[M] Mga Santos nga Angel nga Magbalantay

PAGBASA GIKAN SA BASAHON NI JOB

Jb. 38: 1. 12-21; 40: 3-5

Unya diha sa bagyo miingon ang Ginoo kang Job, Job, nakapasubang ka na ba sa adlaw? Nakasugo ka na ba sa kaadlawon aron kini mobanagbanag, ug nakapakurog sa mga dautan aron sila manggula sa ilang mga tagoanan? Ang kahayag sa adlaw mopadayag sa kabungtoran ug kawalogan sama sa pinil-an sa bisti. Sulaw ra kaayo sa mga dautan ang kahayag sa adlaw, ug kini maoy magpugong kanila pagbuhat ug dautan. Nakaadto ka na ba sa mga tuboran sa kahiladman sa dagat? Nakalakaw ka na ba sa ilawom sa dagat? May nagtultol ba kanimo sa mga ganghaan nga nag-ali sa kalibutan sa mga patay? Nasayod ka ba sa gidak-on sa kalibutan? Tubaga ako kon nasayod ka. Nahibalo ka ba diin gikan ang kahayag, o ang kangitngit? Kabut-an mo ba sila asa sila kutob, o makapabalik ka ba kanila? Walay duhaduha makahimo ka niini kay tigulang ka na man kaayo, ug natawo ka na sa dihang gibuhat ang kalibutan! Si Job miingon, nagsulti ako ingon nga buang, Ginoo. Busa unsa may akong itubag? Dili na ako mangahas pagsulti bisag unsa. Naghinobra na ang akong gisulti.

SALMO RESPONSORYO

Ps. 139: 1-3. 7-8. 9-10. 13-14

Agaka ako, Ginoo, subay sa dalan nga walay-katapusan.

O Ginoo, gisulay mo ako ug nakaila ikaw kanako; nahibalo ikaw anus-a ako molingkod ug anus-a motindog; nakasabut ka sa akong mga hunahuna gikan sa halayo. Ang akong mga panaw ug mga pahulay imong giusisa, sinati ikaw sa tanan kong mga paagi.

Agaka ako, Ginoo, subay sa dalan nga walay-katapusan.

Asa man ako makalikay sa imong espiritu? Sa imong presensiya asa man ako makakagiw? Kon mosaka ako sa kalangitan, tua ikaw didto; kon mosalum ako sa kahiladman sa kalibutan, tua ikaw didto.

Agaka ako, Ginoo, subay sa dalan nga walay-katapusan.

Kon molupad ako sa mga pako sa kaadlawon, kon moadto ako sa kinalay-ang kautlanan sa dagat; bisan didto ang imong kamut mag-agak kanako, ang imong tuong kamut hugot nga maggunit kanako.

Agaka ako, Ginoo, subay sa dalan nga walay-katapusan.

Sa tinuoray gihulma mo ang akong kaugalingon; gibuhat mo ako didto sa tagoangkan sa akong inahan. Nagpasalamat ako kanimo tungod sa imong makahadlok ug katingalahang mga pagbuhat kanako; kahibulongan gayod ang imong mga buhat.

Agaka ako, Ginoo, subay sa dalan nga walay-katapusan.

PAGBASA SA SANTOS NGA EBANGHELYO SUMALA NI SAN LUKAS

Lk. 10: 13-16

Si Jesus miingon: "Pagkamakalilisang unya sa mahitabo kanimo, Corasin! Ug pagkamakalilisang usab sa mahitabo kanimo, Betsaida! Kay kon ang mga milagro nga nahimo diha kaninyo nangahimo pa didto sa Tiro ug sa Sidon, dugay na untang naghinulsol ang mga tawo didto ug nagpakita niini sa paglingkod nga nagsul-ob og bisting sako, ug nagbolibod ug abo sa ilang kaugalingon. Sa adlaw sa Paghukom ang Dios mas maluoy pa unya sa Tiro ug sa Sidon kay kaninyo. Ug mahitungod kanimo, Capernaum, buot mong ituboy ang imong kaugalingon hangtod sa langit, apan ibanlod ka hinoon ngadto sa impiyerno!" Unya miingon siya sa iyang mga tinun-an, "Ang mamati kaninyo, mamati kanako; ug ang magsalikway kaninyo, magsalikway kanako; ug ang magsalikway kanako, magsalikway kaniya nga nagsugo kanako."