Ikakawhaa'g Lima nga Domingo sa Ordinaryong Panahon

PAGBASA GIKAN SA BASAHON NI PROPETA ISAIAS

Is. 55: 6-9

Pangitaa ninyo ang Ginoo samtang siya hikaplagan pa, sangpita ninyo siya, samtang siya duol pa; pabiyaa ang mga dautan sa ilang sala ug ipasalikway sa mga makasasala ang ilang dautang hunahuna. Pabalika sila sa Ginoo aron kaloy-an sila. Pabalika sa atong Dios, kay andam siya sa pagpasaylo. "Kay ang akong hunahuna dili sama sa inyong hunahuna, ni ang akong mga laraw sama sa inyong mga laraw, nag-ingon ang Ginoo. Kay ingon nga ang kalangitan habog kay sa yuta, ang akong mga laraw habog kay sa inyong mga laraw, ug ang akong hunahuna kay sa inyong hunahuna."

SALMO RESPONSORYO

Ps. 145: 2-3. 8-9. 17-18

Haduol ang Ginoo sa tanan nga nagasangpit kaniya.

Himayaon ko ikaw adlaw-adlaw, ug daygon ko ang imong ngalan hangtod sa kahangturan. Dako ang Ginoo ug angay gayod siyang daygon; ang iyang kadako dili matukib.

Haduol ang Ginoo sa tanan nga nagasangpit kaniya.

Ang Ginoo maayo ug maluluy-on, dugay nga masuko ug dako sa kaluoy. Ang Ginoo maayo alang sa tanan ug maluluy-on sa tanan niyang mga binuhat.

Haduol ang Ginoo sa tanan nga nagasangpit kaniya.

Ang Ginoo matarong diha sa tanan niyang mga paagi ug balaan diha sa tanan niyang mga buhat. Ang Ginoo haduol sa tanan nga nagsangpit kaniya, sa tanan nga nagasangpit kaniya diha sa kamatuoran.

Haduol ang Ginoo sa tanan nga nagasangpit kaniya.

PAGBASA GIKAN SA SULAT NI SAN PABLO NGADTO SA TAGA-FILIPOS

Phil. 1: 20-24. 27

Ang dako kong tinguha ug paglaum mao nga dili ko gayod pakyason pagtuman ang akong katungdanan, kondili magmaisog ako sa tanang panahon, labi na gayod ning panahona aron makapasidungog ako kang Cristo, buhi ako o patay. Kay alang kanako ang kinabuhi mao si Cristo, ug ang kamatayon maghatag kanakog dugang kaayohan. Apan kon buhi ako, makahimo akog mas mapuslanon nga buhat, busa wala ako masayod hain niini ang akong pilion. Naglibog gayod ako kon unsay akong pilion. Buot ako mobiya ning kinabuhia ug makig-uban kang Cristo, nga mas maayo alang kanako; apan labi pang maayo alang kaninyo nga buhi ako. Nan karon, ang hinungdanon mao nga magkinabuhi kamo sumala sa Ebanghelyo ni Cristo, aron bisag dili ako makaanha kaninyo, madungog ko nga nagpabilin kamo nga lig-on diha sa usa ka tuyo, ug maghiusa kamo pagpalambo sa Ebanghelyo.

PAGBASA SA SANTOS NGA EBANGHELYO SUMALA NI SAN MATEO

Mt. 20: 1-16

Si Jesus misugilon sa iyang mga tinun-an niining sambingaya: "Ang Gingharian sa langit sama sa tag-iya sa usa ka parasan nga sayo sa buntag milakaw aron pagpangitag mga tawo nga iyang patrabahoon. Miuyon siya paghatag kanila sa naandang suhol nga usa ka denario ang adlaw, ug gipadala sila ngadto sa iyang parasan. Sa pagka-alas nuybe, miadto na usab siya sa merkado ug didto nakita niya ang pipila ka tawo nga nagtindog nga walay buhat, busa miingon siya kanila, 'trabaho usab kamo sa akong parasan, ug hatagan ko kamog hustong suhol.' Ug nangadto sila. Unya sa pagka-alas dose ug sa pagka-alas tres mao gihapon ang iyang gihimo. Hapit na kadto mo-alas singko nga miadto siya sa merkado ug didto nakakita siyag laing pipila ka tawo nga walay buhat. Siya nangutana kanila, 'Nganong giusikan man ninyo ang tibuok adlaw?' Sila nanubag, 'Kay wala may mipatrabaho kanamo,' Ug miingon siya kanila, 'Kon mao kana, trabaho usab kamo didto sa akong parasan.' Sa pagkasawomsawom na, ang tag-iya miingon sa iyang kapatas, 'Tawga ang mga mamumoo ug hatagi sila sa ilang suhol; unaha pagsuhol kadtong ulahing gipatrabaho ug ipaulahi kadtong unang gipatrabaho.' Ang mga tawo nga misugod pagtrabaho sa alas singko sa hapon, gisuholan og usa ka denario ang matag usa kanila. Busa sa pagduol na sa mga tawo nga unang gipatrabaho, nagtuo sila nga labaw pa ang ilang madawat; apan ang usag-usa kanila gihatagan usab og tagsa ka denario. Gidawat nila ang ilang suhol ug nagbagutbot sila batok sa agalon. Miingon sila, 'Kining mga tawhana nga ulahi mong gipatrabaho nagtrabaho lamang sulod sa usa ka oras, samtang kami nagtrabaho sa tibuok adlaw ug napagba sa kainit. Apan bisan pa niini imo silang gihatagag samang suhol nga imong gihatag kanamo.' Ang agalon mitubag sa usa kanila, 'Migo, pamati. Wala ako maglimbong kanimo, kay miuyon ka man sa suhol nga usa ka denario ang adlaw. Karon, dawata ang imong suhol ug pauli sa inyo. Maoy akong gusto nga kining tawhana nga ulahing gipatrabaho hatagan sa samang suhol nga akong gihatag kanimo. Wala ba diay akoy katungod sa paggamit sa akong kuwarta sumala sa akong gusto? O nasina ka ba hinoon kay ako manggihatagon man?'" Ug gitapos ni Jesus ang sambingay sa pag-ingon, "Busa kadtong naulahi mahiuna, ug kadtong nahiuna maulahi."