Sabado sa Ikakawhaa'g Tulo nga Semana sa Ordinaryong Panahon

PAGBASA GIKAN SA UNANG SULAT NI SAN PABLO NGADTO SA TAGA-CORINTO

1 Cor. 10: 14-22

Busa, mga igsuon, ayaw kamo pagsimba sa mga diosdios. Gisulti ko kini kaninyo kay kamo mabuot man; kamo nay mahibalo sa pagtimbangtimbang sa akong gisulti. Ang kopa sa panalangin nga tungod niini gipasalamatan nato ang Dios—dili ba kini pakig-ambit man nato sa dugo ni Cristo inig-inom nato gikan niining kopa? Ug dili ba pakig-ambit man nato sa lawas ni Cristo inigkaon nato niining pan nga atong gipikaspikas? Sanglit may usa lamang ka pan, kitang tanan bisan daghan, usa lamang ka lawas; kay nakig-ambit man kita sa usa lamang ka pan. Hunahunaa ninyo ang gibuhat sa mga Israelita: kadtong nagkaon sa halad-sinunog nakaambit sa pag-alagad sa Dios diha sa halaran. Unsa may buot kong ipasabot? Buot ko bang ipasabot nga may bili ang diosdios o ang pagkaon nga gihalad ngadto sa diosdios? Dili! Ang gipasabot ko mao nga kadtong gihalad diha sa mga paganong halaran gihalad ngadto sa mga yawa, dili ngadto sa Dios. Dili ko buot nga mahimo kamong kaabin sa mga yawa. Dili kamo makainom sa kopa sa Ginoo ug sa kopa usab sa mga yawa; dili kamo makakaon diha sa kan-anan sa Ginoo ug sa kan-anan sa mga yawa. Hagiton ba nato ang Ginoo aron mangabugho kanato? Nagtuo ba kamo nga kita gamhanan pa kay kaniya?

SALMO RESPONSORYO

Ps. 116: 12-13. 17-18

Kanimo, Ginoo, ihalad ko ang usa ka sakripisyo sa pagdayeg.

Unsaon ko pagbalus sa Ginoo sa tanan nga mga kaayohan nga iyang nahimo kanako? Imnon ko ang kopa sa kaluwasan ug sangpiton ko ang ngalan sa Ginoo.

Kanimo, Ginoo, ihalad ko ang usa ka sakripisyo sa pagdayeg.

Kanimo akong ihalad ang sakripisyo sa pasalamat, ug sangpiton ko ang ngalan sa Ginoo. Tumanon ko ang akong panaad ngadto sa Ginoo diha sa atubangan sa tibuok niyang lungsod.

Kanimo, Ginoo, ihalad ko ang usa ka sakripisyo sa pagdayeg.

PAGBASA SA SANTOS NGA EBANGHELYO SUMALA NI SAN LUKAS

Lk. 6: 43-49

Si Jesus miingon sa iyang mga tinun-an: "Ang kahoy nga walay sakit dili mamungag walay pulos nga bunga, ni ang masakiton nga kahoy mamungag maayong bunga. Ang tagsatagsa ka kahoy maila sa iyang bunga; dili makapupo og igos gikan sa sampinit, ni ubas gikan sa kadyapa. Ang maayong tawo magsultig maayo gikan sa maayong mga butang nga anaa sa iyang kasingkasing; apan ang tawo nga daotan magbuhat og daotan gikan sa mangil-ad nga mga butang sa iyang kasingkasing. Kay kon unsa ang anaa sa kasingkasing sa tawo mao usab ang iyang isulti." "Nganong nagtawag man kamo kanako, 'Ginoo,' nga dili man kamo mobuhat sa akong gisugo kaninyo? Ang moduol kanako ug mamati sa akong gisulti ug motuman niini, ipakita ko kaninyo sa unsa siya mahisama. Sama siya sa tawo nga nagtukod og balay: nagkalot siyag lawom ug gipahiluna niya ang sukaranan diha sa ibabaw sa bato. Sa dihang mibaha ang suba ug mihasmag niining balaya, wala kini matay-og kay maayo man nga pagkatu-kod. Apan ang tawo nga mamati sa akong gisulti ug dili motuman niini mahisama sa usa ka tawo nga nagtukod og balay diha sa yuta nga wala niya butangig sukaranan; sa dihang mihasmag niini ang baha, napukan kini dayon, ug hingpit ang pagkagun-ob sa maong balay!"