[M] San Jeromino, pari ug doktor sa Simbahan

PAGBASA GIKAN SA BASAHON NI JOB

Jb. 9: 1-12. 14-16

Si Job miingon, "Nakadungog na ako nianang tanan kaniadto. Apan unsaon man pagdaog sa tawo batok sa Dios? Unsaon mo man paglalis kaniya? Sa libo ka pangutana niya walay makatubag bisag kinsa. Maalamon ug gamhanan kaayo ang Dios ug walay makasukol kaniya. Sa walay pagpasidaan tay-ogon niya ang kabukiran, ug gun-obon niya sa iyang kasuko. Gipalinog sa Dios ug gitay-og niya ang yuta; giyugyog niya ang mga haligi nga gisukaran sa kalibutan. Mahimong pugngan sa Dios ang adlaw aron dili mosubang, ug ang mga bitoon aron dili na modan-ag. Walay nagtabang sa Dios sa pagbuhat niya sa langit O sa pagyatak niya sa bukobuko sa Lebiatan. Sa langit gibitay sa Dios ang mga bitoon—ang Kabo, ang Orion, ang Pleiades, ug ang mga bitoon sa habagatan. Dili ta masabot ang mga dagkong butang nga gibuhat niya, ug walay puas ang iyang milagro. Miagi ang Dios apan wala ko siya makita. Dad-on niya ang gusto niyang kuhaon, ug walay makapugong kaniya; walay makapangahas pagpangutana kaniya, "Unsa bay imong gibuhat?" Busa unsaon ko man pagtubag kaniya? Bisag wala akoy sala, mao ray akong mahimo ang pagpakiluoy sa Dios nga akong maghuhukom, apan bisag pasultihon niya ako, dili ako makatuo nga patalinghugan niya ako.

SALMO RESPONSORYO

Ps. 88: 10-11. 12-13. 14-15

Padangata ang akong pag-ampo sa imong atubangan, O Ginoo.

Matag-adlaw nagatawag ako kanimo, O Ginoo; kanimo gibayaw ko ang akong mga kamut. Magbuhat ka ba og mga katingalahan alang sa mga patay? Mobangon ba ang mga anino aron pagpasalamat kanimo?

Padangata ang akong pag-ampo sa imong atubangan, O Ginoo.

Magsaysay ba sila sa imong kaluoy didto sa lubnganan, sa imong kamatinud-anon didto kanila nga nangamatay?

Padangata ang akong pag-ampo sa imong atubangan, O Ginoo.

Gipahibalo ba ang imong katingalahan didto sa kangitngitan, o ang imong katarong didto sa yuta sa kalimot?

Padangata ang akong pag-ampo sa imong atubangan, O Ginoo.

Apan ako, O Ginoo, nagasinggit kanimo; sa akong pag-ampo sa kabuntagon nagahulat ako kanimo. Ngano, O Ginoo, nga gisalikway mo man ako; nganong gitago mo kanako ang imong nawong.

Padangata ang akong pag-ampo sa imong atubangan, O Ginoo.

PAGBASA SA SANTOS NGA EBANGHELYO SUMALA NI SAN LUKAS

Lk. 9: 57-62

Samtang naglakaw sila, may usa ka tawo nga miingon kang Jesus, "Mosunod ako kanimo bisan asa ka moadto." Si Jesus miingon kaniya, "Ang mga milo may tagoanan, ug ang mga langgam may mga salag, apan walay kahigdaan ug kapahulayan ang Anak sa Tawo." Ug miingon siya sa laing tawo, "Sunod kanako." Apan miingon ang tawo, "Sir, mouli una ako aron paglubong sa akong amahan." Si Jesus mitubag, "Pasagdi ang mga patay nga maglubong sa ilang mga minatay. Apan ikaw, lakaw ug iwali ang Gingharian sa Dios." May laing tawo usab miingon, "Mosunod ako kanimo, Sir, apan tugoti una ako pagpauli aron pagpanamilit sa akong banay." Si Jesus miingon kaniya, "Kinsa gani kadtong mosugod pagdaro ug unya magpunayg lingi dili angay sa Gingharian sa Dios."