Biyernes sa Ikakawhaa'g Lima nga Semana sa Ordinaryong Panahon

PAGBASA GIKAN SA BASAHON SA ECCLESIASTES

Eccl. 3: 1-11

Ang tanan nga mahitabo dinhi sa kalibutan mahitabo sa panahon nga gitagal sa Dios. Nagtagal siyag panahon sa pagkatawo ug panahon sa pagkamatay; may panahon sa pagtanom, ug panahon sa pag-ibot. May panahon sa pagpatay, ug panahon sa pag-ayo. May panahon sa pagguba, ug panahon usab sa pagtukod. Nagtagal siyag panahon sa kagul-anan, ug panahon sa kalipay; may panahon sa pagbangotan, ug panahon sa pagsayaw. May panahon sa pagpakighilawas, ug panahon sa paglikay niini. May panahon sa paggakos, ug panahon usab sa dili paggakos. Nagtagal siyag panahon sa pagpangita, ug panahon sa pagwala; may panahon sa pagtigom, ug panahon sa pag-usik-usik. May panahon sa paggisi ug panahon sa pagtapak; may panahon sa paghilom, ug panahon sa pagsulti. Nagtagal siyag panahon sa gugma, ug panahon sa kasilag; may panahon sa gubat ug panahon sa kalinaw. Unsa may makuha sa tawo sa tanan niyang kahago? Nasayod ako sa kapalaran nga gitagana kanato sa Dios. Nagtagal siyag hustong panahon alang sa tanang butang. Gihatagan kita niyag kaikag pagsusi sa mahitabo sa umaabot nga panahon, apan wala kita niya hatagig katagbawan sa pagsabot sa hingpit sa iyang gibuhat.

SALMO RESPONSORYO

Ps. 144: 1. 2. 3-4

Daygon ang Ginoo, akong Bato.

Daygon ang Ginoo, ang akong Bato, akong dalangpanan ug akong kota, akong salipdanan, akong manluluwas, akong taming, nga akong gisaligan.

Daygon ang Ginoo, akong Bato.

Ginoo, unsa ba ang tawo, nga imo man siyang gitagad; ang anak sa tawo, nga nagahunahuna ka man kaniya? Ang tawo ingon og usa ka ginhawa; ang iyang mga adlaw sama sa usa ka lumalabay nga anino.

Daygon ang Ginoo, akong Bato.

PAGBASA SA SANTOS NGA EBANGHELYO SUMALA NI SAN LUKAS

Lk. 9: 18-22

Usa ka higayon niana, samtang nag-ampo si Jesus nga siya rang usa, miduol kaniya ang mga tinun-an. "Kinsa man kuno ako sumala sa sulti sa mga tawo?" nangutana siya kanila. "Nag-ingon ang uban nga ikaw mao si Juan nga Magbubunyag," nanubag sila. "Nag-ingon usab ang uban nga ikaw mao si Elias, samtang ang uban pa gayod nag-ingon nga ikaw usa sa mga propeta kaniadto nga nabanhaw." "Ug kamo, unsa may inyong ikasulti? Kinsa man ako?" nangutana siya kanila. Mitubag si Pedro, "Ikaw mao ang Mesiyas nga pinadala sa Dios!" Apan gipinahan sila ni Jesus nga dili gayod manugilon niini kang bisan kinsa, ug midugang siya pag-ingon, "Ang Anak sa Tawo kinahanglan nga mag-antos pag-ayo ug isalikway sa mga punoan sa mga Judio, sa mga kadagkoan sa mga pari, ug sa mga magtutudlo sa Balaod. Patyon siya ug banhawon sa ikatulo ka adlaw."