Biyernes sa Ikakawhaa'g Tulo nga Semana sa Ordinaryong Panahon

PAGBASA GIKAN SA UNANG SULAT NI SAN PABLO NGADTO SA TAGA-CORINTO

1 Cor. 9: 16-19. 22-27

Wala akoy katungod sa pagpasigarbo tungod lamang kay nagwali ako sa ebanghelyo, sanglit gisugo man ako pagbuhat niini. Alaot ako kon wala pa ako magwali sa ebanghelyo! Kon kinabubut-on pa ang pagtuman ko sa akong buluhaton, makapaabot unta ako nga gantihan; apan sanglit nagbuhat man ako niini ingon nga katungdanan ko, nagpasabut kini nga gisugo ako sa pagbuhat niini. Busa unsa may suhol nga mapaabot ko? Ang pribilihiyo sa pagwali sa Maayong Balita sa walay pagpabayad niini, sa walay pagpahimulos sa akong mga katungod sa akong paghago alang sa ebanghelyo. Dili ako ulipon ni bisan kinsa; apan nagpaulipon ako sa tanan aron madani ko ang labing daghan. Diha sa mga huyang sa pagtuo nahimo akong huyang sama kanila aron madani ko sila. Busa nagpahiuyon ako sa tanang tawo aron maluwas ko ang pipila kanila, sa bisan unsang paagi. Gihimo ko ang tanan tungod sa Maayong Balita aron makaambit ako sa panalangin niini. Sa walay duhaduha nasayod kamo nga sa lumba ang tanan modagan, apan usa ra kanila ang gantihan. Busa paningkamut kamog dagan aron gantihan kamo. Ang kada magdudula nga nagbansaybansay nagsunod sa hingpit nga disiplina. Gihimo niya kini aron makadawat siya sa purongpurong nga malaya; apan kita naghimo niini alang sa usa ka purongpurong nga dili malaya hangtod sa kahangturan. Mao kini ang hinungdan nga midagan ako hangtod gayod sa dag-anan, ug sama ako sa boksingiro nga dili magpatakag sumbag. Gimanso ko ang akong lawas pinaagig mga sumbag ug gipanton ko kini aron nga dili ako isalikway human ako mag-awhag sa uban pag-apil sa bangga.

SALMO RESPONSORYO

Ps. 84: 3. 4. 5-6. 8. 12

Pagkahiligugmaon sa imong puloy-anan, O Ginoo, Dios nga gamhanan.

Ang akong kalag nangandoy ug gihidlaw sa mga kahawanan sa Ginoo. Ang akong kasingkasing ug akong lawas nagasinggit alang sa buhi nga Dios.

Pagkahiligugmaon sa imong puloy-anan, O Ginoo, Dios nga gamhanan.

Bisan ang goriyon nakakaplag og puloy-anan ug ang sayaw sa usa ka salag nga kabutangan sa iyang mga piso—mao usab ang imong mga altar, O Ginoo sa kagahuman, akong hari ug akong Dios.

Pagkahiligugmaon sa imong puloy-anan, O Ginoo, Dios nga gamhanan.

Bulahan sila nga nagapuyo sa imong balay, kay sa kanunay nagadayeg sila kanimo. Bulahan ang mga tawo kansang kusog mao Ikaw. Mag-uswag sila gikan sa kusog ngadto sa kusog.

Pagkahiligugmaon sa imong puloy-anan, O Ginoo, Dios nga gamhanan.

Kay usa ka Adlaw ug usa ka taming mao ang Ginoong Dios; nagahatag siya sa grasya ug himaya; Dili maghikaw ang Ginoo og bisan unsang butang nga maayo kanila nga magalakaw sa kinasingkasing.

Pagkahiligugmaon sa imong puloy-anan, O Ginoo, Dios nga gamhanan.

PAGBASA SA SANTOS NGA EBANGHELYO SUMALA NI SAN LUKAS

Lk. 6: 39-42

Ug gisultihan sila ni Jesus niining sambingaya: "Ang buta dili makaagak sa laing buta; kon buhaton niya kini, mangahulog silang duha sa kanal. Walay tinun-an nga labaw sa iyang magtutudlo; apan kon ang tinun-an hingpit ng nakat-on sa tanang gitudlo kaniya, mahisama siya sa iyang magtutudlo." "Nganong nagtan-aw ka man sa puling sa imong isigkatawo, apan wala mo tagda ang troso diha sa imong mata? Unsaon mo man pag-ingon sa imong isigkatawo, 'Ambi, akoy pakuhaa sa imong puling,' nga wala ka man gani makakita sa troso nga anaa sa imong kaugalingong mata? Maut! Kuhaa una ang troso nga anaa sa imong mata aron makakita ka pag-ayo ug makuha mo ang puling sa imong isigkatawo."