Huwebes sa Ikakawhaa'g Lima nga Semana sa Ordinaryong Panahon

PAGBASA GIKAN SA BASAHON SA ECCLESIASTES

Eccl. 1: 2-11

Kawang ug walay kapuslanan ang tanan, miingon siya. Sa tibuok mong kinabuhi magtrabaho ug maghago ka, apan unsa may makuha mo niini? Ang usa ka kaliwatan motungha ug unya mahanaw, ug motungha na usab ang laing kaliwatan, apan nagpabilin nga mao gihapon ang kalibutan. Magbalik-balik gihapon pagsidlak ug pagsalop ang adlaw. Mohuros ang hangin ngadto sa habagatan ug unya ngadto sa amihanan—maglibotlibot lamang kini ug unya mobalik sa iyang gigikanan. Ang tanang suba nagdagayday ngadto sa dagat, apan wala gihapon kini mapuno. Mobalik ang tubig ngadto sa tinubdan sa mga suba, ug modagayday na usab kini ngadto sa dagat. Ang tanang butang makahatag ug kalaay—kalaay nga dili matukib sa mga pulong. Dili matagbaw pagtan-aw ang atong mata, ni matagbaw pagpamati ang atong dalunggan. Ang nahitabo kaniadto mahitabo gihapon, ug ang gibuhat kaniadto buhaton gihapon. Wala gayoy bag-o dinhi sa kalibutan. Moingon sila, "Tan-awa, aniay bag-ong butang!" Apan dili kana bag-o. Diha na kana sa wala pa gani kita matawo. Walay nahinumdom sa nahitabo kaniadto, ug hikalimtan ang mahitabo karon ug sa umaabot.

SALMO RESPONSORYO

Ps. 90: 3-4. 5-6. 12-13. 14. 17

Sa tanang panahon, O Ginoo, ikaw ang among dalangpanan.

Gipabalik mo ang tawo ngadto sa abog, nagaingon ka, "Balik, O mga anak sa mga tawo." Kay ang usa ka libo ka tuig sa imong atubangan ingon og kagahapon lamang, karon nga kadto milabay na ug ingon og usa ka pagbantay sa gabii.

Sa tanang panahon, O Ginoo, ikaw ang among dalangpanan.

Gitapos mo sila diha sa ilang paghikatulog, sa sunod nga buntag sama sila sa mabalhinong balili, nga sa kaadlawon mogitib pag-usab, apan sa pagkagabii malaya ug malarag.

Sa tanang panahon, O Ginoo, ikaw ang among dalangpanan.

Tudloi kami sa matarong nga pag-isip sa maong mga adlaw, aron makakab-ot kami og kinaadman sa kasingkasing. Balik na, O Ginoo! Kanus-a pa? Kaloy-i ang imong mga sulugoon.

Sa tanang panahon, O Ginoo, ikaw ang among dalangpanan.

Inigkakaadlawon pun-a kami sa imong kaluoy aron mosinggit kami sa kasadya ug kalipay sa tanan namong mga adlaw. Ug ang mahigugmaon nga pag-alima sa Ginoo nga atong dios maato unta; magpausbaw sa buhat sa atong mga kamut alang kanato. (Magpausbaw sa buhat sa atong mga kamut.)

Sa tanang panahon, O Ginoo, ikaw ang among dalangpanan.

PAGBASA SA SANTOS NGA EBANGHELYO SUMALA NI SAN LUKAS

Lk. 9: 7-9

Si Herodes nga maoy nagmando sa Galilea nakadungog mahitungod sa tanang nanghitabo ug nalibog siya pag-ayo, kay may mga tawo man nga nag-ingon nga nabanhaw si Juan nga Magbubunyag. Nag-ingon usab ang uban nga mibalik si Elias, samtang ang uban miingon pa gayod nga nabuhi ang usa sa mga propeta kaniadto. Miingon si Herodes, "Gipapunggotan ko na si Juan, busa kinsa man diay kining tawhana nga daghan mang butang ang akong hidunggan mahitungod kaniya?" Ug midugang ang iyang tinguha sa pagpakigkita kang Jesus.