Ikakawhaa'g Tulo nga Domingo sa Ordinaryong Panahon

PAGBASA GIKAN SA BASAHON NI PROPETA EZEQUIEL

Ez. 33: 7-9

"Busa ikaw, O tawo, gipili ko ingon nga magbalantay sa nasod sa Israel. Ang ipasulti ko kanimo maoy imong isulti kanila agig pasidaan. Kon moingon ako sa usa ka tawong dautan, 'Mamatay ka gayod,' ug unya wala mo siya pasidan-i sa pagbiya sa dautan niyang buhat, mamatay siya nga makasasala, apan ikaw ang paninglan ko sa iyang kamatayon. Apan kon gipasidan-an mo ang makasasala sa pagbiya sa dautan niyang binuhatan apan wala niya kini tagda, mamatay siya nga makasasala apan wala kay tulobagon."

SALMO RESPONSORYO

Ps. 95: 1-2. 6-7. 8-9

Kon karon makadungog kamo sa iyang tingog, ayaw patig-aha ang inyong mga kasingkasing.

Umari kamo, awitan ta nga malipayon ang Ginoo; isangyaw ta ang bato sa atong kaluwasan. Yukboan ta siya uban sa pasalamat; awitan ta siya nga malipayon ug mga salmo.

Kon karon makadungog kamo sa iyang tingog, ayaw patig-aha ang inyong mga kasingkasing.

Umari kamo, manghapa kita sa pagsimba; mangluhod kita atubangan sa Ginoo nga nagbuhat kanato. Kay siya man ang atong Dios, ug kita ang katawhan nga iyang gidumala, ang panon nga iyang gitultolan.

Kon karon makadungog kamo sa iyang tingog, ayaw patig-aha ang inyong mga kasingkasing.

Hinaut unta nga karon mamati kamo sa iyang tingog, "Ayaw tig-aha ang inyong mga kasingkasing sama didto sa Meriba. Sama sa adlaw ni Massah didto sa kamingawan diin gisulayan ako sa inyong mga katigulangan. Ila akong gisuta bisan naka-kita sila sa akong mga buhat."

Kon karon makadungog kamo sa iyang tingog, ayaw patig-aha ang inyong mga kasingkasing.

PAGBASA GIKAN SA SULAT NI SAN PABLO NGADTO SA TAGA-ROMA

Rom. 13: 8-10

Ayaw pagapos sa utang gawas sa utang sa paghigugmaay. Ang nahigugma sa iyang isigkatawo nakatuman sa Balaod. Ang kasugoan nga nag-ingon, "Ayaw panapaw, ayaw pagpatay, ayaw pangawat, ayaw kaibog," kining tanan ug uban pa, nalangkob sa usa ka sugo, "Higugmaa ang imong isigkatawo sama sa imong kaugalingon." Ang nahigugma sa iyang isigkatawo dili gayod makaako paghimog dautan sa iyang isigkatawo. Busa ang paghigugma mao ang katumanan sa Balaod.

PAGBASA SA SANTOS NGA EBANGHELYO SUMALA NI SAN MATEO

Mt. 18: 15-20

Si Jesus miingon sa iyang mga tinun-an, "Kon ang imong igsuon makasala kanimo, adtoa siya ug pakit-a siya sa iyang sayop. Apan himoa kini nga kamo rang duha. Kon mamati siya kanimo, magkauli ang inyong maayong kabubut-on. Apan kon siya dili mamati kanimo, pagdalag usa o duha ka tawo, aron ang matag sumbong kapamatud-an sa duha o tulo ka saksi, sumala sa giingon sa Kasulatan. Ug kon dili gayod siya mamati kanila, isulti ang tanan ngadto sa simbahan. Ug kon dili siya mamati sa simbahan, isipa siya nga usa ka langyaw o kobrador sa buhis." "Ug busa sultihan ko kamo: ang inyong idili dinhi sa yuta, idili usab didto sa langit, ug ang inyong itugot dinhi sa yuta, itugot usab didto sa langit." "Ug sultihan ko pa gayod kamo: kon duha kaninyo dinhi sa yuta magkauyon sa pagpangayo bisag unsang butanga, kini ihatag kaninyo sa akong Amahan nga atua sa langit. Kay kon may duha o tulo nga magkatigom sa akong ngalan, atua ako uban kanila."