Sabado sa Ikakawhaa'g Upat nga Semana sa Ordinaryong Panahon

PAGBASA GIKAN SA UNANG SULAT NI SAN PABLO NGADTO SA TAGA-CORINTO

1 Cor. 15: 35-37. 42-49

Apan adunay mangutana, "Unsaon man pagkabanhaw sa mga patay? Unsa mang lawasa ang ilang maangkon?" Mga buangbuang! Inigpugas ninyog binhi, dili kini moturok gawas kon mamatay una kini. Ug ang gipugas ninyo usa lamang ka liso, tingali binhi sa trigo, og uban pang binhi, ug dili hingkod na nga tanom. Ingon niini ang mahitabo sa panahon nga banhawon na ang mga patay. Ang lawas nga ilubong madunot, apan sa pagkabanhaw na niini, dili na kini madunot. Sa dihang gilubong, ngil-ad ug huyang kini; apan inigbanhaw niini, matahum na ug lig-on. Iniglubong niini, lawas kini nga yutan-on; apan inigkabanhaw niini, lawas na nga espirituhanon. Kay ang Kasulatan nag-ingon, "Ang unang tawo nga si Adan gibuhat nga buhi," apan ang katapusang Adan mao ang Espiritu nga naghatag ug kinabuhi. Dili maoy moabot pag-una ang espirituhanon, kondili ang lawasnon ug mosunod ang espirituhanon. Gihimo gikan sa abog sa yuta ang unang Adan; ang ikaduhang Adan mianhi gikan sa langit. Ang yutan-on sama sa hinimo gikan sa yuta, ug ang langitnon sama niadtong mianhi gikan sa langit. Ingon nga nagsul-ob kita sa dagway sa tawo nga hinimo gikan sa yuta, magsul-ob usab kita sa dagway sa Tawo nga gikan sa langit.

SALMO RESPONSORYO

Ps. 56: 10-12. 13-14

Maglakaw ako sa atubangan sa Dios, uban sa kahayag sa mga buhi.

Karon nasayod ako nga ang Dios uban diay kanako. Sa Dios, kansang saad nagahimaya ako, sa Dios nagasalig ako sa walay kahadlok; unsay mahimo sa tawo batok kanako?

Maglakaw ako sa atubangan sa Dios, uban sa kahayag sa mga buhi.

Nabugkosan ako, O Dios, sa mga panaad ngadto kanimo; tumanon ko ang imong mga halad sa pasalamat. Kay giluwas mo ako sa kamatayon, ang ako usab nga mga tiil, sa pagkalukapa; aron maglakaw ako atubangan sa Dios diha sa kahayag sa mga buhi.

Maglakaw ako sa atubangan sa Dios, uban sa kahayag sa mga buhi.

PAGBASA SA SANTOS NGA EBANGHELYO SUMALA NI SAN LUKAS

Lk. 8: 4-15

Daghang mga tawo gikan sa kalungsoran nangadto kang Jesus ug sa nagkapundok na sila, iyang gisulti kining sambingaya: "May usa ka tawo nga miadto sa uma aron pagpugas og mga binhi. Samtang nagsabod siya, pipila sa mga binhi nahulog diha sa agianan diin gitunobtunoban kini sa mga tawo ug gituka sa mga langgam. Nahulog ang uban sa yutang batoon ug sa pagturok niini, nalaya kay wala nay kaumog ang yuta. Ang ubang binhi nahulog sa dapit sa mga sampinit, apan natuok sa mga sampinit nga mitubo uban niini. Ug ang ubang binhi nahulog sa maayong yuta; mitubo kini ug namungag usa ka gatos ka uhay ang matag binhi." Unya midugang si Jesus pag-ingon, "Busa pamati kon may dalunggan kamo!" Nangutana ang mga tinun-an ni Jesus unsay buot ipasabut sa maong sambingay. Ug mitubag si Jesus, "Ang pagsabut sa mga tinago bahin sa Gingharian sa Dios gihatag na kaninyo; apan sa uban gihatag kini pinaagig sambingay aron kon motan-aw sila dili makakita, ug kon mamati, dili makasabut." "Mao kini ang kahulogan sa sambingay: ang binhi mao ang pulong sa Dios. Ang binhi nga nahulog sa agianan mao kadtong mga tawo nga nakadungog sa Pulong sa Dios; apan mitungha ang Yawa ug misakmit niini gikan sa ilang kasingkasing aron dili sila motuo ug unya maluwas. Ang binhi nga nahulog sa yutang batoon mao kadtong nakadungog sa mensahe ug malipayong midawat niini, apan wala kini makagamot sa ilang kasingkasing. Mituo lamang sila sa makadiyot ug unya namiya sa panahon sa pagsulay. Ang binhi nga nahulog dapit sa mga sampinit mao kadtong namati sa Pulong sa Dios; apan ang mga kabalaka ug mga bahandi ingon man ang mga kahilayan niining kinabuhia mituok kanila ug wala gayod sila kahinogig bunga. Ang binhi nga nahulog sa maayong yuta mao kadtong nakadungog sa mensahe ug midawat ug mituman niini, ug magpadayon hangtod nga mamunga sila."