Huwebes sa Ikakawhaa'g Upat nga Semana sa Ordinaryong Panahon

PAGBASA GIKAN SA UNANG SULAT NI SAN PABLO NGADTO SA TAGA-CORINTO

1 Cor. 15: 1-11

Mga igsuon, pahinumdoman ko kamo sa Maayong Balita nga giwali ko kaninyo ug inyong gidawat, nga maoy nakapalig-on sa inyong pagtuo. Mao kana ang Ebanghelyo, ang mensahe nga akong giwali kaninyo. Maluwas kamo pinaagi sa Ebanghelyo kon magpabilin kamo niini nga malig-on—gawas kon taphaw lamang ang inyong pagtuo. Gitudlo ko kaninyo ang akong nadawat nga hinungdanon kaayo, ug kini mao nga si Cristo namatay alang sa atong mga sala, sumala sa nahisulat sa Kasulatan; gilubong siya ug sa ikatulo ka adlaw gibanhaw sumala sa nahisulat sa Kasulatan; ug nga nagpakita siya kang Pedro, ug unya sa napulog duha ka mga apostoles. Unya sa usa ka higayon, nagpakita siya sa kapin sa lima ka gatos sa iyang mga sumusunod, ug kadaghanan kanila buhi pa. Unya nagpakita siya kang Santiago ug sa tanang mga apostoles. Ug sa katapusan nagpakita usab siya kanako-bisan tuod natawo ako sa talagsaong paagi. Kay ako ang labing ubos sa tanang mga apostoles—dili gani ako angay nga tawgog apostol kay gilutos ko man ang simbahan sa Dios. Apan pinaagi sa grasya sa Dios, ako nahimong mao ako karon, ug ang grasya nga iyang gihatag kanako wala gayod makawang. Labaw akong naghago kay sa ubang mga apostoles, bisan tuod dili kini bunga sa akong pagpaningkamut kondili sa grasya sa Dios nga nagbuhat sa sulod nako. Busa dili hinungdanon kon kini gikan ba kanako o kanila, kondili nga kini mao ang giwali ug inyong gituohan.

SALMO RESPONSORYO

Ps. 118: 1-2. 16-17. 28

Pasalamati ang Ginoo, kay siya maayo.

Pasalamati ang Ginoo, kay siya maayo, kay ang iyang kaluoy nagalungtad hangtod sa kahangturan. Pasultiha ang balay ni Israel, "Ang iyang kaluoy nagalungtad sa kahangturan."

Pasalamati ang Ginoo, kay siya maayo.

Ang tuong kamut sa Ginoo gibayaw; ang tuong kamut sa Ginoo mibakyaw uban sa gahom. Dili ako mamatay, kondili mabuhi, ug isangyaw ko ang mga buhat sa Ginoo.

Pasalamati ang Ginoo, kay siya maayo.

Ikaw ang akong Dios, ug nagapasalamat ako kanimo; O Dios ko, gibayaw ko ikaw. Nagapasalamat ako kanimo tungod kay gipatalinghugan mo ako, ug ikaw ang nagluwas kanako.

Pasalamati ang Ginoo, kay siya maayo.

PAGBASA SA SANTOS NGA EBANGHELYO SUMALA NI SAN LUKAS

Lk. 7: 36-50

Unya may usa ka Pariseo nga midapit kang Jesus sa pagpangaon. Busa miadto si Jesus sa balay sa Pariseo ug nakigsalo kaniya. Niadtong lungsora may usa ka babaye nga daotag kinabuhi. Sa iyang pagkadungog nga si Jesus nagkaon didto sa balay sa Pariseo, miadto siya dala ang usa ka tibod nga alabastro nga puno sa pahumot. Samtang diha siya sa luyo ni Jesus dapit sa tiilan, mihilak siya ug nahumod sa iyang mga luha ang mga tiil ni Jesus. Unya gipahiran niya sa iyang buhok ang mga tiil ni Jesus, ug gihagkan ug gibuboan sa pahumot. Sa pagkakita niini sa Pariseo nga nagdapit kang Jesus, miingon siya sa iyang kaugalingon, "Kon kining tawhana tinuod pa nga propeta, makaila unta siya kon kinsa kining babaye nga mihikap kaniya, ug unsa ka daotan ang iyang kinabuhi!" Apan miingon si Jesus kaniya, "Simon, aduna akoy isulti kanimo." Si Simon mitubag, "Sige, Magtutudlo, sultihi ako." "May duha ka tawo nga nakautang sa usa ka tigpahulam og kuwarta," miingon si Jesus. "Ang usa nakautang og kinyentos ka denario ug ang usa singkwenta. Apan kay silang duha dili man makabayad, gipapas na lamang ang ilang utang. Karon, kinsa man sa duha ang labaw nga mahigugma sa nagpahulam kanila?" "Sa akong hunahuna," mitubag si Simon, "kadtong dakog utang." "Husto ang imong tubag," matod ni Jesus. Unya milingi siya sa babaye ug miingon kang Simon, "Nakita mo ba kining babaye? Mianhi ako sa inyo, ug wala mo ako hatagig tubig aron ihugas sa akong mga tiil, apan gihugasan niya ang akong mga tiil sa iyang mga luha ug gipahiran sa iyang buhok. Wala mo ako hagki sa imong pgdawat kanako, apan nagpunay siyag halok sa akong mga tiil sukad sa akong pag-abot. Wala mo hisuig lana ang akong ulo, apan iyang giagwahan ang akong mga tiil. Busa sultihan ko ikaw nga ang dakong gugma nga iyang gipakita nagmatuod nga gipasaylo na ang daghan niyang mga sala. Kinsa kadtong gipasaylo sa diyotayng mga sala nagpakita og diyotay lamang nga paghigugma." Unya giingnan ni Jesus ang babaye, "Gipasaylo na ang imong mga sala." Ug ang uban nga didto sa kan-anan miingon sa ilang kaugalingon, "Kinsa ba kining tawhana nga nagpasaylog mga sala?" Apan miingon si Jesus sa babaye, "Ang imong pagtuo nagluwas kanimo; pauli nga malinawon."