[F] San Lorenzo Ruiz ug mga kauban, mga martir

PAGBASA GIKAN SA IKADUHANG BASAHON SA MGA MACABEO

2 Mc. 7: 1-2. 9-14

Sa laing higayon may usa ka inahan nga Judio ug ang iyang pito ka anak nga lalaki nga gidakop. Gipabunalan sila sa hari aron pagpugos kanila sa pagkaon ug baboy. Unya usa sa mga batan-ong lalaki miingon, "Unsa may imong gilaoman nga makuha pinaagi sa pagbuhat niini? Palabihon namo ang pagpakamatay kay sa pagbiya sa mga batasan sa among mga katigulangan." Apan uban sa iyang himalatyon nga ginhawa misinggit siya ngadto sa hari, "Ikaw, matadero! Mahimong imo kaming patyon, apan ang Hari sa tanang kalibutan magbanhaw kanamo ug maghatag kanamo sa kinabuhi nga walay katapusan tungod kay nagsugot kami sa iyang mga balaod." Ang ikatulo nga igsuon mao na usab ang gikalingawan sa mga sundalo. Diha nga gisugo siya pagpadiwalwal sa iyang dila, mihimo dayon siya niini. Unya maisugon niyang gituy-od ang iyang mga kamut ug sa maisog nga mga pulong miingon siya, "Ang Dios naghatag niini kanako. Apan ang iyang mga balaod labaw ka hinungdanon kanako kay sa akong mga kamut, ug nahibalo ako nga ang Dios maghatag niini nila kanako pag-usab." Ang Hari ug sila nga uban kaniya natingala sa iyang kaisog ug sa iyang kamahinangpon sa pag-antos. Human siya mamatay, ang mga sundalo misakit sa ikaupat nga igsuon sa samang mapintas nga paagi, apan ang iyang katapusang mga pulong mao, "Malipayon ako nga magpakamatay sa imong mga kamut, tungod kay gipasaligan kami nga ang Dios magbanhaw kanamo. Apan walay pagkabanhaw alang kanimo, Antioco."

SALMO RESPONSORYO

Ps. 34: 2-3. 4-5. 6-7. 8-9

Dayegon ko ang Ginoo sa tanang panahon.

Dayegon ko ang Ginoo sa tanang panahon; ang iyang pagdayeg anaa kanunay sa akong baba. Pahimayaa ang akong kalag diha sa Ginoo; ang mapaubsanon mamati kanako ug malipay.

Dayegon ko ang Ginoo sa tanang panahon.

Himayaa ang Ginoo uban kanako, mag-ambahan kita aron pagbayaw sa iyang ngalan. Gipangita ko ang Ginoo, ug gitubag ako niya ug giluwas ako niya sa tanan kong gikahadlokan.

Dayegon ko ang Ginoo sa tanang panahon.

Paglaum kamo kaniya aron mosanag kamo sa kalipay, ug ang inyong mga nawong dili manlipaghong sa kaulaw. Sa pagsangpit sa gisakit nga tawo, namati ang Ginoo ug giluwas siya sa tanan niyang kagul-anan.

Dayegon ko ang Ginoo sa tanang panahon.

PAGBASA SA SANTOS NGA EBANGHELYO SUMALA NI SAN JUAN

Jn. 15: 18-21

Si Jesus miingon sa iyang mga tinun-an, "Kon nasilag kaninyo ang kalibutan, hinumdomi nga akoy unang gikasilagan niini. Kon kamo iya pa sa kalibutan, higugmaon unta kamo sa kalibutan ingon nga iya sa kalibutan. Apan gipili ko kamo gikan niining kalibutana; busa nasilag kaninyo ang kalibutan. Hinumdomi ang akong giingon kaninyo: 'Walay ulipon nga labaw sa iyang agalon.' Kon gilutos nila ako, lutoson usab kamo nila; kon tumanon nila ang akong gisulti, tumanon usab nila ang inyong isulti. Apan kining tanan buhaton nila kaninyo tungod kanako, sanglit wala man sila makaila kaniya nga nagpadala kanako."