Miyerkoles sa Ikakawhaa'g Tulo nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-CORINTO

1 Cor. 7: 25-31

Mahitungod sa mga dili minyo: wala akoy sugo gikan sa Ginoo, apan aniay akong hunahuna ingon nga usa ka tawo nga tungod sa kaluoy sa Ginoo takos kasaligan. Tungod sa kalisdanan niining panahona, gihunahuna ko nga maayo pa sa usa ka tawo nga magpabilin sa iyang kahimtang karon. Kon may asawa ka, ayaw siya bulagi. Kon ulitawo ka, ayaw pagminyo. Apan kon magminyo ka, wala ka makasala; ug kon ang usa ka babaye nga walay bana magminyo, wala siya makasala. Apan palabihon ko nga mahilikay kamo sa matag adlaw nga mga kasamok nga maangkon nila. Ang buot kong ipasabut, mga igsuon, mao kini: ang gitagal nga panahon hapit na moabot; ang mga lalaking minyo magkinabuhi sama rag dili minyo; kadtong naghilak, sama rag wala maghilak; ang nagkatawa, sama rag wala magkatawa; ang namalit, sama rag dili tag-iya sa ilang pinalit; kadtong magnegosyo, sama rag wala magnegosyo. Kay kining kalibutana karon hapit na matapos.

SALMO RESPONSORYO

Ps. 45: 11-12. 14-15. 16-17

Pamati kanako, anak kong babaye; tan-awa ug ipaabong ang imong dunggan.

Pamati, O anak kong babaye, ug tan-awa; ipaabong ang imong dunggan, hikalimti ang imong lungsod ug ang balay sa imong amahan. Sa ingon gitinguha sa hari ang imong katahom kay siya man ang imong Ginoo, ug kinahanglan simbahan mo siya.

Pamati kanako, anak kong babaye; tan-awa ug ipaabong ang imong dunggan.

Hilabihan kamahimayaon ang anak nga babaye sa hari diha sa iyang pagsulod; ang iyang sapot gisidsiran og bulawan. Sa binoldahan nga saput gibayongan siya ngadto sa hari; nagsunod kaniya ang mga dalaga nga gidala ngadto kanimo.

Pamati kanako, anak kong babaye; tan-awa ug ipaabong ang imong dunggan.

Gidala sila sa sulod uban sa kalipay ug kasadya; nanulod sila sa palasyo sa hari. Ang luna sa imong mga ginikanan huptan sa imong mga anak; himoon mo silang mga prinsipe sa tibuok nga yuta.

Pamati kanako, anak kong babaye; tan-awa ug ipaabong ang imong dunggan.

PAGBASA SA SANTOS NGA EBANGHELYO SUMALA NI SAN LUKAS

Lk. 6: 20-26

Unya mitan-aw si Jesus sa iyang mga tinun-an ug miingon: "Bulahan kamong mga kabus, kay inyo ang Gingharian sa Dios!" "Bulahan kamong mga gigutom karon, kay kamo pagabusgon!" "Bulahan kamo nga karon naghilak, kay kamo malipay ra unya!" "Bulahan kamo kon ang mga tawo magdumot ug magsalikway ug magbugalbugal kaninyo, ug mag-ingon nga kamo mga daotan, tungod sa Anak sa Tawo! Paglipay kamo kon kini mahitabo, ug pagsayaw sa kasadya, kay dako ang ganti nga gitagana alang kaninyo didto sa langit. Kay ang ilang mga katigulangan naghimo sa ingon ngadto sa mga propeta." "Apan alaut kamo nga mga dato karon, kay napahimuslan na ninyo ang kinabuhi nga hayahay!" "Alaut kamo nga mga busog karon, kay kamo unya kanunayng gutomon!" "Alaut kamo nga karon nangatawa, kay kamo unya magbangotan ug maghilak!" "Alaut kamo kon magdayeg kaninyo ang tanang mga tawo, kay mao usab kini gibuhat sa ilang mga katigulangan ngadto sa mini nga mga propeta."