[M] Santa Maria, Birhen sa Kasakit

PAGBASA GIKAN SA SULAT NGADTO SA MGA HEBREO

Heb. 5: 7-9

Sa dinhi pa siya sa kalibotan, nag-ampo ug nangaliyupo si Jesus uban sa makusog nga pagtuwaw ug mga luha ngadto sa Dios nga may gahom sa pagluwas kaniya sa kamatayon. Tungod kay mapaubsanon ug buotan man siya, gidungog siya sa Dios. Apan bisan siya mao ang Anak sa Dios nakakat-on siya sa pagkamasinugtanon pinaagi sa iyang mga pag-antos. Sanglit nahingpit man siya, nahimo siyang tinubdan sa dayon nga kaluwasan alang sa tanan nga masinugtanon kaniya.

SALMO RESPONSORYO

Ps. 31: 2-3. 3-4. 5-6. 15-16. 20

O Ginoo, luwasa ako diha sa imong makanunayon nga gugma.

O Ginoo, nagadangop ako kanimo; ayaw itugot nga ako kaulawan. Sa imong katarong luwasa ako; ipaabong ang imong dunggan kanako, dali aron pagluwas kanako.

O Ginoo, luwasa ako diha sa imong makanunayon nga gugma.

Pagpakahimong akong bato nga dalangpanan, usa ka kota nga maghatag kanakog kasiguroan. Ikaw ang akong bato ug akong salipdanan; tungod sa imong ngalan imo akong dad-on ug tultolan.

O Ginoo, luwasa ako diha sa imong makanunayon nga gugma.

Luwason mo ako gikan sa lit-ag nga ilang giladlad kanako kay ikaw man ang akong dalangpanan. Sa imong mga kamut gitugyan ko ang akong espiritu; luwason mo ako, O Ginoo, O Dios nga matinumanon.

O Ginoo, luwasa ako diha sa imong makanunayon nga gugma.

Apan ang akong pagsalig anaa kanimo, O Ginoo nagaingon ako, "Ikaw ang akong Dios." Diha sa imong mga kamut anaa ang akong destino luwason mo ako gikan sa gahom sa akong mga kaaway ug akong mga manggugukod.

O Ginoo, luwasa ako diha sa imong makanunayon nga gugma.

Pagkadako sa kaayo, O Ginoo nga imong gitagana alang kanila nga mahadlokon kanimo. Ug nga, kanila nga nagadangop kanimo, imong gipakita atubangan sa katawhan.

O Ginoo, luwasa ako diha sa imong makanunayon nga gugma.

SEKWENSYA — Stabat Mater (Optional)

Si Maria nga Inahan nagabakho sa tiilan ni Jesus diha sa Krus. Ang dughan niya gilapsan sa bangkaw sa kapaitan tungod sa mga sala. Daw ang dagat sa kasubo, kalag niya nag-agulo sa kasakitan sa Dios. Nadungog niya ang hampak nga sa lawas nahabundak sa Ginoong wa’y sala. Naluya siya pagsud-ong sa tunok nga purongpurong sa Korderong maaghop. Sa pagyubit ug pagtamay sa mabangis nga kaaway saksi siya sa tanan. Nalooy siya pagtan-aw sa abog, samad ug luha nga nagngil-ad kang Jesus. Sa kang Kristong pagkapukan, pagtabang siya gidad-an sa kalooy nga dako. Sa mata niya mibaha ang pait nga magaluha sa pagtan-aw sa Anak. Ang Inahan nga maisog sa kalbaryo nakakuyog sa pag-unong sa Anak. O Maria! Ako’y sad-an kang Jesus nga kasakitan, pasayloon mo ako. Mikurog sa paglansang sa kamot nga gipahamtang sa Dios nga gipadupa. Ang Anak nga pinalangga, nagbitay sa Krus, nagtinga sa kalag ko pagluwas. O Maria! Masulob-on, ania mahinulsulon, ang bag-o mo nga anak. Moduyog ako kanimo sa paglakaw sa Kalbaryo hangtod nga ikamatay.

PAGBASA SA SANTOS NGA EBANGHELYO SUMALA NI SAN JUAN

Jn. 19: 25-27

Duol sa krus ni Jesus nagbarog ang iyang inahan ug ang igsoon sa iyang inahan, si Maria nga asawa ni Cleofas, ug si Maria Magdalena. Sa pagkakita ni Jesus sa iyang inahan ug sa tinun-an nga iyang gimahal nga nagbarog didto, miingon siya sa iyang inahan, "Babaye, ania ang imong anak." Unya miingon siya sa tinun-an, "Ania ang imong inahan." Sukad niadto gipatipon si Maria pagpuyo sa tinun-an.

PAGBASA SA SANTOS NGA EBANGHELYO SUMALA NI SAN LUKAS

Lk. 2: 33-35

Nahibulong ang amahan ug ang inahan sa bata sa pagkadungog nila sa mga butang nga gisulti ni Simeon bahin kaniya. Unya nanalangin si Simeon kanila ug miingon kang Maria nga inahan sa bata, "Kining bataa gipili sa Dios alang sa kalaglagan ug kaluwasan sa daghang mga tawo sa Israel; mahimo siyang ilhanan gikan sa Dios nga supakon sa daghang mga tawo, ug tungod niini madayag ang ilang mga tinagoang hunahuna. Ug ang kaguol, sama sa usa ka hait nga espada, molagbas sa imong kaugalingong kasingkasing."