[M] Santa Teresita sa Batang Jesus, birhen ug doktor sa Simbahan

PAGBASA GIKAN SA BASAHON NI JOB

Jb. 19: 21-27

Kamo akong mga higala! Busa kaloy-i intawon ako ninyo! Gihampak ako sa Dios. Nganong inyo man akong sakiton, sama sa pagsakit kanako sa dios? Dili pa ba igo ang pagsakit ninyo kanako? Maayo unta kong isulat pa kining akong gisulti ug himoong libro! Maayo unta kon ikulit pa sa bato ang akong mga pulong aron dili kini mahanaw. Apan nasayod ako sa katapusan, may tigpanalipod sa langit nga molaban kanako. Makita ko ang Dios niining lawasa gayod bisan pag kutkot sa sakit ang akong panit. Makita ko gayod siya, ug dili na siya langyaw alang kanako.

SALMO RESPONSORYO

Ps. 27: 7-8. 8-9. 13-14

Mituo ako nga makakita ako sa mga butang nga mayo sa Ginoo didto sa yuta sa mga buhi.

Patalinghugi, O Ginoo, ang tingog sa akong pagsangpit, kaloy-i ako, ug tubaga ako. Kanimo ang akong kasingkasing nagasulti; ikaw ang akong gipangita.

Mituo ako nga makakita ako sa mga butang nga mayo sa Ginoo didto sa yuta sa mga buhi.

O Ginoo, nangita ako kanimo. Ayaw tagoa ang imong nawong kanako; ayaw isalikway diha sa kapungot ang imong sulugoon. Ikaw ang akong mananabang; ayaw ako biyai.

Mituo ako nga makakita ako sa mga butang nga mayo sa Ginoo didto sa yuta sa mga buhi.

Mituo ako nga makakita ako sa kaayo sa Ginoo didto sa yuta sa mga buhi. Paabota sa walay kahadlok ang Ginoo; pagmalig-on sa kasingkasing ug paabota ang Ginoo.

Mituo ako nga makakita ako sa mga butang nga mayo sa Ginoo didto sa yuta sa mga buhi.

PAGBASA SA SANTOS NGA EBANGHELYO SUMALA NI SAN LUKAS

Lk. 10: 1-12

Human niini, gipili sa Ginoo ang laing kapitoag-duha ka lalaki. Gipadala sila sa tinagurha aron mag-una kaniya ngadto sa tagsatagsa ka lungsod ug dapit nga iyang adtoan. Miingon siya kanila, "Ang anihon daghan, apan diyotay ra ang mga mangangani. Busa pag-ampo kamo sa tag-iya sa anihon aron magpadala siyag dugang pang mamumoo nga moani niini. Lakaw kamo, nagpadala ako kaninyo nga sama sa mga nating karnero ngadto sa mga lobo. Ayaw pagdala og puntil, ni sudlanan sa limos, ni sandalyas; ayaw kamo paghunong aron paghimamat kang bisan kinsa diha sa dalan. Bisan diing balaya kamo moabot, unaha ninyo pag-ingon, 'Ang panagdait mania niining balaya.' Kon didto may nagpuyo nga mahigugmaon sa pakigdait, ibilin kaniya ang inyong yukbo sa pakigdait; kon wala, bakwia ang inyong yukbo sa pakigdait. Pabilin kamo niadtong balaya, ug kaon ug inom sa ilang idalit kaninyo; kay ang mamumoo angay gayod nga suholan. Ayaw pagbalhinbalhin gikan sa usa ka balay ngadto sa lain. Kon moadto kamo sa usa ka lungsod ug dawaton kamo nila, kaon sa idalit kaninyo; ayoha ang mga masakiton niadtong lungsora, ug sultihi ang mga tawo didto nga hapit na moabot kanila ang paghari sa Dios. Apan kon moadto kamo sa usa ka lungsod ug dili kamo nila dawaton didto, gula kamo ngadto sa kadalanan ug ingna ninyo ang mga tawo, 'Bisan ang abog sa inyong lungsod nga mitapot sa among mga tiil among taktakon batok kaninyo; apan timan-i nga hapit na maghari ang Dios kaninyo!' Sultihan ko kamo nga sa Adlaw sa Paghukom ang Dios mas maluoy pa sa Sodoma kay niadtong lungsora!"