasugoan.
Ginoo, ipadan-ag ang imong nawong kanako.
Nahibalo ako, O Ginoo, nga ang imong mga gimbut-an matarong, ug diha sa imong kamatinud-anon imo ako nga gisakit.
Ginoo, ipadan-ag ang imong nawong kanako.
Sumala sa imong mga kasugoan nagabarog sila nga malig-on sa gihapon: ang tanang mga butang nagaalagad kanimo.
Ginoo, ipadan-ag ang imong nawong kanako.
Ako imong sulugoon; tagai akog puangod aron makahibalo ako sa imong mga kasugoan.
Ginoo, ipadan-ag ang imong nawong kanako.
Ang gipadayag sa imong mga pulong naghatag og kahayag nagapasabot sa tawo nga mapaubsanon.
Ginoo, ipadan-ag ang imong nawong kanako.
PAGBASA SA SANTOS NGA EBANGHELYO SUMALA NI SAN LUKAS
Lk. 10: 17-24
Unya nahibalik ang kapitoag-duha nga malipayon kaayo ug miingon, "Ginoo, bisan ang mga yawa mipatuo kanamo sa among paghingilin kanila sa imong ngalan!" Si Jesus mitubag kanila, "Nakita ko si Satanas nga nahulog ingog kilat gikan sa langit. Pamati kamo! Gitagaan ko kamog gahom aron makahimo kamo pagyatak sa mga bitin ug sa mga tanga, ug sa tanang gahom sa Yawa, ug walay maka-unsa kaninyo. Apan ayaw kamog kalipay tungod kay ang mga yawa mipatuo kaninyo, kondili paglipay hinoon kamo kay ang inyong mga ngalan nahisulat didto sa langit." Niadtong higayona gilipay si Jesus sa Espiritu Santo ug miingon siya, "Amahan, Ginoo sa langit ug sa yuta, nagpasalamat ako kanimo tungod kay gipadayag mo man ngadto sa mga walay kahibalo ang imong gililong sa mga makinaadmanon ug sa mga may kahibalo. Oo, Amahan, natuman kini kay mao may imong gusto ug pagbuot." "Ang akong Amahan mitugyan kanako sa tanang butang: walay nakaila sa Anak gawas sa Amahan, ug walay nakaila sa Amahan gawas sa Anak, ug kanila nga buot pailhon sa Anak kinsa ang Amahan." Unya miatubang si Jesus sa mga tinun-an ug miingon kanila lamang, "Bulahan kamo nga nakakita sa mga butang nga inyong nakita! Kay sultihan ko kamo nga daghang mga propeta ug mga hari nga buot motan-aw sa inyong nakita apan wala makakita, ug buot mamati sa inyong nadungog apan wala makabati."
ANG EBANGHELYO SA GINOO
