[M] San Cornelio, papa, ug San Cipriano, obispo, mga martir

PAGBASA GIKAN SA UNANG SULAT NI SAN PABLO NGADTO SA TAGA-CORINTO

1 Cor. 12: 31 - 13: 13

Busa tinguhaa ninyo ang mga hiyas nga labi pang importante. Apan ang labing maayo sa tanan mao kining mosunod nga paagi. Mahimo nga makasulti ka sa nagkalainlaing pinulongan sa mga tawo ug bisan sa mga anghel, apan kon wala akoy gugma, sama ra ako sa masaba nga agong ug sa piyangpiyang nga nagtagingting. Bisan may hiyas ako sa pagwali nga dinasig, ug makabaton sa tanang kahibalo ug makasabot sa tanang tinago; bisag may pagtuo ako nga makapabalhin sa mga bukid—apan kon wala akoy gugma, wala akoy kapuslanan. Bisag ipanghatag ko pa ang tanan nga ania kanako ug ipasunog ang akong lawas, apan kon wala akoy gugma, wala kini kapuslanan. Ang gugma mapailubon ug maluluy-on; ang gugma dili masinahon ni tigpasikat o garboso; ang gugma dili bastos o hakog, o suk-anon; ang gugma dili madinumtanon; ang gugma dili malipay sa dautan, kondili sa kamatuoran. Ang gugma mapailubon, matinuohon, malaumon ug molahutay gayod. Ang mga dinasig nga mensahe lumalabay lamang; ang mga hiyas sa pagsulti mawala; ang kahibalo mahanaw, apan dili gayod matapos ang gugma. Kay ang atong kaalam ug dinasig nga mga mensahe dili hingpit, apan kon ang hingpit moabot na, kadtong dili hingpit mawala. Sa bata pa ako, ang akong sinultihan, pagbati ug panghunahuna binata; apan karon nga hamtong na ako, dili na ako magbinata. Ang atong nakita karon sama lamang sa hanap nga panagway diha sa salamin; apan unya maklaro na gayod nato ang tanan. Ang nahibaloan ko karon tipik lamang, apan mahingpit ra unya kini, sama kahingpit sa kahibalo sa Dios bahin kanako. Pagkakaron kining tulo magpabilin: pagtuo, paglaum, ug gugma; apan ang labing dako niini mao ang gugma.

SALMO RESPONSORYO

Ps. 33: 2-3. 4-5. 12. 22

Bulahan ang katawhan nga gipili sa Ginoo aron maiyaha.

Pasalamati ang Ginoo diha sa alpa; sa lira nga napulog koldas, awita ang iyang mga pagdayeg. Awiti siyag usa ka bag-ong awit; ayoha pagkablit ang mga koldas, uban sa mga singgit sa kalipay.

Bulahan ang katawhan nga gipili sa Ginoo aron maiyaha.

Kay matarong ug ang tanan niyang mga buhat kasaligan. Mahigugma siya sa husto ug matarong; sa kaluoy sa Ginoo napuno ang yuta.

Bulahan ang katawhan nga gipili sa Ginoo aron maiyaha.

Bulahan ang nasod kansang Dios mao ang Ginoo, ang katawhan nga iyang gipili alang sa iyang kaugalingong kabilin. Ang imong kaluoy, O Ginoo, maania unta kanamo nga nagabutang sa among paglaum diha kanimo.

Bulahan ang katawhan nga gipili sa Ginoo aron maiyaha.

PAGBASA SA SANTOS NGA EBANGHELYO SUMALA NI SAN LUKAS

Lk. 7: 31-35

Si Jesus miingon ngadto sa katawhan, "Karon, sa unsa ko itandi ang katawhan niining panahona? Sa unsa sila nahisama? Sama sila sa kabataan nga nagyampungad sa merkado. Ang usa ka pundok mosinggit ngadto sa laing pundok, 'Gitugtog na namo ang honi sa kasal, apan wala kamo mosayaw! Giawit namo ang alawiton sa paglubong, apan wala kamo magminatay!' Mianhi si Juan nga Magbubunyag ug nagpuasa siya ug wala moinom og bino, apan kamo miingon, 'Giyawaan siya!' Mianhi ang Anak sa Tawo, ug siya mikaon ug miinom, apan kamo miingon, 'Tan-awa kining tawhana! Ulit ug palainom siya, ug higala sa mga kobrador sa buhis ug sa mga makasasala.' Apan bisan pa niini, ang kaalam sa Dios giila nga tinuod sa tanan nga midawat niini.