Sabado sa Ikakawhaa'g Duha nga Semana sa Ordinaryong Panahon

PAGBASA GIKAN SA SULAT NI SAN PABLO NGADTO SA TAGA-CORINTO

1 Cor. 4: 9-15

Sa akong hunahuna, mao rag ang Dios nagbutang kanamong mga apostoles sa labing ubos nga dapit. Sama kami sa mga tawo nga gihukman nga patyon atubangan sa katawhan—usa ka talan-awon alang sa tanang anghel ug sa tanang tawo. Kay tungod kang Cristo kami mga buangbuang, apan maalamon kamo diha kang Cristo. Huyang kami, apan kamo lig-on. Tinamay kami apan kamo pinasidunggan. Hangtod gayod niining mga taknaa, gigutom ug giuhaw kami, nagkagidlay, gipamunalan, ug nadiindiin kami; apan bisan pa niini, naningkamut gayod kami pagtrabaho aron mabuhi. Kon may motunglo kanamo, manalangin kami; kon lutoson, magpailob kami; kon pakaulawan, tubagon namo sa malumong mga pulong. Hangtod karon nahisama kami sa basura nga gisalibay diha sa yuta. Gisulat ko kini dili aron sa pagpakaulaw kaninyo, kondili aron sa pagtudlo kaninyo ingon nga pinangga kong mga anak. Kay bisan pa kon duna kamoy napulo ka libo ka magtutudlo diha kang Cristo, usa lamang ang inyong Amahan. Kay sa inyong kinabuhi diha kang Cristo Jesus, nahimo ako nga inyong amahan pinaagi sa akong pagdala sa Maayong Balita nganha kaninyo.

SALMO RESPONSORYO

Ps. 145: 17-18. 19-20. 21

Haduol ang Ginoo sa tanan nga nagasangpit kaniya.

Ang Ginoo matarong diha sa tanan niyang mga paagi, ug balaan diha sa tanan niyang mga buhat. Ang Ginoo haduol sa tanan nga nagasangpit kaniya, sa tanan nga nagasangpit kaniya diha sa kamatuoran.

Haduol ang Ginoo sa tanan nga nagasangpit kaniya.

Gituman niya ang gipangandoy nila nga mahadlokon kaniya, gidungog niya ang ilang singgit ug giluwas sila. Ang Ginoo nagaamping sa tanan nga nahigugma kaniya, apan ang tanang dautan iyang laglagon.

Haduol ang Ginoo sa tanan nga nagasangpit kaniya.

Magbungat unta ang akong ba-ba sa kadayganan sa Ginoo, ug ang tanang mga tawo magdayeg sa iyang balaang ngalan sa kahangturan.

Haduol ang Ginoo sa tanan nga nagasangpit kaniya.

PAGBASA SA SANTOS NGA EBANGHELYO SUMALA NI SAN LUKAS

Lk. 6: 1-5

Usa niana ka Adlawng Igpapahulay naglakaw si Jesus agi sa kaumahan sa trigo. Unya ang iyang mga tinun-an nangutlog mga uhay sa trigo, ug tapos nila kini kusokusoa sa ilang mga kamut ilang gikaon ang lugas. Apan pipila sa mga Pariseo miingon, "Nganong nagbuhat man kamo nianang gidili sa atong Balaod nga buhaton sa Adlaw nga Igpapahulay?" Si Jesus mitubag kanila, "Wala ba kamo makabasa sa gibuhat ni David sa dihang gigutom siya ug ang iyang mga kauban? Misulod siya sa balay sa Dios ug mikuha sa pan nga hinalad ngadto sa Dios. Unya mikaon siya niini ug ang iyang mga kauban iya usab nga gihatagan sa pan. Apan gawas lamang sa mga pari, gidid-an ang tanan sa atong Balaod sa pagkaon sa pan nga hinalad ngadto sa Dios." Ug si Jesus midugang sa pag-ingon, "Ang Anak sa Tawo maoy magbuot sa angay buhaton sa Adlawng Igpapahulay."