Huwebes sa Ikakawhaa'g Tulo nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-CORINTO

1 Cor. 8: 1-7. 11-13

Karon hisgotan ko ang mahitungod sa pagkaon nga gihalad ngadto sa mga diosdios. Tinuod nga "kitang tanan may kahibalo," sumala sa ilang giingon. Ang maong kahibalo naghimo sa tawo nga mapahitas-on, apan ang gugma nagpalig-on. Ang tawo nga naghunahuna nga may kahibalo siya, sa pagkatinuod wala mahibalo sa angay niyang hibaloan. Apan ang nahigugma sa Dios nailhan niya. Busa mahitungod sa pagkaon sa kalan-on nga gihalad ngadto sa mga diosdios: nahibalo kita nga ang diosdios nagrepresentar ug butang nga dili tinuod; nasayod kita nga usa lamang ang Dios. Bisan tuod kon dunay ginganlag mga "dios" nga atua sa langit o ania ba hinuon sa yuta ug bisag daghan kining mga "diosdios" ug mga "ginoo", apan alang kanato may usa lamang ka Dios, ang Amahan nga nagbuhat sa tanang butang ug alang kaniya kita nagkinabuhi; ug may usa lamang ka Ginoo, si Jesucristo, nga pinaagi kaniya gibuhat ang tanang butang ug pinaagi kaniya nagkinabuhi kita. Apan dili ang tanan masayod sa maong kamatuoran. May mga tawo nga naanad na gayod sa mga diosdios nga hangtod karon naghunahuna gihapon sila nga kanang pagkaon iya sa diosdios; huyang ang ilang konsensya, ug bation nila nga mahugaw sila inigkaon nila niini. Kay kon ang usa ka tawo nga huyang ug konsensya makakita kanimo nga may "kahibalo" nga nagkaon didto sa templo sa diosdios, dili ba kini magdasig kaniya pagkaon sa mga kalan-on nga gihalad ngadto sa mga diosdios? Busa kining imong igsuon sa pagtuo nga huyang ug gipakamatyan ni Cristo malaglag tungod sa imong "kahibalo!" Sa imong pagbuhat niini nakasala ikaw kang Cristo pinaagi sa imong pagpakasala sa imong mga igsuon ug pagsamad sa ilang huyang nga konsensya. Busa kon ang kalan-on makaangin sa pagpakasala sa akong igsuon, ako mismo dili na mokaon ug karne aron ang akong igsuon dili makasala.

SALMO RESPONSORYO

Ps. 139: 1-3. 13-14. 23-24

Agaka ako, Ginoo, subay sa dalan nga walay katapusan.

O Ginoo, imo akong gisulayan ug nakaila ikaw kanako; nahibalo ka anus-a ako molingkod ug anus-a motindog; nakasabot ka sa akong mga hunahuna gikan sa halayo. Giusisa mo ang akong mga panaw ug mga pahulay, sinati ka sa tanan kong mga paagi.

Agaka ako, Ginoo, subay sa dalan nga walay katapusan.

Sa tinuoray gihulman mo ang kinahiladman sa akong kaugalingon; gibuhat mo ako didto sa tagoangkan sa akong inahan. Gipasalamatan ko ikaw tungod sa makahadlok ug katingalahan mong pagbuhat kanako; kahibulongan ang imong mga buhat.

Agaka ako, Ginoo, subay sa dalan nga walay katapusan.

Sulayi ako, O Dios, ug ilha ang akong kasingkasing; susiha ako, ug ilha ang akong mga hunahuna; tan-awa kon hiwi ba ang akong dalan, ug tultoli ako diha sa dalan sa karaan.

Agaka ako, Ginoo, subay sa dalan nga walay katapusan.

PAGBASA SA SANTOS NGA EBANGHELYO SUMALA NI SAN LUKAS

Lk. 6: 27-38

Si Jesus miingon sa iyang mga tinun-an: "Apan sultihan ko kamo nga namati kanako: Higugmaa ninyo ang inyong mga kaaway ug buhata ang maayo alang niadtong nagdumot kaninyo. Panalangini ang manghimaraut kaninyo ug pag-ampo kamo alang sa nagdaogdaog kaninyo. Kon may mosagpa sa inyong aping, ipasagpa usab ang pikas; ug kon adunay moagaw sa inyong kamisadentro, ihatag usab ang inyong kamisin. Hatagi ninyo ang tanan nga mangayo, ug kon may mokuha sa inyong butang, ayaw na kinig bawia. Buhata ngadto sa mga tawo ang gusto ninyo nga buhaton nila nganha kaninyo." "Kon mao ray higugmaon ninyo sila nga nahigugma kaninyo, nganong magpaabot pa kamog panalangin? Bisan gani ang mga makasasala nahigugma man niadtong nahigugma kanila! Ug kon mao ray buhaton ninyog maayo kadtong nagbuhat kaninyog maayo, nganong magpaabot man kamog panalangin? Bisan gani ang mga makasasala nagbuhat man niana! Ug kon mao ray inyong pahulamon kadtong inyong gituohan nga makabayad nganong magpaabot man kamog panalangin? Bisan gani ang mga makasasala maka magpahulam man ngadto sa mga makasasala ug magpaabot sila nga bayran! Higugmaa hinoon ninyo ang inyong mga kaaway ug buhata ang maayo ngadto kanila; pahulama sila sa walay pagpaabot nga bayran pa, kay sa ingon niini dako ang ganti nga inyong madawat ug kamo mahimong mga anak sa Labing Halangdong Dios. Kay siya maayo ngadto sa mga dili mapasalamaton ingon man sa mga daotan. Busa pagmaluluy-on kamo, ingon nga maluluy-on ang inyong Amahan." "Ayaw kamo paghukom sa inyong isigkatawo, ug ang Dios dili maghukom kaninyo; ayaw sila pakasad-a, ug kamo dili pakasad-on sa Dios; pasayloa sila, ug ang Dios mopasaylo usab kaninyo. Panghatag kamo sa uban, ug ang Dios mohatag usab kaninyo: madawat ninyo ang hustong takos, ug pakapinan pa gayod, ibubo sa inyong mga kamut kutob sa inyong mahakgom. Ang taksanan nga inyong gamiton alang sa uban mao usab ang taksanan nga gamiton sa Dios alang kaninyo."