Martes sa Ikakawhaa'g Lima nga Semana sa Ordinaryong Panahon

PAGBASA GIKAN SA BASAHON SA MGA PANULTIHON

Prv. 21: 1-6. 10-13

Dumalahon sa Ginoo ang hunahuna sa usa ka hari ingon kasayon sa pagdumala niya sa dagan sa usa ka sapa. Bisan pag naghunahuna ka nga husto ang tanan mong gibuhat, ayaw hikalimti nga hukman sa Ginoo ang imong mga tuyo. Palabihon sa Ginoo nga buhaton mo ang matarong ug ang kaangayan kay sa maghalad ka kaniyag mga mananap. Gigamhan ang mga tawong dautan sa ilang pagkamapahitas-on ug garbo ug kini sala. Ayoha gayod paglaraw ug madato ka. Kon magdalidali ka kanunay makulangan ka sa imong gikinahanglan. Ang bahandi nga imong mabatonan pinaagi sa limbong dali rang mahanaw, ug maghatod kini kanimo ngadto sa kamatayon. Ang dautang mga tawo kanunayng nangandoy sa dautan; ug wala silay kukaluoy kang bisan kinsa. Sa dihang silotan na ang tawong mapahitas-on, makakuhag pagtulon-an bisan gani ang mga hungog. Ang tawong maalamon, makat-on sa itudlo kaniya. Ang Dios ang matarong nasayod sa gihunahuna sa mga tawong dautan, ug siya maoy molaglag kanila. Kon dili mo tagdon ang pangaliyupo sa mga kabus, dili usab pamati-on ang imong pagpakitabang.

SALMO RESPONSORYO

Ps. 119: 1. 27. 30. 34. 35. 44

Agaka ako, Ginoo, diha sa dalan sa imong kasugoan.

Bulahan sila kansang paagi walay ikasaway, nga nagalakat diha sa balaod sa Ginoo.

Agaka ako, Ginoo, diha sa dalan sa imong kasugoan.

Pasabta ako sa dalan sa imong kasugoan, ug palandongon ko ang imong katingalahang mga buhat.

Agaka ako, Ginoo, diha sa dalan sa imong kasugoan.

Gipili ko ang dalan sa kamatuoran: gibutang ko ang imong mga gimbut-an sa akong atubangan.

Agaka ako, Ginoo, diha sa dalan sa imong kasugoan.

Tagai akog puangod, aron tumanon ko ang imong sugo ug ampingan ko kini sa tibuok kong kasingkasing.

Agaka ako, Ginoo, diha sa dalan sa imong kasugoan.

Unahi ako diha sa dalan sa imong kasugoan, kay nalipay ako niini.

Agaka ako, Ginoo, diha sa dalan sa imong kasugoan.

Ug tumanon ko ang imong balaod sa kanunay, hangtod sa kahangturan.

Agaka ako, Ginoo, diha sa dalan sa imong kasugoan.

PAGBASA SA SANTOS NGA EBANGHELYO SUMALA NI SAN LUKAS

Lk. 8: 19-21

Unya miadto kang Jesus ang iyang inahan ug mga igsuong lalaki, apan wala sila makaduol kaniya tungod sa kadaghan sa mga tawo. Ug may miingon kang Jesus, "Atua nagtindog sa gawas ang imong inahan ug mga igsuon ug buot sila makigkita kanimo." Miingon si Jesus kanilang tanan, "Ang akong inahan ug mga igsuon mao kadtong mamati sa Pulong sa Dios ug magtuman niini."