Lunes sa Ikakawhaa'g Tulo nga Semana sa Ordinaryong Panahon

PAGBASA GIKAN SA UNANG SULAT NI SAN PABLO NGADTO SA TAGA-CORINTO

1 Cor. 5: 1-8

Gidungog na nga may nakighilawas diha kaninyo, ug hilabihan kini kangil-ad nga bisan gani ang mga pagano wala makabuhat sa ingon; kay gisuginlan ako nga may usa ka tawo nga nakigpuyo sa iyang ina-ina. Unya nagpagarbo hinuon kamo! Angay unta nga masubo kamo ug papahawaon sa inyong pundok ang nakabuhat niini. Alang kanako, bisan tuod layo ako kaninyo, kauban gihapon ako ninyo diha sa espiritu; ug sa ngalan sa atong Ginoong Jesus, gihukman ko na ang naghimo niining mangil-ad nga butang, sama ra nga uban ako kaninyo. Sa inyong pagtigom, nakigtagbo ako kaninyo diha sa espiritu pinaagi sa gahom sa atong Ginoong Jesus nga nakig-uban kanato. Itugyan kining tawhana kang Satanas aron laglagon ang iyang lawas, ug ang iyang espiritu maluwas unya sa pagbalik sa Ginoo. Dili maayo nga kamo magpagarbo! Nasayod kamo sa giingon, "Ang gamayng patubo makapatubo sa tibuok minasa." Kinahanglan nga inyong isalikway ang daang patubo sa sala aron maputli gayod kamo. Unya mahisama kamo sa bag-ong minasa nga walay patubo, ingon sa akong nahibaw-an nga kamo mao gayod. Kay si Cristo, ang nating karnero sa Pangilin sa Pagsaylo, gikahalad na. Busa saulogon ta ang kombira sa walay paggamit sa pan nga sinambogan sa daang patubo nga mao ang patubo sa sala ug kalaw-ayan, kondili sa pan nga walay patubo, ang pan sa kaputli ug sa kamatuoran.

SALMO RESPONSORYO

Ps. 5: 5-6. 7. 12

Unahi ako diha sa imong katarong, Ginoo.

Kay ikaw, O Dios dili malipay diha sa kadautan; walay tawong dautan nga magpabilin diha kanimo; dili unta mobarog ang mapahitas-on diha sa imong atubangan. Gidumtan mo ang tanang nagabuhat og dautan.

Unahi ako diha sa imong katarong, Ginoo.

Gilaglag mo ang tanan nga nagasulti og bakak; ang mamumuno ug ang limbongan gikasilagan sa Ginoo.

Unahi ako diha sa imong katarong, Ginoo.

Apan ang tanan nga nagadangop kanimo maglipay unta ug magsadya sa kahangturan. Panalipdi sila, aron ikaw mahimong kalipay kanila nga nahigugma sa imong ngalan.

Unahi ako diha sa imong katarong, Ginoo.

PAGBASA SA SANTOS NGA EBANGHELYO SUMALA NI SAN LUKAS

Lk. 6: 6-11

Sa laing Adlawng Igpapahulay, misulod si Jesus sa usa ka sinagoga ug nagtudlo. Didto may usa ka tawo nga kuyos ang tuong kamut. Pipila sa mga magtutudlo sa Balaod ug mga Pariseo nangitag igong katarungan aron ika-sumbong nila si Jesus nga nagbuhat og kalapasan; busa ilang gipanid-an pag-ayo kon manambal ba siya sa mga masakiton sa Adlaw nga Igpapahulay. Apan nahibaw-an ni Jesus ang ilang gihunahuna ug iyang giingnan ang tawo nga kuyos og kamut, "Tindog ug dali ngari sa atubangan." Ug mitindog ang tawo ug mibarog didto. Unya miingon si Jesus kanila, "Pangutan-on ko kamo: Unsa ba ang gitugot sa atong Balaod nga mahimong buhaton nato sa Adlawng Igpapahulay? Ang pagtabang ba o ang pagdaot? Ang pagluwas ba sa kinabuhi sa tawo o ang pagpatay ba?" Gilibot niya pagtan-aw silang tanan ug unya gisultihan niya ang tawo, "Ituy-od ang imong kamut." Ug gituy-od sa tawo ang iyang kamut, ug naayo kini. Apan napungot sila pag-ayo ug nag-sabot unsay ilang buhaton kang Jesus.