Ikakawhaa'g Unom nga Domingo sa Ordinaryong Panahon
PAGBASA GIKAN SA BASAHON NI PROPETA EZEQUIEL
Ez. 18: 25-28
Moingon kamo, "Dili matarong ang paagi sa Ginoo." Pamati katawhan sa Israel: Dili ba matarong ang akong paagi? Dili ba ang inyo mang mga paagi maoy dili matarong? Kon ang usa ka tawong matarong mobiya sa iyang pagkamatarong ug magpakasala siya, mamatay siya tungod niini. Kon ang usa ka tawong dautan mobiya usab sa iyang pagkadautan ug buhaton niya ang husto ug matarong, maluwas siya. Tungod kay siya mibiya man sa tanan niyang sala, maluwas gayod siya.
ANG PULONG SA GINOO
SALMO RESPONSORYO
Ps. 125: 4-5. 6-7. 8-9
Hinumdomi ang imong mga kaluoy, O Ginoo.
O Ginoo, ipahibalo kanako ang imong mga dalan; tudloi ako sa imong mga agianan, tultoli ako diha sa imong kamatuoran ug tudloi ako, kay ikaw ang Dios nga akong manluluwas.
Hinumdomi ang imong mga kaluoy, O Ginoo.
Hinumdomi nga ang imong kaluoy, O Ginoo, ug ang imong kaayo sukad pa sa karaan. Ang mga sala sa akong kabatan-on ug ang akong mga kahuyang ayaw hinumdomi; sa imong kaluoy hinumdomi ako, tungod sa imong kaayo, O Ginoo.
Hinumdomi ang imong mga kaluoy, O Ginoo.
Maayo ug matarong ang Ginoo; sa ingon niini iyang gitudloan ang makasasala sa dalan. Iyang gitultolan ang mapaubsanon sa iyang dalan.
Hinumdomi ang imong mga kaluoy, O Ginoo.
PAGBASA GIKAN SA SULAT NI SAN PABLO NGADTO SA TAGA-FILIPOS
Phil. 2: 1-11 (TINAAS)
Nakapalig-on ba kaninyo ang inyong kinabuhi diha kang Cristo? Gilipay ba kamo sa iyang gugma? May pakighiusa ba kamo sa espiritu? May gugma ba kamo ug kaluoy sa usag-usa? Kon mao kana, awhagon ko kamo nga lipayon ako ninyo sa hingpit pinaagi sa pagbaton sa samang katuyoan ug hunahuna ug sa samang gugma. Ayaw kamo pagbuhat bisag unsa gumikan sa hinakog nga tuyo o sa walay hinungdan nga tinguha sa pagpanghambog; hinonoa, pagpaubos kamo sa wala gayoy paghunahuna nga kamo mas maayo kay sa uban. Pagtinabangay kamo ug dili kay mao ray inyong atimanon ang tagsatagsa ninyo ka kaayohan. Angayng batonan ninyo ang hunahuna nga gibatonan ni Cristo Jesus nga mao kini: Diha niya kanunay ang kinaiya gayod sa Dios, apan wala siya maghunahuna pagpakigtupong sa Dios pinaagi sa kusog. Kondili sa iyang kaugalingong kabubut-on iya kining gibiyaan. Ug gisul-ob niya ang kinaiya sa usa ka sulugoon. Natawo siya sama kanato ug nakita siya ingon nga tawo; Nagpaubos siya ug nagmasinugtanon hangtod sa kamatayon—ang iyang kamatayon sa krus. Tungod niini gituboy siya sa Dios ngadto sa kinatas-ang dapit sa kalangitan, ug gihatagan siyag ngalan nga labaw sa tanang ngalan. Busa mangluhod ang tanang binuhat nga atua sa langit, sa yuta ug sa ilalom sa yuta; Sa pagpasidungog sa ngalan ni Jesus. Ug ang tanan magsangyaw nga si Jesucristo mao ang Ginoo, alang sa himaya sa Dios nga Amahan.
ANG PULONG SA GINOO
PAGBASA GIKAN SA SULAT NI SAN PABLO NGADTO SA TAGA-FILIPOS
Phil. 2: 1-5 (MINUBO)
Nakapalig-on ba kaninyo ang inyong kinabuhi diha kang Cristo? Gilipay ba kamo sa iyang gugma? May pakighiusa ba kamo sa espiritu? May gugma ba kamo ug kaluoy sa usag-usa? Kon mao kana, awhagon ko kamo nga lipayon ako ninyo sa hingpit pinaagi sa pagbaton sa samang katuyoan ug hunahuna ug sa samang gugma. Ayaw kamo pagbuhat bisag unsa gumikan sa hinakog nga tuyo o sa walay hinungdan nga tinguha sa pagpanghambog; hinonoa, pagpaubos kamo sa wala gayoy paghunahuna nga kamo mas maayo kay sa uban. Pagtinabangay kamo ug dili kay mao ray inyong atimanon ang tagsatagsa ninyo ka kaayohan. Angayng batonan ninyo ang hunahuna nga gibatonan ni Cristo Jesus.
ANG PULONG SA GINOO
PAGBASA SA SANTOS NGA EBANGHELYO SUMALA NI SAN MATEO
Mt. 21: 28-32
Si Jesus miingon sa punoang mga pari ug sa mga kadagkoan sa lungsod: "Karon, unsa may inyong hunahuna? Dihay tawo nga may duha ka anak nga lalaki. Miadto siya sa magulang ug iyang giingnan, 'Dong, pagtrabaho karong adlawa didto sa parasan.' Siya mitu-bag, 'Dili ko motrabaho,' apan nausab ang iyang hunahu-na ug miadto siya sa parasan. Unya ang amahan miadto sa manghod ug mao gihapon ang iyang giingon kaniya. 'Oo, moadto ako,' mitubag siya, apan wala siya moadto. Kinsa man sa duha ang mituman sa buot ipabuhat sa amahan?" Sila mitubag, "Ang magulang." Unya si Jesus miingon, "Sultihan ko kamo nga ang mga kobrador sa buhis ug ang mga dautang babaye mag-una pa kaninyo pagsulod sa gingharian sa Dios. Kay mianhi kaninyo si Juan nga Magbubunyag pagtudlo sa matarong nga pagkinabuhi, ug wala kamo motuo kaniya; apan ang mga kobrador sa buhis ug ang mga dautang babaye mituo kaniya. Bisan gani kamo, sa human ninyo makita kini, wala gihapon maghinulsol ni motuo kaniya."
ANG EBANGHELYO SA GINOO
