[F] San Mateo, apostol ug ebanghelista

PAGBASA GIKAN SA SULAT NI SAN PABLO NGADTO SA TAGA-EFESO

Eph. 4: 1-7. 11-13

Ako nga binilanggo tungod kay nag-alagad ako sa Ginoo, mag-awhag kaninyo sa pagkinabuhi nga angay gayod sa buluhaton sa mga tinawag sa Dios. Pagmapaubsanon kamo, pagmaaghop, ug pagmapailubon kanunay. Ipakita ang inyong gugma pinaagi sa pagtinabangay. Paningkamoti aron motunhay ang inyong panaghiusa nga hinatag sa Espiritu, pinaagi sa panagdait nga nagbugkos kaninyo. May usa lamang ka lawas usa ka Espiritu, ingon nga may usa lamang ka paglaum ug alang niini gitawag kamo sa Dios. May usa lamang ka Ginoo, usa ka pagtuo, ug usa ka bunyag; may usa lamang ka Dios ug Amahan sa tanang mga tawo, nga mao ang labaw sa tanan ug nagbuhat pinaagi sa tanan ug anaa sa tanan. Ang matag usa kanato gihatagan og gasa sumala sa gibahinbahin ni Cristo. Ang mga gasa niya mao nga ang uban iyang gihimog mga apostoles, ang uban mga propeta, ang uban mga ebanghelista, ang uban mga pastor ug mga magtutudlo. Gihimo niya kini aron pag-andam sa tibuok katawhan sa Dios alang sa buluhaton sa Cristohanong pag-alagad, aron motubo ang lawas ni Cristo. Ug magkahiusa kitang tanan sa pagtuo ug sa atong kahibalo mahitungod sa Anak sa Dios. Unya mahingkod kita ingon sa kahingkod ni Cristo.

SALMO RESPONSORYO

Ps. 19: 2-3. 4-5

Ang ilang mensahe mikaylap sa tibuok kalibutan.

Ang kalangitan nagpahayag sa himaya sa Dios, ug ang kapanganoran nagsangyaw sa buhat sa iyang kamut. Ang matag-adlaw nag-asoy niini ngadto sa sunod adlaw, ug ang matag-gabii ngadto sa sunod gabii.

Ang ilang mensahe mikaylap sa tibuok kalibutan.

Walay sulti o pulong kansang tingog wala mabati. Sa tibuok kalibutan nadungog ang ilang tingog, ug ngadto sa kinatumyan sa kayutaan ang ilang mensahe.

Ang ilang mensahe mikaylap sa tibuok kalibutan.

PAGBASA SA SANTOS NGA EBANGHELYO SUMALA NI SAN MATEO

Mt. 9: 9-13

Unya mibiya si Jesus niadtong dapita, ug samtang naglakat siya, nakita niya ang usa ka kobrador sa buhis nga ginganlag Mateo, nga naglingkod sulod sa iyang opisina. Miingon si Jesus kaniya, "Sunod kanako!" Ug mitindog si Mateo ug misunod kaniya. Samtang nagkaon si Jesus didto sa balay ni Mateo, may daghang kobrador sa buhis ug mga makasasala nga miduol ug misalo kaniya ug sa iyang mga tinun-an. Nakakita niini ang pipila ka mga Pariseo ug miingon sa iyang mga tinun-an, "Nganong nakigsalo man ang inyong Magtutudlo sa mga kobrador sa buhis ug sa mga makasasala?" Nakadungog si Jesus kanila ug mitubag, "Ang mga tawo nga walay sakit wala magkinahanglag doktor, kondili ang masakiton ra. Lakat ug susiha ninyo kon unsay kahulugan niining bahina sa Kasulatan nga nag-ingon, 'Wala ako magkinahanglan og mga halad nga mananap, kondili kaluoy.' Kay wala ako moanhi aron pagtawag sa mga matarong, kondili sa mga makasasala."