Sabado sa Ikakawhaa'g Lima nga Semana sa Ordinaryong Panahon

PAGBASA GIKAN SA BASAHON SA ECCLESIASTES

Eccl. 11: 9 - 12: 8

Mga batan-on, pahimusli ang inyong pagkabatan-on. Paglipay samtang batan-on pa kamo. Buhata ang gusto ninyo ug hinaut nga maangkon ninyo ang inyong gipangandoy. Apan timan-i nga hukman kamo sa Dios sa inyong pagabuhaton. Ayaw itugot ang bisag unsa nga makapaguol o makasamad sa inyong balatian, kay dili kamo magpabiling batan-on sa dugayng panahon. Busa hinumdomi ang imong magbubuhat samtang batan-on pa ikaw, sa dili pa moabot ang makasubo nga mga adlaw og katuigan nga moingon ka na, "Wala ako makapahimulos sa akong kinabuhi." Niadtong panahona hanap na alang kanimo ang kahayag sa adlaw, sa bulan, ug sa mga bitoon; ug kanunay lamang magdag-om ang adlaw alang kanimo. Niadtong panahona ang mga bukton nga nanalipod kanimo, mangurog na, ug ang mga tiil mo nga karon lig-on pa, kabsan nag umoy. Diyotay na lang usab ang ngipon nga iusap mo sa imong kan-on, ug mahanap na kaayo ang imong panan-aw. Mabungol ka na ug lugos ka na gani makadungog sa hinagilis sa galingan, ug sa gitugtog nga honi, apan momata ka bisag awit lamang sa langgam. Mahadlok ka na sa mga habog nga dapit, ug piligro na alang kanimo ang paglakawlakaw. Maputi na ang imong buhok, maglisod ka na sa pagsuroysuroy, ug mahanaw ang tanang pangandoy. Mouli kita sa dayon tang puloy-anan, ug may magbakho unya diha sa kadalanan. Mabugto ang platang kadena, mahulog ug mabuak ang bulawang lamparahan; mabugto ang higot sa timba sa atabay, ug madugmok ang tibod nga sudlanag tubig. Unya mopauli sa abog ang atong lawas, ug ang atong espiritu mopauli sa Dios nga maoy naghatag niini kanato. Wala gayoy kapuslanan ang tanan, matod sa maalam. Ang tanan walay kapuslanan.

SALMO RESPONSORYO

Ps. 90: 3-4. 6. 12-13. 14. 17

Sa tanang panahon, O Ginoo, ikaw ang among dalangpanan.

Gipabalik mo ang tawo ngadto sa abog, nagaingon ka, "Balik, O mga anak sa mga tawo." Kay ang usa ka libo ka tuig diha sa imong atubangan ingon og kagahapon lamang, karon nga kadto milabay na, o ingon og usa ka pagbantay sa gabii.

Sa tanang panahon, O Ginoo, ikaw ang among dalangpanan.

Gitapos mo sila diha sa ilang paghikatulog; sa sunod nga buntag sama sila sa mabalhinong balili, nga sa kaadlawon mogitib pag-usab, apan sa pagkagabii malarag ug malaya.

Sa tanang panahon, O Ginoo, ikaw ang among dalangpanan.

Tudloi kami sa matarong nga pag-isip sa among mga adlaw, aron makakab-ot kami og kinaadman sa kasingkasing. Balik na, O Ginoo! Kanus-a pa? Kaloy-i ang imong mga sulugoon.

Sa tanang panahon, O Ginoo, ikaw ang among dalangpanan.

Inig ka kaadlawon pun-a kami sa imong kaluoy aron mosinggit kami sa kasadya ug kalipay sa tanan namong mga adlaw. Ug ang mahigugmaon nga pag-alima sa Ginoo nga atong Dios maato unta; magpausbaw sa buhat sa atong mga kamut alang kanato. (Magpausbaw sa buhat sa atong mga kamut.)

Sa tanang panahon, O Ginoo, ikaw ang among dalangpanan.

PAGBASA SA SANTOS NGA EBANGHELYO SUMALA NI SAN LUKAS

Lk. 9: 43-45

Ug nahibulong ang tanang tawo sa dakong gahom sa Dios. Samtang natingala pa ang mga tawo sa tanan nga gibuhat ni Jesus, miingon siya sa iyang mga tinun-an, "Ayaw kamo kalimot sa akong isulti kaninyo karon. Ang Anak sa Tawo itugyan ngadto sa gahom sa mga tawo." Apan wala sila makasabot sa kahulogan niini. Gililong kini kanila aron dili sila makasabot niini, ug mahadlok sila mangutana kaniya mahitungod niining butanga.