Biyernes sa Ikakawhaa'g Upat nga Semana sa Ordinaryong Panahon

PAGBASA GIKAN SA UNANG SULAT NI SAN PABLO NGADTO SA TAGA-CORINTO

1 Cor. 15: 12-20

Karon, sanglit ang atong mensahe mao nga si Cristo gibanhaw, unsaon man pag-ingon sa pipila kaninyo nga ang mga patay dili banhawon? Kon mao kana, wala diay banhawa si Cristo; ug kon wala banhawa si Cristo, kawang lamang ang among giwali ug kawang usab ang inyong pagtuo. Ug labaw pa niana, makita nga namakak kami sa Dios kay nag-ingon man kami nga gibanhaw niya si Cristo—apan wala diay banhawa sa Dios kon ugaling matuod man nga ang mga patay dili banhawon. Ug kon dili banhawon ang mga patay, wala usab banhawa si Cristo. Ug kon wala banhawa si Cristo, kawang lamang ang inyong pagtuo ug makasasala gihapon kamo. Nagpasabot usab kini nga mangalaglag ang mga nagtuo kang Cristo nga nangamatay na. Kon ang atong paglaum kang Cristo ania ra niining kinabuhia, nan, kita ang labing makaluluoy sa tanang mga tawo. Apan ang tinuod mao nga gibanhaw si Cristo, ingon nga pasalig nga kadtong nangamatay banhawon usab.

SALMO RESPONSORYO

Ps. 17: 1. 6-7. 8. 15

Ginoo, inigpakita sa imong himaya, mahingpit ang akong kalipay.

Pamati-a, O Ginoo, ang usa ka matarong nga hangyo; patalinghugi ang akong pangaliya; pamati-a ang akong mga pangamuyo nga gikan sa mga ngabil nga way limbong.

Ginoo, inigpakita sa imong himaya, mahingpit ang akong kalipay.

Nagasangpit ako kanimo, kay tubagon mo man ako, O Dios; ipaabong ang imong dalunggan kanako; pamatia ang akong pulong. Ipakita ang imong katingalahang kaayo, O manunubos kanila nga nanagan gikan sa ilang mga kaaway aron pagdangop sa imong tuong kamut.

Ginoo, inigpakita sa imong himaya, mahingpit ang akong kalipay.

Tagoi ako diha sa landong sa imong mga pako. Makatarunganon nga mosud-ong ako sa imong nawong; sa akong pagmata, malipay ako diha sa imong atubangan.

Ginoo, inigpakita sa imong himaya, mahingpit ang akong kalipay.

PAGBASA SA SANTOS NGA EBANGHELYO SUMALA NI SAN LUKAS

Lk. 8: 1-3

Wala madugay, miadto si Jesus sa kalungsoran ug sa kabalangayan, nagwali sa Maayong Balita mahitungod sa Gingharian sa Dios. Mikuyog kaniya ang napulog-duha ka tinun-an, ug pipila sa mga babaye nga naayo gikan sa daotang mga espiritu ug sa mga balatian; sila mao si Maria (nga ginganlag Magdalena) nga gikan kaniya gipagula ang pito ka yawa; si Juana, ang asawa ni Cusa nga opisyal ni Herodes; si Susana, ug kapid-an pang mga babaye nga mitabang kang Jesus ug sa iyang mga tinun-an pinaagi sa ilang katigayonan.