[M] San Pio sa Pietrelcina, pari

PAGBASA GIKAN SA BASAHON SA MGA PANULTIHON

Prv. 30: 5-9

"Tumanon gayod sa Dios ang iyang gisaad. Sama siya sa usa ka taming alang niadtong modangop kaniya. Kon moingon ka nga nagsulti siya sa wala niya isulti, ipaila gayod niya ang imong pagkabakakon." O Dios, nangayo ako kanimog duha ka butang. Ihatag intawon kini kanako sa dili pa ako mamatay. Ipahilayo ako sa mga limbong ug bakak, ug ayaw ako himoang dato, ni kabus. Hatagi lamang akog kalan-on nga igo ra sa akong gikinahanglan. Kay kon hatagan mo akog sobra, tingali unyag moingon ako nga wala ko na ikaw kinahanglana. Apan kon kabus usab ako, tingalig matintal ako sa pagpangawat ug mapakaulawan ko ang Dios.

SALMO RESPONSORYO

Ps. 119: 29. 72. 89. 101. 104. 163

Ang imong pulong, O Ginoo, usa ka suga alang sa akong mga tiil.

Kuhaa kanako ang dalan sa kabakakan, ug hatagi ako sa imong balaod.

Ang imong pulong, O Ginoo, usa ka suga alang sa akong mga tiil.

Ang balaod sa imong ba-ba alang kanako mas bililhon kay sa linibo nga bulawan ug salapi.

Ang imong pulong, O Ginoo, usa ka suga alang sa akong mga tiil.

Ang imong pulong, O Ginoo, nagalungtad sa kahangturan; malig-on kini sama sa kalangitan.

Ang imong pulong, O Ginoo, usa ka suga alang sa akong mga tiil.

Sa tanang dautang dalan gilikay ko ang akong mga tiil, aron maampingan ko ang imong mga pulong.

Ang imong pulong, O Ginoo, usa ka suga alang sa akong mga tiil.

Pinaagi sa imong kasugoan nakab-ot ko ang puangod; busa gikayugtan ko ang tanang bakak nga dalan.

Ang imong pulong, O Ginoo, usa ka suga alang sa akong mga tiil.

Ang bakak gidumtan ko ug gikayugtan; ang imong balaod akong gihigugma.

Ang imong pulong, O Ginoo, usa ka suga alang sa akong mga tiil.

PAGBASA SA SANTOS NGA EBANGHELYO SUMALA NI SAN LUKAS

Lk. 9: 1-6

Gitigom ni Jesus ang napulog-duha ka tinun-an ug iyang gihatagan silag gahom ug awtoridad sa paghingilin sa tanang mga yawa ug sa pag-ayo sa mga sakit. Unya iyang gisugo sila aron magsangyaw bahin sa Gingharian sa Dios ug mag-ayo sa mga masakiton. Miingon siya kanila, "Sa inyong panaw, ayaw kamo pagdalag bisan unsa: ayaw pagdalag sungkod, ni puntil sa limos, ni pagkaon, ni salapi, ug bisan ganig ilisan. Bisan asang balaya kamo dawaton, pabilin kamo didto hangtod sa inyong pagbiya niadtong lungsora; ug bisan diha nga ang mga tawo dili modawat kaninyo, biyai kanang lungsora ug taktaka ang abog sa inyong mga tiil agig pasidaan kanila." Migikan ang mga tinun-an ug miadto sa tanang balangay; nagsangyaw sila sa Maayong Balita ug giayo nila ang mga masakiton.